Bbaluwa eghi Paulo aahandiikiiye
Beefeeso
Kwanjula
Efeeso kikaba kili kibugha kiinamu̱li̱to haa mwalo ghwa bughuwa ejooba bwa ehanga endindi bakughilaghamu Bu̱tu̱lu̱ki̱. Paulo akaba naakaayeyo kandi naatebeji̱yeyo kumala myaka esatu (Bikoluwa 19). Bantu bakani̱ye bakaba mbaabaaye Baki̱li̱si̱taayo mu kibugha eki na tau̱ni̱ esikili haai.
Paulo aabahandiikila bbaluwa eni ali mu nkomo e Looma. Aabooleka ngu ebo batali Bayu̱daaya ku̱hi̱ki̱li̱ja Ki̱li̱si̱to, nabo bakaba mu ki̱bbu̱la kya bahi̱ki̱li̱ja. Eki kikaba ki̱twi̱ke kya ntegheka ya Luhanga niikuwo Ki̱li̱si̱to abe Mukama wa bintu byona munsi na mu eghulu.
Mu nsuula 1—3 Paulo asobolooye ngoku Luhanga aakomi̱ye bantu be aabajuna bibhi byabo kusaalila mu kubalungani̱ya na Yesu Ki̱li̱si̱to mu ku̱ku̱wa na ku̱hu̱mbu̱u̱ka kuwe. Du̱mbi̱ mu nsuula 4—6 aalaghila Baki̱li̱si̱taayo ngoku babhonganuuwe kwetwalikani̱ya nga bantu balungaane na Ki̱li̱si̱to.
1
1 Si̱ye Paulo, oghu Luhanga aakomi̱ye mu kubbala kuwe kuba mukwenda wa Ki̱li̱si̱to Yesu, naahandiikila enu̱we bantu baa Luhanga abali Efeeso, beesighibuwa mu Ki̱li̱si̱to Yesu. 2 Luhanga Eseetu̱we na Mukama waatu Yesu Ki̱li̱si̱to babaghilile ngughuma kandi babahe mpempa yonkaha.
Mi̱gi̱sa ya Mwoyo eghi eli mu Ki̱li̱si̱to
3 Luhanga Ese Mukama waatu Yesu Ki̱li̱si̱to asi̱i̱mu̱we, oghu akutuhaagha mi̱gi̱sa yoona ya mwoyo ku̱lu̱gha mu eghulu, kukwama mu Ki̱li̱si̱to. 4 Nanga atakahangi̱ye nsi akaba naasangu̱u̱we atu̱komi̱ye ati tube mu bumui na Ki̱li̱si̱to, niikuwo Luhanga atufoole bantu bahi̱ki̱li̱i̱ye kandi abatali na musango mu maaso ghe. Akatukunda, 5 kandi aasanguwa atu̱komi̱ye kufooka baana be kukwama mu Yesu Ki̱li̱si̱to, eghi niiyo ekaba ntegheka yee kandi eghi aabbali̱ye, 6 Luhanga akakikola niikuwo tumusinde haabwa ngughuma siye sya kuswekani̱ya aatughiliiye busa kukwama mu Yesu Ki̱li̱si̱to oghu aku̱ndi̱ye. 7 Ti̱ Luhanga akatucungula haabwa saghama ya Ki̱li̱si̱to, aatughanila bibhi byatu haabwa ngughuma 8 sihingulaane aamali̱ye aghatughilila haabwa magheji ghe na kumanya bintu byona. 9 Akaleka twamanya ntegheka yee ya nsi̱ta, eghi eenini aabbali̱ye, eghi emu̱dheedhi̱ye kukwama mu Ki̱li̱si̱to. 10 Ntegheka eghi niiyo Luhanga aku̱u̱su̱li̱ya mu bwile obu eenini aboone bu̱hi̱ki̱ye, obu akukumaani̱li̱ya hamui ebi aahangi̱ye byona, bu̱li̱ kintu kyona ekili mu eghulu na munsi kandi Ki̱li̱si̱to aaniiye mukama wabiyo byona.
11 Kusaalila mu Ki̱li̱si̱to oghu, Luhanga akatufoola dhee kuba bantu be kusighikila mu ntegheka aali asangu̱u̱we abbali̱ye kukola, 12 niikuwo etu̱we abaadu̱bhi̱ye kuta kunihila kwatu mu Ki̱li̱si̱to kutujuna, tumusinde haabwa ki̱ti̱i̱ni̱sa kiye. 13 Naanu dhee mukafooka bantu baa Luhanga obu mwaghu̱u̱ye butumuwa bwamajima twabatebi̱i̱je, bwa Makulu Ghasemeeye haa Ki̱li̱si̱to aghaaleki̱ye mwajunuwa. Mukahi̱ki̱li̱ja Ki̱li̱si̱to kandi Luhanga ngoku aalaghi̱i̱sani̱i̱ye aaha enu̱we Mwoyo Ahi̱ki̱li̱i̱ye kwoleka ngoku Luhanga alemi̱ye enu̱we nga bantu be. 14 Mwoyo Ahi̱ki̱li̱i̱ye oghu aaleki̱ye aasa aakala mu bwomi̱i̱li̱ bwatu nkaakulolelʼo ngoku alituha eki Luhanga aalaghi̱i̱sani̱i̱ye bantu be, niikuwo tumanye ngoku aatucunguuye ku̱lu̱gha mu kibhi, kandi tusinde ki̱ti̱i̱ni̱sa kya Luhanga.
Paulo naasabila Beefeeso
15 Haabwa kighendeleluwa eki, ku̱lu̱gha naaghu̱u̱ye ngoku mu̱hi̱ki̱li̱i̱je kwonini Mukama Yesu kandi ngoku mu̱ku̱ndi̱ye bantu baa Luhanga boona, 16 tankulekeelelagha ku̱mu̱si̱i̱ma haabwanu, ti̱ bwile bwona obu nkubaagha ninsaba, nkubaasukagha mbasabila. 17 Nkuukalagha ninsaba nti Luhanga Ese Mukama waatu Yesu Ki̱li̱si̱to, oghu ali na ki̱ti̱i̱ni̱sa kyona, abahe Mwoyo Ahi̱ki̱li̱i̱ye kubaha magheji ghaa kumanya kandi kubasu̱u̱ku̱li̱la kwonini ngoku Luhanga ali. 18 Nkubasabilagha dhee nti Luhanga abagu̱bhi̱i̱si̱ye kumanya majima ghe, niikuwo mumanye mi̱gi̱sa yee ekaniiye kimui ya kuswekani̱ya eghi mukunihila kutunga eghi aabilikiliiye bantu be. 19 Kandi mugubhe kumanya ngoku bu̱toki̱ buwe buli bwamaani̱ munu obukukoonelagha etu̱we abaku̱hi̱ki̱li̱jagha. Bu̱toki̱ bwamaani̱ obu, 20 niibuwo aakoleeseei̱ye mu Ki̱li̱si̱to obu aamu̱hu̱mbu̱u̱ye mu baku̱u̱ye kandi aamusitami̱ya haa luhande lwa mukono ghuwe ghwabuliyo mu eghulu. 21 Nahabweki Ki̱li̱si̱to oghu niiye mu̱lemi̱ wa ki̱ti̱i̱ni̱sa munu oghu alemi̱ye boona abali na bu̱toki̱ mu eghulu na munsi, ki̱ku̱ghi̱yo kiye kya bu̱lemi̱ kisaai̱ye bi̱ku̱ghi̱yo banguha balemi̱ boona, etali mu bwile buni bwonkaha bhaatu dhee mu bwile obuliisa. 22 Ti̱ Luhanga akata bintu byona hansi ya bu̱toki̱ bwa Ki̱li̱si̱to, kandi Ki̱li̱si̱to oghu Luhanga ataayʼo kulema bintu byona oghu, niiye mutuwe ghwatu bahi̱ki̱li̱ja. 23 Tuli bi̱twi̱ke bya mubili ghwa Ki̱li̱si̱to kandi taali nʼeki abu̱lu̱u̱wʼo mu kutughanikiilila kyakukola, nanga ali hantu hoona kandi aku̱hi̱ki̱li̱li̱yagha bintu byona.