10
Ema Farisi nodi lia sasa feen-laꞌen atu nahonu Yesus
(Mateus 19:1-12; Lukas 16:18)
1 Hotu, Yesus no Niakaan maktuir sia baa rai Yudea no rai seluk sia iha mota Yordan lorosaꞌe. Iha nia ema waꞌin moos mai baa Yesus. Hotu, Nia nanorin sia nuꞌu wai-wain.
2 Iha nia moos, noo ema Farisi naꞌin hira. Sia mai atu talik nahonu Yesus. Sia nusu baa Nia naꞌak, “Tuir itakaan ukun-badu, kalo mane ida no feen tiꞌan, nia bele soe feen ka lale?”
3 Rona nola nunia, Yesus nataa naꞌak, “Hanoin diꞌa-diꞌak lai! Ukun-badu feen-laꞌen mak Bei Musa rai nela baa ita naꞌak saa?”
4 Sia nataa naꞌak, “Bei Musa ukun-badu nia naꞌak, ‘Laꞌen bele soe feen, surak foo uluk hakerek soe malu baa feen.’ ”✡ Hanoin Hikar Dalan Moris 24:1-4; Mateus 5:31
5 Yesus moos nataa nikar naꞌak, “Tan emi ulun fatuk, foin bei Musa nakerek nela tiꞌan nunia. 6 Mais keta haluꞌa lia hori uluk fohon, baa oras Naꞌi Maromak naseꞌi laleꞌan no raiklaran. Lia nia naꞌak,
‘Naꞌi Maromak naseꞌi ema, feto no mane.✡ Lia Uluk Fohon 1:27, 5:2
7 Tan lia nia, mane musti laꞌo nela inan-aman
atu moris neon ida, laran ida no feen,
8 tan sia rua dadi mesak tiꞌan.’✡ Lia Uluk Fohon 2:24
9 Naꞌi Maromak duꞌuk mak kesi namutuk sia rua tiꞌan. Ema la bele sasa faꞌe ona!”
10 Nunia hotu, Yesus no Niakaan maktuir sia mesan tama baa uma ida. Iha nia maktuir sia nusu nebee Yesus katak nalore hanorin ohin nia baa sia.
11 Nia katak naꞌak, “Mane mak soe feen, hotu nola tenik feto, mane nia nakur biti-kluni. 12 Feto moos nunia! Feto mak soe laꞌen, hotu nola tenik mane, feto nia moos nakur biti-kluni.”✡ Mateus 5:32; 1 Korintus 7:10-11
Yesus foo matak-malirin baa lawarik sia
(Mateus 19:13-15; Lukas 18:15-17)
13 Baa loron ida, ema nodi siakaan oan sia baa Yesus. Sia nusu Yesus rai liman baa lawarik sia, nebee simu matak-malirin. Mais Yesus Niakaan maktuir sia saseni ema nia sia.
14 Naree nunia, Yesus krakat baa maktuir sia naꞌak, “Habusik lawarik sia mai baa Haꞌu! Keta saseni sia! Tan ema oin nunia sia, mak Naꞌi Maromak eman. 15 Rona, tan Haꞌukaan dalen neꞌe, tebes no loos! Ema mak nakara dadi baa Naꞌi Maromak eman, nia musti nakriꞌit aan baa Naꞌi Maromak hanesan lawarik oan nakriꞌit aan baa inan-aman. Kalo lale, ema nia la fatan dadi baa Naꞌi Maromak eman.”✡ Mateus 18:3 16 Hotu, Yesus nakoꞌak nola lawarik nia sia. Nia rai liman baa sia ida-idak, nodi foo matak-malirin baa sia.
Maksoin ida buka dalan atu moris nima-nimak no Naꞌi Maromak
(Mateus 19:16-30; Lukas 18:18-30)
17 Baa oras Yesus sia atu laꞌo, ema maksoin ida nalai mai nasoru sia. Nia nakniꞌa baa Yesus nodi nusu naꞌak, “Ama Boot! Ama Boot neꞌe, ema diꞌak. Tan baa nia, haꞌu kusu Ama nanorin lia ida baa haꞌu. Lia nia nuneꞌe, Ama Boot. Haꞌu kmusti kalo saa, nebee katene malorek kaꞌak haꞌu kbele tama laleꞌan atu moris kamutuk ko Naꞌi Maromak?”
18 Yesus moos nataa naꞌak, “Tan saa o temi Haꞌu maꞌak ema diꞌak? La no ema ida mak diꞌak. Naꞌi Maromak mesan dei mak diꞌak. 19 O matene tiꞌan Naꞌi Maromak ukun naꞌak:
‘Keta hoꞌo ema;
Keta hakur biti-kluni;
Keta hanaꞌo;
Keta hataa hodi lia tolek;
Keta beꞌur ema hodi hola siakaan sa-saa;
No ita musti hakneter itakaan inan-aman.’ ”✡ Ema Israꞌel Sai Nosi Mesir 20:12-16; Hanoin Hikar Dalan Moris 5:16-20
20 Hotu, ema nia nataa naꞌak, “Tebes, Ama Boot! Haꞌu kalo tuir tiꞌan ukun nia sia hotu-hotu hori sei kiꞌik.”
21 Rona nola nunia, Yesus nadomi ema nia. Nia katak naꞌak, “Kona! Mais sei no lia ida tenik. O musti fila, baa faꞌan mohu okaan sasoin sia. Hotu, faꞌe osan nia baa ema kiꞌik no ema susar sia, foin fila mikar mai tuir Haꞌu. Nosi ikus, Naꞌi Maromak nanis foo seluk sasoin baa o iha laleꞌan.”
22 Rona nola Yesus dale nunia, ema nia neon dodok. Hotu, nia fila nodi neon susar loos, tan nia soi toꞌo.
23 Hotu, Yesus titu Niakaan maktuir sia baa-mai nodi katak naꞌak, “Rona! Kalo maksoin ida nakara tama baa laleꞌan atu dadi Naꞌi Maromak eman, lia nia kole basuk.”
24 Rona nola nunia, maktuir sia moos benar. Mais, Yesus katak nalore tenik naꞌak, “Rona diꞌa-diꞌak! Dadi Naꞌi Maromak eman, kole basuk! Keta hanoin haꞌak lia nia maus! 25 Lia hatetek nudaar kuda unta ida kole basuk tama lalutuk tuir daun kuak. Kole liu tenik, maksoin ida tama baa laleꞌan dadi Naꞌi Maromak eman.”
26 Lia hatetek nia nalo maktuir sia hetak benar. Hotu, sia nusu tenik naꞌak, “Kalo kole basuk nunia, see mak bele netan moris?”
27 Yesus titu baa sia ida-idak nodi katak naꞌak, “Kalo ema raiklaran mak nalo, nanis la bele. Mais, kalo Naꞌi Maromak mak nalo, nanis hotu-hotu bele!”
28 Hotu, Petrus foti lia naꞌak, “Ama! Ami laꞌo hela tiꞌan amikaan sasoin sia hotu-hotu atu tuir Ita Boot. Mais, ami hetan saa?”
29-30 Yesus nataa naꞌak, “Rona mai Petrus! Haꞌukaan dalen neꞌe, tebes no loos! Kalo ema ida laꞌo nela niakaan inan-aman, maun-biin-alin, niakaan oan, niakaan toꞌos, niakaan serwisu, niakaan uma laran isin hotu-hotu, tan tuir Haꞌu nodi keke lema Naꞌi Maromak Manfatin Diꞌak, ema nia nanis simu nikar isin atus ida. Hotu-hotu mak nia laꞌo nela nia, nia simu nikar liu tan tenik. Ema nanis nasusar nia, tan tuir Haꞌu. Mais, baa oras rai falu fila, nia netan moris nima-nimak no Naꞌi Maromak. 31 Hanoin diꞌa-diꞌak! Ema mak naksaꞌek aan dadi ema boot, nosi ikus Naꞌi Maromak nafoli nia naꞌak, ema kiꞌik. Ema mak naraik aan hanesan ema kiꞌik, nosi ikus Naꞌi Maromak nafoli nia naꞌak, ema boot.”* Hakerek Moon tuir lia Yunani naꞌak, “Ema mak uluk baa oras neꞌe, atu dadi baa ikus. Ema mak ikus baa oras neꞌe, atu dadi baa uluk.” Tuir siakaan lia Yunani, “ema uluk” naꞌak “ema boot”. “Ema ikus” naꞌak “ema kiꞌik”. Leno no Mateus 20:16; Lukas 13:30.
Dala tolu ona Yesus katak kedan lia Niakaan susar no mate
(Mateus 20:17-19; Lukas 18:31-34)
32 Hotu, Yesus no Niakaan maktuir ema naꞌin sanulu resin rua no ema seluk sia baa kota Yerusalem. Yesus laꞌo nosi oin. Naree nunia, Niakaan maktuir sia benar no nataꞌuk, tan nanoin nola lia mak uluk Yesus katak naꞌak, ema atu noꞌo Nia iha Yerusalem. Yesus natene nola sia nataꞌuk nunia, Nia bolu nola maktuir sia mesan, hotu Nia katak nalore lia saa mak ema atu nalo baa Nia iha Yerusalem. 33 Nia katak naꞌak, “Rona! Oras neꞌe, ita baa Yerusalem ona! Iha nia ema atu faꞌan Haꞌu, mak Ema Raiklaran Isin neꞌe. Hotu, sia latan Haꞌu baa naꞌilulik ulun sia no manorik ukun sia. Hotu, sia taa ukun mate baa Haꞌu. Sia moos latan Haꞌu baa ema seluk sia mak la natene Maromak. 34 Hotu, sia dale namoe Haꞌu, soe kaban baa Haꞌu, no noꞌat nadodok Haꞌukaan isin. Hotu, sia noꞌo Haꞌu. Haꞌu nanis mate. Mais baa wainrua, Haꞌu kmoris kikar.”
Yakobus no Yohanis nusu atu dadi ema boot
(Mateus 20:20-28)
35 Yesus dale notu nunia, Sebadeus oan Yakobus no Yohanis nareꞌis aan baa Yesus, hotu nusu naꞌak, “Ama Boot! Ami atu husu oan ida.”
36 Yesus moos nusu sia naꞌak, “Emi hakara saa?”
37 Sia nataa naꞌak, “Nuneꞌe Ama Boot! Nosi ikus, kalo Ama Boot nabesi aan tiꞌan nodi kaer ukun, ami haloon nebee Ama bele foo fatik bodik ami rua neꞌe. Ida iha Ama sorin kwana, ida tenik iha sorin karuk, nebee ami rua moos bele tuir kaer ukun.”
38 Rona nola nunia, Yesus nataa naꞌak, “Emi la hatene saa mak emi husu! Haꞌu atu ketan susar waꞌin. Dadi, hanoin diꞌa-diꞌak lai. Emi bele terus susar toꞌo mate hamutuk ho Haꞌu ka lale?”✡ Lukas 12:50
39 Sia moos nataa naꞌak, “Bele basuk Ama!”
Hotu, Yesus nataa tenik naꞌak, “Tebes! La kleur ona, emi moos atu hatiu susar hanesan Haꞌu. 40 Mais, see mak tuur iha Haꞌukaan sorin kwana no karuk, lia nia lahoos Haꞌu mak kakotu. Naꞌi Maromak duꞌuk mak nakotu tiꞌan se-see mak tuur iha fatik nia.”
41 Baa oras Yesus Niakaan maktuir sanulu rumak sia rona nola Yakobus no Yohanis nusu nunia, sia moos krakat. 42 Hotu, Yesus bolu nola maktuir sia hotu-hotu, nodi katak nalore naꞌak, “Emi hatene tiꞌan haꞌak, liurai mak kaer ukun iha raiklaran, sia tonan siakaan renun, toꞌo la nakfodak. Ema boot nosi klubun mak la natene Naꞌi Maromak moos, foo ukun liu kladik, toꞌo renu la bele foti ulun. 43 Mais, emi la bele halo nunia! Tan see mak nakara dadi ema boot, nia musti dadi ema kiꞌik nodi naliku ema seluk.✡ Lukas 22:25-26 44 See mak nakara dadi ulun, nia musti dadi ata.✡ Mateus 23:11; Markus 9:35; Lukas 22:26 45 Haꞌu mak Ema Raiklaran Isin neꞌe moos kalo nunia. Haꞌu kmai, lahoos atu buka ema naliku Haꞌu. Mais Haꞌu kmai atu kaliku ema, kodi latan Haꞌukaan moris tomak nebee sori ema waꞌin nosi siakaan salan.”
Yesus nadiꞌak nola ema delek ida
(Mateus 20:29-34; Lukas 18:35-43)
46 Hotu, Yesus no Niakaan maktuir sia no ema waꞌin nia sia, toꞌo Yeriko. Baa oras sia atu laꞌo liu, noo ema delek ida noꞌi tuur iha dalan tehen nodi nadidu. Ema nia, naran Bartimeus. Aman, naran Timeus. 47 Oras Bartimeus rona naꞌak ema mak laꞌo liu nia, Yesus nosi Nasaret, nia nahii makaꞌas naꞌak, “Yesus! Naꞌi Daud husar-binan! Madomi haꞌu lai!”
48 Rona nahii nunia, ema krakat nodi deꞌan nia naꞌak, “Hoi! Noo-nook!”
Mais Bartimeus nahii makaꞌas tenik naꞌak, “Yesus! Naꞌi Daud husar-binan! Madomi haꞌu lai!”
49 Rona nola nunia, Yesus moos nanawa, hotu naruka ema nia sia naꞌak, “Hodi nia mai!”
Sia moos baa katak baa delek nia naꞌak, “Neon diꞌak baa ona, tan Ama Boot bolu o. Mai ona!”
50 Rona nola nunia, Bartimeus nariik, soe nela kedan niakaan tais, baa nasoru Yesus.
51 Hotu, Yesus nusu nia naꞌak, “O makara saa?”
Nia nataa naꞌak, “Ama Boot! Haꞌu kusu nebee bele karee!”
52 Yesus moos katak naꞌak, “Diꞌak. Tan o fiar maꞌak Haꞌu kbele kadiꞌak kola o, oras neꞌe moos, o diꞌak kedan! Fila ona!”
Baa oras nia moos, Bartimeus matan moon kedas. Hotu, nia tuir Yesus.
✡10:4 Hanoin Hikar Dalan Moris 24:1-4; Mateus 5:31
✡10:6 Lia Uluk Fohon 1:27, 5:2
✡10:12 Mateus 5:32; 1 Korintus 7:10-11
✡10:19 Ema Israꞌel Sai Nosi Mesir 20:12-16; Hanoin Hikar Dalan Moris 5:16-20
*10:31 Hakerek Moon tuir lia Yunani naꞌak, “Ema mak uluk baa oras neꞌe, atu dadi baa ikus. Ema mak ikus baa oras neꞌe, atu dadi baa uluk.” Tuir siakaan lia Yunani, “ema uluk” naꞌak “ema boot”. “Ema ikus” naꞌak “ema kiꞌik”. Leno no Mateus 20:16; Lukas 13:30.
✡10:44 Mateus 23:11; Markus 9:35; Lukas 22:26