35
Yakob sia nalai baa Betel
1 Hotu, Maromak katak baa Yakob naꞌak, “Haꞌu neꞌe, Maromak mak natadu aan baa o, baa oras o malai mosi okaan maun Esau. Oras neꞌe, lori baa Betel ona. Toꞌo nebaa, mariik taroman bodik Haꞌu. Hotu, tuur iha nia.”
2-3 Tan lia nia, Yakob katak baa niakaan ema uma laran sia naꞌak, “Oras neꞌe, ita lori baa Betel. Uluk, oras haꞌu iha susar laran, Maromak tulun haꞌu iha nia. Haꞌu kakara kariik taroman ida iha nia. Tan baa nia, emi musti soe emikaan aiꞌoi lulik sia hotu-hotu. Hamoos isin lolon, foin seluk tais, tan ita atu loꞌu-sudur baa Maromak.” 4 Rona nola nunia, Yakob ema uma laran sia moos latan kedan siakaan aiꞌoi lulik no karabu sia hotu-hotu.* Yakob naruka soe siakaan karabu, tan noo ilas aiꞌoi lulik iha karabu nia sia. Hotu, Yakob nakoi naha nia sia iha ai huun boot ida ohak kreꞌis leo Sikem. 5 Oras Yakob sia laꞌo lolok nosi Sikem, Maromak nalo nataꞌuk ema iha rai nia, toꞌo sia la naksakar aan nalo aat baa Yakob sia.
6 Hodi nunia, Yakob no niakaan ema sia, laꞌo no dame toꞌo leo Betel (mak uluk naran ‘Lus’) iha rai Kanaꞌan. 7 Toꞌo nia, Yakob nariik taroman. Nia nanaran fatin nia El Betel, tan lia isin naꞌak, ‘Maromak iha Betel’. Uluk Maromak natadu aan baa Yakob iha nia, baa oras nia nalai nosi maun.
8 Kreꞌis leo Betel, no ai huun boot ida naran Alon Bakut. Lia isin naꞌak, ‘ai tanis hadeꞌun aan’. Ai naran nunia, tan Ribka inan haliku naran Debora, mate, hotu sia nakoi nia iha ai nia ohak.
9 Yakob fila nikar nosi Padan-Aram, Maromak natadu aan tenik nodi natuun matak-malirin baa nia 10 naꞌak, “Nahuu baa oras neꞌe, okaan naran lahoos Yakob tenik. Haꞌu ktau naran foun baa o kaꞌak, Israꞌel.† Naran ‘Israꞌel’ neꞌe naꞌak, ‘nakteꞌur no Maromak’. 11 Haꞌu neꞌe, Maromak mak Beran Kaliuk. O atu metan husar-binan waꞌin lear! Ema klubun sia atu mosu mai nosi okaan husar-binan. O moos mahoris naꞌin lear. 12 Rai mak Haꞌu klatan baa okaan bei Abraham no okaan aman Isak nia, oras neꞌe Haꞌu klatan baa o mo okaan husar-binan sia.”
13-14 Rona notu nunia, Yakob nariik fatuk ida iha fatin nia, dadi tadak ida, nebee nodi nanoin Maromak mamenon. Nia fui kedan anggor ween no mina morin iha fatuk nia leten, nodi loꞌu-sudur baa Maromak. 15 Yakob nanaran fatin nia, Betel.
Yakob feen Rahel mate nahoris
16 Hotu, Yakob sia laꞌo nela Betel. Oras nia Rahel koꞌus. Oras sia sei dook nosi leo Efrata (mak oras neꞌe, ema temi naꞌak Betlehem), Rahel loron nahoris moos toꞌo mai. Mais nia nahoris susar, 17 toꞌo makaer mii katak baa nia naꞌak, “Ina Rahel! Makbiit neon! Ina netan oan mane ida tenik!” 18 Masik Rahel nawan kreꞌis atu kotu moos, nia sei tau nela naran baa oa nia naꞌak, Ben-Oni (tan ben-oni lia isin naꞌak ‘oa susar’). Hotu, nawan moos kotu. Mais Yakob nanaran oan nia, Benyamin (tan benyamin lia isin naꞌak ‘oa liman kwana’).
19 Hotu, sia nakoi Rahel iha dalan tehen baa Efrata (mak oras neꞌe, ema temi naꞌak Betlehem). 20 Nakoi tiꞌan, Yakob nariik fatuk rate ida iha nia. Toꞌo oras neꞌe moos, Rahel niakaan fatuk rate nia sei nafati.
Yakob oan sia
21 Nunia hotu, Yakob‡ Hakerek Moon lia Ibrani naꞌak, ‘Israꞌel’ iha neꞌe. Naran ‘Israꞌel’ nia, Yakob naran seluk. lori baa-mai bei-beik. Dala ida, nia nariik batane iha tetu Eder sorin. 22 Oras sia nein iha nia, Ruben toba no aman feen kiꞌik, Bilha. Yakob moos natene nola lia nia.
Yakob oan mane sia, naꞌin sanulu resin rua.
23 Lea oan sia, Ruben (mak Yakob oan ulun), Simeon, Lewi, Yahuda, Isaskar no Sebulon.
24 Rahel oan sia, Yusuf no Benyamin.
25 Rahel ata feto Bilha oan sia, Dan no Naftali.
26 Hotu, Lea ata feto Silpa oan sia, Gad no Aser.
Yakob netan oan nia sia iha Padan-Aram.
Yakob aman Isak mate
27 Hotu, Yakob baa naree aman Isak iha Mamre, kreꞌis baa kota Kiriat Arba (mak oras neꞌe naran Hebron). Uluk, niakaan bei Abraham moos nein iha nia. 28-29 Isak moris toꞌo otas tinan atus ida walu nulu, foin mate. Hotu, niakaan oan Esau no Yakob nakoi nia.