15
Yohanis naree laleꞌan isin
1 Hotu, haꞌu ktitu-karee lia kasalak ida iha laleꞌan mak nalo haꞌu kblaar tebes. Noo makbukar laleꞌan hitu. Ida-idak kaer beran atu solok dinu baa raiklaran. Dinu hitu nia, dinu ikus. Kalo dinu nia sia dadi tiꞌan, lia nia naꞌak Naꞌi Maromak laran malirin tiꞌan. Nia la nahibu ema raiklaran ona.
2 Hotu, haꞌu ktitu-karee tasi mak laka nuꞌu lalenok kahur haꞌi. Haꞌu moos titu-karee ema lear nariik iha tasi nia tehen. Sia nia mak la tuir buat krakat aat nia, no la loꞌu-sudur baa niakaan aiꞌoik, no la simu niakaan marak. Sia hotu-hotu kaer bareka mak sia simu nosi Naꞌi Maromak. 3 Hotu, sia nananu kananuk ida. Uluk Naꞌi Maromak ain-liman Musa nananu kananuk nia, baa oras Naꞌi Maromak nodi Niakaan ema sia sai nosi susar iha rai Mesir. Ema nia sia moos nananu kananuk ida tenik nodi tonu-naboot Naꞌi Yesus. Uluk, ema noꞌo Nia, nuꞌu ema sera bibi malae oan iha Uma Hamulak nodi natetu baa Naꞌi Maromak atu nalirin Niakaan laran. Sia nananu naꞌak,
“Aaa, Ama Maromak!
Ami tonu-haboot Ita Boot!
Ami foti-hahaas Ita Boot!
Tan Ita Boot beran kaliuk.
No Ita Boot makaꞌas kaliuk.
Ita Boot mak kaer ukun baa ema klubun hotu-hotu.
Ita Boot mak Naꞌin bodik ema hunun hotu-hotu.
Ita Boot hahalok, kasalak kaliuk.
Ita Boot serwisu, kabaas tebes.
Ita Boot dalan, loos tebes.
Ita Boot moris, moon kaliuk.✡ Ema Israꞌel Sai Nosi Mesir 15:1-18
4 Ema hotu-hotu foti-nahaas Ita Boot naran.
Ema hotu-hotu tonu-naboot Ita Boot dadiꞌak.
Tan Ita Boot mesan mak moon.
No Ita Boot mesan mak la noo sala.
Ema klubun hotu-hotu atu mai loꞌu-sudur baa Ita Boot.
Ema hunun hotu-hotu atu mai sera dodan baa Ita Boot.
Tan ema hotu-hotu naree tiꞌan Ita Boot hahalok diꞌak.
No ema hotu-hotu natene tiꞌan Ita Boot laran loos.”✡ Yeremia 10:7; Kananuk Sia 86:9
5 Ema nia sia nananu notu, haꞌu ktitu-karee Keꞌan Lulik iha Uma Hamulak iha laleꞌan. Tais odamatan keꞌan nia, nakloke.✡ Ema Israꞌel Sai Nosi Mesir 38:21 6 Haꞌu moos karee makbukar laleꞌan naꞌin hitu mak nodi dinu hitu nia. Sia laꞌo sai nosi Uma Hamulak. Sia tau faru mutin moos mak naksinak, nodi sakat tais hasaan mak soru hosi mean isin. 7 Hotu, haꞌu ktitu-karee buat horis kasalak matan ida nosi buat horis kasalak matan haat mak nariik satan nola Naꞌi Maromak habesi aan fatin nia. Buat nia faꞌe hanek mean hitu, foo baa makbukar laleꞌan naꞌin hitu nia. Hanek hitu nia, ida-idak nahisi kastikar nosi Naꞌi Maromak mak moris hori nima-nimak toꞌo nima-nimak, tan Naꞌi Maromak nadiꞌa aan tiꞌan, atu fakar hahibun baa raiklaran. 8 La kleur, Uma Hamulak nakonu dubun mak tubu nosi Naꞌi Maromak Niakaan makaꞌas no Niakaan kabaas, toꞌo la noo ema ida kois mak bele tama baa Uma Hamulak nia. Makbukar laleꞌan naꞌin hitu nia musti fakar mohu dinu hitu nia baa raiklaran lai, foin ema bele tama baa.✡ Ema Israꞌel Sai Nosi Mesir 40:34; 1 Naꞌi Israꞌel Sia 8:10-11; 2 Lia Rai Israꞌel no Rai Yahuda 5:13-14; Yesaya 6:4