JEMS
Jems ami sukon dolsa kaata ko
Yesus tam abiil tikiin unaya, bii, wasital almi-kup 20 ema yak banipya, Yesus ami niing Jems ayo sukon kalawaali dola kulaaya din Juda kayaak unang tunum Kristen kelip sak fun-taba umbilin abip ma ma bom-bilip kawu unsu. Jems ali Jerusalam kawu bomdaya, Kristen unang tunum alik iyo tiin mo-bisa. Sukon ayo dola kuyila bokoya ko: Tunum kawanta Yesus ami lak duubi no, kala. Lale, Yesus ami kukup tangbal ayo ma kutal-fukulin disa kela namti, ali kasen-fakaba kemin, ipni Yesus ami lak duu-laamin uyo utafii-bamdiwa, tambal-kup Yesus ami lak kaa duulin o, kala Jems ata sukon kulaaya, din Kristen sekela yang abip ma ma unaasip imi bokoyinsa ko.
1
1 Nak-tunum kusal kaa tiinsip o? Jems, nali God so, Kamokim Yesus Kraist so, alim imi okok-kemin tunum nita sukon kala dola-lomdi Israel tunum miit talangkal iltipni abip tituun kelalip, yak aba bilin abip ma ma unaasip ipni weng umuuyon o, kala-lomdila ko.
Mafek mafek mafak tal yam-kuku-lomdu numi uktaayu titil-fokolokomup kaami sang kaata ko
1Kor 10:12-13, Kol 1:11-12, Jems 5:9-11, 1Pit 1:3-9, 2:18-21, Rev 13:10, 14:12
2-3 Nimi nak-tunum kusal Kristen kipyo! Nokol utamsup, Mafek mafek uluum tabin iyo tal yam-kukuliwa kawu, nuyo tildak God ami lak duubup uyo titil-fukulum o, kalup namti, titil-fak-daa yakyak unokomup o. Kanolin kanolin mafek mafek uluum tabin iyo tildak ipni diim abamnip namti, ipkal uyo fiyaap duu-bamdiwa yo. 4 Ibi suunkup titil-fak-daa-lomdip balili-kalin kukup uyo fuku-bom um-kukun-una-bilip umbutoop iltipni kukup alik disa keyuluya, God ami kukup tambal uyo uktiiwa-yaamin dinim, atin ti tiknu keyilaya, ibi tambal-kup kelin o, kala-somla ko.
Tunum ami aket fukunin tambal uyo iipnu no kalale, beten kemin kaata ko
1Kor 1:18–2:16, 2Tim 3:15, Jems 3:13-18
5 Kanola ipni tunum ma ami aket fukunin tambal uyo, iipnu no, kala namti, baan ayo God ami dik-daalaya, God ata aket fukunin tambal uyo kolokoma. Kemin, God ami kukaayila-yaaba kaali, im-bak-saanokoma disa. Disa masiim kawu kukaayila-yaaba. 6 Kabi God ami mafek mafek sang dik-daalon o, kalokomap kaali, boko-lomdap: Kaata kup-nokoma ne? kep-nokoma ne? kala aket alep fukunin daa; ti kaata fan tituun kup-nokoma kala kala-lomdapla, dik-daalan o. Ale, kawanta aket alep fukun-bamda dik-daala namti, ali yol ok daang kun diim tap ke, inim ta fufu tal non-bala, ok daang ayo alin-alin tam aba daak aba kem-talebu tap o. 7-8 Tunum aket alep fukunin ami kukup uyo alik fal-siki-lom kaltam-daa, kuu kaldaak-daa-kemin o. Kanuba kaa, tunum, Nayo Aatumen God ami dik-daaliya, nami weng kaa maan tiip-na-lom mafek mafek kup-nokoma no, kaloma ni! Atin ti disa yo.
Tunum mafek mafek soyap so, tunum iiwaan iip kulu ilin so, imi sang kaata ko
Luk 12:16-21, 1Tim 6:17, Jems 2:5
9 Tunum Kristen kesa ayo iip kulu ilin bafinim ila namti, ali utama yi, God ami tiin diim kawu nali win so kesi no, kalalala, fiyaap duumak o. 10 Ale, tunum Kristen kesa ayo mafek mafek soyap kesa namti, ali utamala, God ami tiin diim uyo, Nali win dinim kesi no, kalalala, fiyaap duumak o. Kanola tunum ami taanokoma kaali, as tes ulultap bam-daa-lomdu ilom aluula data-lomdu taan-yaabu ulultap o. 11 Kemin, atan tiltam tabokomu ayo mamin kuyak daa-lomdu as tes ayo data taan-ilom dekela daak aba-lomdu umi dawang uyo mafaka-yaabu ultap o. Tunum mafek mafek soyap akal kanola almi mafek mafek kiita-kup tiin saan-bamda taanokoma no.
Mafek mafek mafak uta taba-lomdu tunum dap-kukumin kaata ko
1Kor 10:1-13, 1Tim 6:6-10, 1Jon 2:15-17
12 Tunum ayo mafek mafek mafak uta taba-lomdu dap-kululula, titil-fak-daa-lomda kanuma namti, ali fiyaap duumak o. Siin kaali, God ayo weng kuka-daa-lomda: Ibi nami aket uyo dukum-kup kup-nip namti, ipni suunkup tiin kawang ilin uyo kuyokomi no, kalase. Kemin, kanola tunum ayo titil-fak-daa-bomda mafek mafek mafak uyo kuu-kayak daka-bamda ila namti, God ayo kaami suunkup tiin kawang ilin uyo kolaya, God so suunkup ilokoma no.
13 Ban wakamin kuuli, God ami sisii dibii-yang banokomu disa; ale, God ali tunum kii sisii imbang daalaya, ban waka-mokomip dinim; kanola mafek mafek mafak uta, tiltam ilomdu tunum ami diim aba-lom sisii dibii yang daalu ban kema namti, ali boko-lomda: God ata sisii nam-bang daalaya, kanubi no, kemin daa ko. 14 Daa! Tunum alami aket fukunin mafak kaata oko-tokola-lom ami ibokolalala, yang ilomda ban wakan-umba no. 15 Kaali man fakamin ultap kemin, unang uyo kumun so kebii, man duu ifa-bulu, yak aba butoop fasuu tunum aalap dukum ke-laaba tap, kanola tunum ayo aket kufolula ban kelon o, kala biile, yang ami ban kela uyo dukum-alomdu dap-mafak-daaluya taanokoma ko.
16 Atin nalmi nak-tunum kusal kipyo! God ali kukup mafak aye, mafek mafek mafak aa, kii ma kukaayila-yaaba nema? Disa! Ti ipkal fanang daatamin! 17 Ali kukup tambal so, mafek mafek tambal iso, kiita-kup kukaayila-yaaba. Kukup tambal, mafek mafek tambal alik iyo disa masiim kukaayin kaata, God ami diim kawu talen-umbu. Le falala-kalin miit kayaak alta-kup kulaala tildaak talen-unbu. Kemin, God ami kukup uyo fal-siki-du-siki-kemin dinim, ale ali am atan tiltam aba tala-buluya, umi mafek mafek sinik mepkan ke-som, batbat ke-som, kemin ultap disa ko. 18 Ali ti almi aket fukunin kaata-kup tituun weng uyo kuyilaya, weng sandupla, ami lak duuluple, ata numi aalap kelaya, ami tiin diim ayo win so ke-lomdup, tunum miit diildiil ke-sulup o.
Weng, weng san dikiwa unemin kaata ko
Mat 5:22, Rom 2:13, Kol 3:8
19-20 Nalami nak-tunum kusal kipyo! Ibi dotu weng selin! Ibi abiltap weng bakamin daa; duluum-alom kap-tunum kusal imi weng uyo alik weng san-somdiwa yo. Tunum kaami aket atul ke-lokoma kaa dong dokolala, God ami kukup tambal kaa kuluu-lom titil-fokolokoma dinim; kemin, ibi abiltap-siik aket atul tabemin daa yo.
21 Kemin, kanola kukup mafak mafak ninak tiinsu kukup kaata yaapkan ipni aket tem kabaku bom-bilip iyo kanum-laabip kemin, kelaliwa yo, kala-somla ko. God ami weng kaata, ipni sinik iyo yim-tama tam God ami miit tem daalama kemin, ibi bilili kala-lomdip God ami weng kuyak ipni aket tem daayila bombu kuuli, dotu fuku-bom ilin o, kala-somla ko.
22 Ibi aket bam-daalin! God ami weng uyo disa kulu weng san ale, ti tiknin o, kemin disa; dotu weng san-kaa-bam ale nuumalip ko. 23 Tunum ali God ami weng uyo weng san-kaama. Katale, titil-fak-daalin dinim ke-lomda, disa kulu weng san-kaama namti, kaa tunum ami oktit kuluu-lomda tiyak daa almi tiin matum atafiiba ultap. 24 Kemin, almi tiin matum ayo tiyak daa utam kela tal-une-bamda asuk abiltap ami tiin matum utama kaami aket uyo lokolu le, aket uyo asuk fukunokoma dinim. 25 Kanola, tunum ma God ami weng miit o, kala lo kaami miit uyo dotu utafii-bam ale, weng disa weng san-kaamin daa; weng san-ilomda, kutal-fukula namti, kaali titil-foko-bom-balaya, God ata taba-lomda dong dokolala, fiyaap-kup duu-bamda ilokoma. God ami lo uyo atin ti tambal kemin, tunum unang kukup mafak ta sok de-yim-tiisu iyo weng seliwa, Faneng u, kala God ami lak duulipla, tildaa yim-baala tangbal-kup unen-umbip o.
26 Kanola tunum ali ma aket fukun-ilomda: Nali Kristen tambal aa, nali ti fan, God ami lotu kamaala-yaabi no kalokoma. Lale, ami weng uyo talalu aket fukun-bamda bokolokoma disa; ap-tunum kusal imi itafiimin weng baka-bamdala, nali yaap kepnula, tambal-kup kanubi no, kalokoma. Yale, ami aket fukunin kaa mafak kemin kaami God ami lak dakaamin ami lotu kemin so kula disa yo.
27 Aatumen God ayo kalok nolin tunum kaata atama yi, Kaali atin fan Kristen kesa kala kalokoma ni? Kulaa ye? Man bon aye, unang kaluun aa, iyo fiit-bam tal-unebip iyo dong dakaya-tal-une-bamda, kukup mafak taba-lomdu dap-mafak-daalon o, kalbu uyo akal titil-foko tituun-kup ke-bam ilin tunum ata te!