Ukanikorongi u Ire Ubana a Asu u
Aza a Tasaloniya
Ukukpa̱ u kadyanshi
Atoni a ɗa aꞌa̱ri a Tasaloniya a ɗa Bulus wa koronku ukanikorongi u na vi. Ukanikorongi u ire u ɗa yi la vi ubana a asu u Atoni a ɗa aꞌa̱ri a kuden ku pige ka ka̱ri a ikengi i kushiva̱. U korongu ta̱ u ɗa kpaci aza roku pini ɗe a ka wenishike ta̱ uwenishike u kaɓan a kaci ka ugono u Yesu. Aza roku a le a da aꞌa̱ ta̱ n ukanikorongi u ɗa u wuta̱i ara Bulus, shegai kaɓan ka.
A ukanikorongi u na vi, Bulus wenishike ta̱ ukuna u mayun a kaci ka kain ka Yesu wa gono. I doku ta̱ a ili iꞌya wa̱ri u korongi a ukuna u na vi. Ili i tatsu iꞌya pini iꞌya iꞌa̱ri n kalen iꞌya Bulus korongi pini a ukanikorongi u na vi. U tonuko le ta̱ ukuna u ugono u Yesu. U tonuko le an upana u ikyamba u ɗa a ka so vi mavura ma a asu u Kashila̱ wa. Upana u ikyamba u na vi wa kotso ta̱, kpam kain ka uwunvuga ka pini. A makorishi, u da a ma̱tsa̱ manyan hal n a vani ugono u Yesu.
Gba̱ ili i na yi gogo‑na i woko tsu ta̱ i mayun, tyoku ɗa iꞌa̱ri i mayun a asu u aza a Tasaloniya a aꞌayin a ɗa Bulus korongi ukanikorongi u na vi.
Ili iꞌya iꞌa̱ri a tagara̱da u na vi
Idyani (1:1-2)
Ugono u Asheku wa tuko ta̱ ukuna u mayun (1:3-12)
Kotsu Asheku a gono wa (2:1-12)
Rongoi n upityanangu (2:13-17)
Yanyi kavasu n i yanyi manyan (3:1-15)
Kavasu ka makorishi (3:16-18)
1
1 A̱tsu an Bulus n Sila n Timoti a̱tsa tsa korongu ukanikorongi u na vi ubana a asu u Atoni a Tasaloniya aza ɗa aꞌa̱ri ama a Kashila̱ Tata u tsunu, kpam aꞌa̱ri a asuvu a Asheku Yesu Kirisiti Kawauwi.
2 Kavasu ka va̱ ka Kashila̱ Tata n Asheku Yesu Kawauwi a na̱ka̱ ɗa̱ ukuna u shinga na̱ ndishi n shinga!
Kavasu ka ucikpa
3 Ama a va̱, u gan ta̱ an kain dem tsu tsu cikpa Kashila̱ adama a ɗe. Tsu tsu cikpa ta̱ an upityanangu u ɗe wa̱ri a ugbonguro maco kpam ya dem a asuvu a ɗe wa̱ ta̱ a udoku uciga utoku. 4 Ɗa i zuwai tsa yan baci kadyanshi ka ɗe a asu u Atoni a roku, tsu tsu yan ta̱ maza̱nga̱ an iꞌa̱ri n akawunki kpam i shamgbai pini n upityanangu ko an ya pana ikyamba n mavura cika.
5 Upana u ikyamba u nala vi, u wenike ta̱ an Kashila̱ ka yanka ya dem afada dere. Adama a nala Kashila̱ ka kece ɗa̱ ta̱ a asuvu a ama a shinga a ɗa a ka uwa a tsugono tsu Kashila̱, kpam eɗa na a ka yan mavura adama a tsugono tsu nala tsi. 6 Kashila̱ ka tsu yan ta̱ ili dere. Wa yan ta̱ aza ɗa a ka tukuso ɗa̱ upana u ikyamba vi mavura. 7 Wa tuko ɗa̱ ta̱ kpam uwunvuga a asuvu a upana u ikyamba vi hal n a̱tsu dem. Ukuna u na wa gita̱ ta̱ aꞌayin a ɗa Yesu Asheku u wuta̱i a zuba u tuwa̱i n atsumate a zuba a ucira a ne, kpam n aletsu a akina.
8 Asheku a tsunu Yesu wa yan ta̱ aza ɗa bawu a revei Kashila̱ kpam a ꞌyuwain upana̱ka Kadyanshi ka Shinga ka Yesu Asheku mavura. 9 A ka zuwa le ta̱ a upana u ikyamba; wata, ukpa̱ u ɗa bawu wa̱ri n utyoku. A ka pece le ta̱ n Asheku kpam a asuvu a tsupige tsu ucira tsu ne bawu utyoku. 10 Ukuna u na wa gita̱ ta̱ aꞌayin a ɗa Asheku a ka gono u wushi icikpali n tsupige a asu u aza ɗa aꞌa̱ri n upityanangu ara ne kpam aꞌa̱ri ama a ne. Eɗa̱ iꞌa̱ ta̱ pini a asuvu a le, kpaci i wushuku ta̱ n iꞌya tsu danai.
11 Ukuna u na u ɗa u zuwa tsu tsa lya kelime n uyan kavasu, tsa̱ra̱ u zuwa ɗa̱ i woko ama a ɗa aꞌa̱ri dere tyoku ɗa wa ciga. Tsa yan ta̱ kpam kavasu, ucira u Kashila̱ u ɓa̱nga̱ ɗa̱ i yain gba̱ ikuna i shinga iꞌya ya ciga i yain. Upityanangu u ɗe u ɗa u zuwa ɗa̱ uciga u uyan ukuna u nala vi. 12 Nala wa zuwa ya dem u na̱ka̱ kala ka Asheku a tsunu Yesu tsupige adama a ɗe. Kpam a ka na̱ka̱ ɗa̱ ta̱ tsupige tsi hal n eyi dem. Kashila̱ ka tsunu ka ka yan ukuna u nala vi a asu u Asheku Yesu Kawauwi, adama a ukuna u shinga u le.