8
E Ieesuꞌ A Teꞌ Susun Po Teꞌ Ësës Heꞌ Va Pa Vöön Va Kin
1 Ivaꞌih, a pusun in a ma soe nöꞌ to heꞌ varuꞌ a neöm. Ka teꞌ me e no pa Teꞌ Susun po Teꞌ Ësës Heꞌ vëh to ihoꞌ non pa papmatö pa ö ihihoꞌ vasioꞌ pe Sosoenën. 2 A teꞌ ësës heꞌ pea e Ieesuꞌ, to kiu non pa ö vivihan teꞌteꞌ pe Sosoenën, no a hikta teꞌ to nok voh.
3 O teꞌ susun po teꞌ ësës heꞌ to teꞌ ne pa heꞌ a ma heꞌ me a ës ke na e Sosoenën o vönaꞌ. Ka Teꞌ Susun po Teꞌ Ësës Heꞌ pea e Ieesuꞌ, to teꞌ me e non po heꞌ neꞌ se heꞌ na e Sosoenën, o heꞌ pamëh, ivëh eꞌeꞌ koman. 4 Ivëh, keꞌ se keh teꞌ voh non po oeh, eꞌ hikta se teꞌ voh non a teꞌ ësës heꞌ manih po oeh. Suk ataeah, o teꞌ ësës heꞌ manih po oeh to heꞌ vahik voh ee na pa ma heꞌ to vatet ne a kiu po teꞌ ësës heꞌ varih o Livaë. 5 A iuun teꞌteꞌ vah vëh no teꞌ ësës heꞌ to kiu ne koman, to vëknöm non a iuun vivihan teꞌteꞌ pe Sosoenën manuh pa vöön va kin. Eꞌ to vatoe akuk va kov e non manih pa ö ne Mosës to ekeok vavoh non a ö teꞌteꞌ pe Sosoenën, vamanih pa ö ne Sosoenën to vataare voh ke poan, pareꞌ soe pan,
“Eën se eok suk a ö nöꞌ to vataare vavoh ka oah manuh kin pa tope.” Eks 25:40
6 Ivëhkëk, a kiu pa teꞌ ësës heꞌ ne Ieesuꞌ to kon voh, to apuh oah e non pa ma meh teꞌ ësës heꞌ, me eꞌ a teꞌ vatopnin. Eꞌ to teꞌ akuk va kov e non manih po vatompoan voon neꞌ to nok topnin e Sosoenën me a napan peꞌ. Suk ataeah, a ma soe vaman vakuru ne Sosoenën to heꞌ, kee teꞌ vavih oah e ne pa ma teꞌ vamomoaan.
7 O vatompoan vamoaan pe Sosoenën me a napan se keh teꞌ onöt voh e non pa vahik a ma hat pa napan, e Sosoenën hikta se iu hah non to meoh vatompoan. 8 Ivëh, ke Sosoenën taum voh a ma hat manih pa napan peꞌ, pareꞌ soe voh pan,
“Amot nöꞌ se nö maꞌ,
ko nok o vatompoan voon me ra napan to teꞌ ne pa muhin va Israël,
me o vuteꞌ pe Judaꞌ.
9 O vatompoan pamëh hikta se teꞌ va non manih po teꞌ voh pa kën sipuiire.
Manih pa koreneoꞌ, nöꞌ to me tavus këh maꞌ raoe pa muhin va Isip.
Eꞌe to hikta matop voh ne o vatompoan möm to nok voh.
Ivëh, nöꞌ to heꞌ tonun suk voh raoe.
10 O vatompoan nöꞌ se nok me a napan va Israël ivëh,
eöꞌ se vateꞌ a taateꞌ peöꞌ manih po kokoman pee,
paröꞌ kiun eah manih pa komëëre,
kee se pënton a soe, ko vatet a taateꞌ peöꞌ,
eöꞌ se teꞌ noꞌ e Sosoenën pee,
kee se teꞌ ne a napan peöꞌ.
11 Ahikta paeh va pee se vavaasis non o upöm pee,
suk ataeah ee se nat e ne peöꞌ,
taneo no maꞌ po koaꞌ,
ko öök no maꞌ pa nap apaꞌpuh.
12 Eöꞌ se ururuan a ma taateꞌ hat pee,
paröꞌ ihan anoe eoꞌ pa ma hat pee.” Jer 31:31-34
13 E Sosoenën to vavaato suk non o vatompoan voon, pareꞌ soe pan, “O vatompoan vamoaan no a napan to hikta matop voh ne.” Ivëh, ke Sosoenën soe pan, o vatompoan pamëh to vamoaan ko se hik en.