1-4 Oa Titus mak diꞌak!

Hakerek neꞌe nosi haꞌu, Paulus, mak Naꞌi Maromak ain-liman no Yesus Kristus klosan. Naꞌi Maromak solok haꞌu atu kaliku ema mak Nia boi atu fiar baa Nia. Nia moos solok haꞌu atu kanorin dalan moris mak loos, nebee Niakaan ema sia bele natene moris tuir Niakaan hakaran. Hodi nunia, sia bele moris namutuk no Nia nima-nimak. Naꞌi Maromak sei la naseꞌi raiklaran neꞌe dauk, Nia nameno tiꞌan atu nalo nunia. Tebes. Nia la naktolek. Toꞌo baa niakaan oras, Nia foo natene naꞌak, Nia nakara sori ema nosi siakaan salan, nebee sia bele moris no Nia nima-nimak. Hotu, Nia naruka haꞌu atu katak Niakaan Manfatin nia bodik ema hotu-hotu.

Titus! Tuir haꞌu, o nuꞌu haꞌukaan oan duꞌuk, tan o mo haꞌu fiar bele-bele baa Kristus. Haꞌu kamulak baa itakaan Ama Maromak no itakaan Maksorin Yesus Kristus, nebee natudu laran diꞌak baa o, nebee o bele moris manek no dame.✡ 2 Korintus 8:23; Galatia 2:3; 2 Timotius 4:10

5 Hori hirak haꞌu klaꞌo kela o iha rai Kreta, nebee o bele babilan mola lia hira iha nia. Nebee o foti ema mak fatan dadi baa sarani ulun iha sura kota. Keta maluꞌa lia lalaꞌok mak haꞌu katak tiꞌan baa o nia, kona baa ema sarani ulun. Lia nuneꞌe: 6 Kalo hakara foti sarani ulun, niakaan moris la bele noo sala. Nia musti moris moon no feen ida. Niakaan oan sia musti fiar baa Yesus Kristus. La bele noo ema mak nasalak naꞌak, niakaan oan sia maktokar no maksakar. 7 Tan sarani ulun nalaꞌok Naꞌi Maromak serwisu, nia musti moris moon. Musti noo naran diꞌak. Keta foti ema mak naksaꞌek aan, mak nawan aat, mak kanarak aat, mak tua lanuk aat, makaat aat, no mak rotus osan. 8 Sarani ulun musti laran maluak. Musti nakara lia diꞌak. Musti moris mamatek. Musti ema mak la kliꞌis sorin baluk. Musti neon moon. Musti natene netu aan. 9 Musti kaer tebe-tebes Maromak Manfatin mak ita hanorin tiꞌan baa sia. Hodi nunia, ema sarani ulun bele natudu Naꞌi Maromak dalan moris loos baa ema seluk, no bele naloos hanorin kaleꞌuk sia.✡ 1 Timotius 3:2-7

10 Ema waꞌin sakar hanorin loos nodi dale lia mak la noo huun-dikin no lia tolek teen. Kaliuk ema Yahudi mak nanorin kaleꞌuk naꞌak, ema hotu-hotu mak nakara moris, musti namane aan. 11 Sia dada nola famili balu sees nosi hanorin loos tiꞌan. Sia beꞌur ema atu buka osan. O musti taka ema nia sia ibun, nebee sia keta nalo nunia ona. 12 Ema Kreta siakaan ema matenek ida katak duꞌuk naꞌak,

13 Tebes! Ema Kreta sia moris nunia tebes. Tan lia nia, o musti dada mola mikar ema mak kona beꞌur sia, nebee makbiit mikar siakaan fiar baa Naꞌi Maromak. 14 Sia keta rona tenik ema Yahudi siakaan lia aikanoik mak la noo folin. Sia keta tuir ema mak soe hanorin loos ona.

15 Manoin diꞌa-diꞌak! Bodik ema neon moon, hotu-hotu moon. Mais bodik ema neon kadoor no ema mak la fiar baa Naꞌi Maromak, la noo kedan lia moon. Tan siakaan laran no kakutak kadoor hotu. 16 Sia katak naꞌak, sia natene Maromak. Mais sia moris nuꞌu la natene Maromak. Sia dale seluk, sia nalo seluk. Sia huun dois. Sia la noꞌuk tuir Naꞌi Maromak hakaran no la natene nalo lia diꞌak.