21
Yohanis nobun laleꞌan no raiklaran foun
1 Hotu, haꞌu ktitu-karee laleꞌan foun no raiklaran foun, tan laleꞌan tuan no raiklaran tuan lakon mohu tiꞌan. Tasi moos la iha tiꞌan.✡ Yesaya 65:17, 66:22; 2 Petrus 3:13 2 Haꞌu moos karee Naꞌi Maromak Niakaan kota tuun nosi laleꞌan. Kota nia, kota moon mak sia temi naꞌak Yerusalem Foun. Kota nia tetuk no nesan tiꞌan, hanesan sasudin feto mak nadiꞌa aan tiꞌan atu simu sasudin mane.✡ Yesaya 52:1; Lia Raiklaran Falu Fila 3:12; Yesaya 61:10 3 Haꞌu moos rona kola lia maliak makaꞌas ida mai nosi habesi aan fatin iha nia naꞌak,
“Mana diꞌa-diꞌak!
Nahuu baa oras neꞌe, Naꞌi Maromak hutun-renun bele tama-sai Niakaan Tofatik.
Nahuu baa loron neꞌe, Naꞌi Maromak eman sia moris namutuk no Nia.
Nia dadi baa siakaan Maromak.
Sia moos dadi baa Niakaan hutun-renun.
Nia atu moris no sia nohuun.
Nia atu nein no sia nohuun.✡ Yeskiel 37:27; Ukun-badu Naꞌilulik 26:11, 12
4 Nia atu noꞌas namara siakaan luun,
hotu sia la tanis ona.
Iha kota nia, moras la iha ona.
Iha kota nia, mate moos la iha ona.
Tan hotu-hotu mak nasusar ema hori uluk, la iha ona.
Tan hotu-hotu mak naloot ema hori uluk, lakon mohu ona.”✡ Yesaya 25:8, 35:10, 65:19
5 Hotu, Nia mak nabesi aan iha nia dale naꞌak, “Mana lai! Haꞌu kalo hotu-hotu foun.” Hotu, Nia dale no haꞌu tenik naꞌak, “Makerek mola lia neꞌe ona! Ema bele fiar Haꞌukaan Manfatin neꞌe, tan Manfatin neꞌe tebes no loos!”
6 Hotu, Nia katak tenik baa haꞌu naꞌak,
“Hotu-hotu mak Haꞌu kameno hori uluk aan, dadi tiꞌan.
Haꞌu neꞌe,
Alfa toꞌo Omega.
Haꞌu neꞌe,
Ulun toꞌo Ikun.
Hotu-hotu huun nosi Haꞌu,
nosi huun toꞌo rohan.
Ema hotu-hotu mak nanroo tan nakara moris,
Haꞌu karoo sia baa wee matan mak foo moris nima-nimak.
Wee nia, Haꞌu kfoo loos dei.✡ Yesaya 55:1
7 Ema hotu-hotu mak tuir Naꞌi Maromak dalan nohuun,
sia atu simu nola
matak-malirin nia.
Tan Haꞌu atu kdadi baa siakaan Maromak,
sia moos atu dadi baa Haꞌukaan oan.✡ 2 Samuel 7:14; Kananuk Sia 89:26-27
8 Mais, ema seluk sia atu kona soe
baa tasi haꞌi fatuk lobot mak laka la nakotu.
Sia mak, ema taꞌuk teen,
ema mak seꞌi kotuk baa Yesus,
ema lisan aat,
ema mahalo lia kfoꞌer,
ema mahoꞌo ema,
ema mak loꞌu-sudur baa aiꞌoi lulik,
ema mak nakneko ema,
no ema tolek teen.
Sia hotu-hotu atu kona kastikar soe baa tasi haꞌi nia.
Kastikar nia naꞌak ‘Mate Dala Rua.’ ”
Yohanis nobun kota Yerusalem foun
9 Hotu, haꞌu ktitu-karee makbukar naꞌin ida nosi makbukar laleꞌan naꞌin hitu mak uluk kaer hanek mahisi Naꞌi Maromak hahibun. Makbukar nia mai nasoru haꞌu nodi dale naꞌak, “Mai neꞌe lai! Haꞌu atu katudu baa o sasudin feto mak atu nalaꞌe Bibi Malae Oan.”
10 Baa oras nia moos, haꞌu kona Maromak Kmalar Lulik. Makbukar laleꞌan nia foti nodi haꞌu baa foho ida mak aas tebes. Iha nia, nia natudu baa haꞌu kota Yerusalem mak tuun mai nosi laleꞌan. Kota nia, Naꞌi Maromak Niakaan kota lulik.✡ Yeskiel 40:2 11 Kota nia, kabaas kaliuk. Noo sinak mak tubu sai nosi Naꞌi Maromak ahar boot, toꞌo naroma kota nia tomak. Sinak nia, hanesan fatuk mahoo matan molen. 12 Noo lutu fatuk aas boot mak satan nola kota nia, no odamatan nanokar sanulu resin rua. Noo makbukar laleꞌan naꞌin sanulu resin rua mak daka odamatan nia sia. Iha odamatan ida-idak leten, noo hakerek naran nosi ema Israꞌel siakaan uma huun sanulu resin rua.* Tuir ema matenek lia Hakerek Moon, nomer sanulu resin rua nia, nomer mak hatete baa ema raiklaran tomak. 13 Odamatan nanokar tolu seꞌi oin baa lorosaꞌe. Tolu seꞌi oin baa loromonu. Tolu baa lorokaras, no tolu tenik baa lorokbelan.✡ Yeskiel 48:30-35 14 Lutu fatuk nia nariik baa tatuur fatuk boot sanulu resin rua. Iha fatuk ida-idak noo hakerek naran nosi Bibi Malae Oan klosan naꞌin sanulu resin rua mak serwisu bodik Nia iha raiklaran.
15 Nunia hotu, makbukar laleꞌan mak dale no haꞌu, kaer nola knoꞌa sasukat mean ida, atu sukat kota no odamatan nanokar no lutu fatuk nia.✡ Yeskiel 40:3 16 Nia sukat uluk kota nia lutu fatuk lidun haat. Niakaan naruk no belar no aas, hotu-hotu manesak. Neꞌe mak, kilo rihun rua atus rua, rua nulu.† Hakerek Moon lia Yunani naꞌak ‘stadia rihun sanulu resin rua.’ 17 Hotu, nia sukat lutu nia maꞌar, kona roꞌa neen nulu resin lima, tuir ema raiklaran sasukat.‡ Hakerek Moon lia Yunani naꞌak ‘hasta atus ida haat nulu resin haat.’ Tuir ema matenek lia Hakerek Moon, nomer nia hatete baa Naꞌi Maromak eman hotu-hotu. 18 Lutu nia, halo hosi fatuk mahoo matan. Hotu-hotu mak iha kota nia laran moos, halo hosi mean isin mak molen hanesan lalenok.
19 Tatuur fatuk sanulu resin rua nia moos, halo hosi fatuk mahoo matan oi-oik. Fatuk nia sia folin todan. Fatuk nomer ida, fatuk lakan ilas matak, naran fatuk yaspis. Nomer rua, fatuk lakan ilas flahuk, naran fatuk nilam. Nomer tolu, fatuk lakan mean, naran fatuk mirah. Nomer haat, fatuk lakan ilas matak, naran fatuk zamrud. 20 Nomer lima, fatuk mak ilas mean no mutin mak kraan malu, naran fatuk unam. Nomer neen, fatuk mak lakan ilas mean, naran fatuk sardius. Nomer hitu, fatuk mak lakan ilas modok mean, naran fatuk ratna cempaka. Nomer walu, fatuk mak lakan ilas flahuk matak, naran fatuk beril. Nomer siwi, fatuk mak lakan modok, naran fatuk krisolit. Nomer sanulu, fatuk mak lakan matak nurak, naran fatuk krisopras. Nomer sanulu resin ida, fatuk mak lakan flahuk tasi ween, naran fatuk lazuardi. Nomer sanulu resin rua, fatuk mak lakan mean asuaten, naran fatuk kecubung. 21 Nunia moos, odamatan nanokar sanulu resin rua nia, halo hosi morteen lolon sanulu resin rua. Odamatan ida halo hosi morteen lolon ida. Kota nia dalan sia moos, halo hosi mean isin mak naksinak hanesan lalenok.✡ Yesaya 54:11-12
22 Mais haꞌu karee, iha kota nia la noo Uma Hamulak, tan ema loꞌu kedan tiꞌan baa Naꞌi Maromak mak beran kaliuk no Bibi Malae Oan. 23 Loro no fulan moos la naroma iha nia, tan Naꞌi Maromak ahar mak naroma kota nia. Bibi Malae Oan ahar moos naroma.✡ Yesaya 60:19-20 24 Ema nosi klubun hotu-hotu iha raiklaran laꞌo iha kroman nia laran. Naꞌi raiklaran sia moos nodi siakaan sasoin kabaas baa kota nia.✡ Yesaya 60:3 25 Iha nia, kalan la iha ona. Tan baa nia, sia la taka kota odamatan nanokar. 26 Kabaas hotu-hotu no kneter hotu-hotu nosi rai hotu-hotu iha raiklaran noo hotu iha kota nia.✡ Yesaya 60:11 27 Mak la bele tama iha nia, aꞌaat hotu-hotu. Nuꞌu ema mak loꞌu-sudur baa aiꞌoi lulik, ema mahalo lia kfoꞌer, no ema tolek teen. Mak bele tama, ema mak naran noo iha Bibi Male Oan hakerek dei. Tan hakerek nia noo ema naran mak bele moris nima-nimak no Naꞌi Maromak.✡ Yesaya 52:1; Yeskiel 44:9
✡21:1 Yesaya 65:17, 66:22; 2 Petrus 3:13
✡21:2 Yesaya 52:1; Lia Raiklaran Falu Fila 3:12; Yesaya 61:10
✡21:3 Yeskiel 37:27; Ukun-badu Naꞌilulik 26:11, 12
✡21:4 Yesaya 25:8, 35:10, 65:19
✡21:6 Yesaya 55:1
✡21:7 2 Samuel 7:14; Kananuk Sia 89:26-27
✡21:10 Yeskiel 40:2
*21:12 Tuir ema matenek lia Hakerek Moon, nomer sanulu resin rua nia, nomer mak hatete baa ema raiklaran tomak.
✡21:13 Yeskiel 48:30-35
✡21:15 Yeskiel 40:3
†21:16 Hakerek Moon lia Yunani naꞌak ‘stadia rihun sanulu resin rua.’
‡21:17 Hakerek Moon lia Yunani naꞌak ‘hasta atus ida haat nulu resin haat.’ Tuir ema matenek lia Hakerek Moon, nomer nia hatete baa Naꞌi Maromak eman hotu-hotu.
✡21:21 Yesaya 54:11-12
✡21:23 Yesaya 60:19-20
✡21:24 Yesaya 60:3
✡21:26 Yesaya 60:11
✡21:27 Yesaya 52:1; Yeskiel 44:9