Hebreos
1
Dios quincālakmacaminī'ta'n ī'Ska'ta'
1 Lakmajtza' Dios pūlaclhūhua' cāmāca'tzīnīlh ixa'kchihuīna'nī'n ē cāmāchihuīnīlh ixtachihuīn. Xlaca'n maklhūhua' tatā'chihuīna'nli tī lakmakānī'n. 2 Chuhua'j tzamā' quilhtamacuj tū ā'xmān, Dios quincālakmacaminī'ta'n ī'Ska'ta'. Ū'tza' tī quincāmācā'tzīnīnī'ta'n tū Dios lacasqui'n naca'tzīyāuj. Dios līhui'līlh ī'Ska'ta' ixtēcu' nahuan ixlīpō'ktu tū a'nan. Ī'Ska'ta' Dios cāxui'līlh cā'quilhtamacuj ē tū a'nan nac a'kapūn. Cāxui'līlh chī ixtalacasqui'nīn Dios. 3 Ī'Ska'ta' Dios, xla' lacxtim chī Dios, lacxtim ixlīka'tla'. Xla' ū'tza' māpa'ksīkō' tū a'nan nac cā'quilhtamacuj ē tū tahui'lāna'lh tālhmā'n nac a'kapūn, ixpālacata xla' ka'lhī lītli'hui'qui. Ū'tza' cāxapakō'lh quincuentaca'n. Xla' tahuī'lh na ixpekxtūcāna'j Dios nac a'kapūn.
Ī'Ska'ta' Dios ka'lhī lītli'hui'qui
4 Ī'Ska'ta' maxquī'ca ka'tla' lītli'hui'qui. Xla' ā'chulā' ka'lhī lītli'hui'qui ē jā ángeles. Dios maxquī'lh ixlītlahuat tū ā'chulā' xaka'tla'. Ángeles jā chuntza' cāmaxquī'ca ixlītlahuatca'n. 5 Dios jā maktin cāhuaninī't nūn chā'tin tī ixángeles chī huanilh ī'Ska'ta':
Hui'x quiSka'ta'.
Chuhua'j quit minTāta'.
Nā Dios jā maktin cāhuaninī't nūn chā'tin tī ixángeles:
Quit minTāta' pō'ktu quilhtamacuj.
Hui'x quiSka'ta' pō'ktu quilhtamacuj.
6 A'cxni' namacamin nac cā'quilhtamacuj ī'Ska'ta' tī ixlacsacnī't Dios huanli:
Ū'tza' catalaktaquilhpūtalh ixlīpō'ktuca'n ixángeles Dios.
7 Dios līchihuīna'nli ángeles ē huanli:
Ángeles ixlacscujnī'n Dios.
Ta'a'n jā Dios cāmacā'n.
Palaj ta'a'n hua'chi ū'ni' ē hua'chi makli'pit.
8 Nā Dios līchihuīna'nli ī'Ska'ta', ē huanli:
Hui'x Dios ē hui'x namāpa'ksīni'na' pō'ktu quilhtamacuj.
Tze chī hui'x nalīmāpa'ksīni'na'.
9 Hui'x lakatīya' tū xatze.
Jā laktzī'ncu'tuna' tū jā tze.
Ū'tza' līlacsacnī'ta'n minDios.
Dios cā'tapāxuhuān maxquī'n lhūhua' lītli'hui'qui.
Ā'makapitzīn jā chuntza' cāmaxquī'ca.
10 Nā Dios chihuīna'mpālh:
Hui'x, Māpa'ksīni', tla'hua'nī'ta' ixlīpō'ktu cā'quilhtamacuj xapūla.
Hui'x tla'hua'nī'ta' ixlīpō'ktu tū a'nan nac a'kapūn.
11 Pō'ktu huā'mā' natalaksputa.
Hui'x jā chuntza'.
Hui'x natahui'la'ya' tihua'na'.
Pō'ktu huā'mā' natala hua'chi xamasni' lu'xu'.
12 Jātza' caticāmaclacasqui'nca, ixpālacata hui'x pō'ktu xasāsti' nacātlahua'ya'.
Chuntza' chī chā'tin a'cxni' tamakxtu xamasni' ixlu'xu' ē lhakā' xasāsti'.
Hui'x, jā maktin catitalakpali' ē natahui'la'ya' tihua'na'.
13 Dios jā maktin cāhuaninī't nūn chā'tin tī ixángeles chuntza' chī huanilh ī'Ska'ta':
Catahui'la' nā quimpekxtūcāna'j hasta quit na'iccātlaja mintā'lāquiclhlaktzi'nī'n.
14 Ángeles xalakahuan masqui jāla laktzī'ncan. Xlaca'n tascuja chuntza' chī Dios cāmāpa'ksī. Dios cālakmacamin natamaktāya tī nacāmakapūtaxtūcan.