1 Na ba꞉ Polote, nale Ya꞉su Kelisoko mabuma꞉ du genamalo emedenamo. Na ba꞉gala a hibima꞉ midipino ekawi Timotiko, ale ba꞉moe leta ama꞉ Pailimonitamo poemema꞉. Hibila, ama꞉ ba꞉ aeno hidonomo lumagila ba꞉gala ama꞉le ago Godokono oko bowatinata. 2 Ba꞉bene la꞉ sose tawakalubi puya꞉te Pailimonikono genamalo da꞉kapiyuiminakoma, ba꞉gala a hibima꞉ midipino naniko A꞉piyako, ba꞉gala Saitanatamo alaholo komo ago kapimilo dododina ba꞉be dubu Akipasiko, ale la꞉ hiliyonomatamo atumu ba꞉moe leta bepoemema꞉. ✡ Kol 4:17; 2Tim 2:3

3 Wadiyala aeno Nabiwi Godoko ba꞉gala Kodawa Ya꞉su Kelisoko, iba꞉te ibino malemale komo ba꞉gala hete komo la꞉tamo nikalama꞉mena꞉ta.

4 Naeno hido lumagi Pailimoni, nale dadikuminakomo ba꞉be Godotamo toetoe tabo ba olamagi amia꞉no komoma꞉ nale kalakala tabo ebetamo adipatenakomo. 5 Iyo, naeno kalakala bitana mabu ama꞉le Godokono tawakalubi hiliyonomo malemalelo demalagidolena ba꞉gala ama꞉le Kodawa Ya꞉suku hibima꞉ midi ipuwalo kodakodalo da꞉la꞉na, nale ba꞉bi netewa komokomo ulihonakomo. 6 Ba꞉bene nale Godoko ba꞉ma ka꞉na toemehonakomo, ama꞉la, ala, ale hibima꞉ midi ipuwalo kapiya tawakalubinomoma꞉ deda꞉hanama꞉, ba꞉be komone ale Kelisoko ipuwalo ba emedena kebe hidohido komo Godogodone duwatenakoma꞉, ama꞉le ba꞉bi hiliyonomo komo hidonomamo kiya꞉tawama꞉. 7 O naeno hidonomo ekawi, ba꞉ hibila, ama꞉ komopi malemalelo ba emalagidolena ibino tepo ipuwoeno menemene ukui da꞉wibuilamelelamenaka, nale ba꞉be komo dulimo naeno hiya꞉hiya꞉ temeteme ipuwalo konomo gelebadi komo ba꞉gala kalakala komo ba꞉bo uwatimo! ✡ 2Kol 7:4

8 Ba꞉bema꞉ a netewapi Kelisoko hibima꞉ midi ipuwalo ba emedena ebeno modobo helote na Pologodolo bitana, iyo, talona kitanaha꞉ nale naeno ubi komo hawakalimiti ama꞉ koamo kiyahamema꞉, ba꞉ma ka꞉na ama꞉le naeno ubi komamo dito kopapamiwatama꞉. 9 Huiyatiya nale ama꞉ malemalelo demalagidolonama, ba꞉bema꞉ ama꞉le naeno ubi komo ododima꞉ nale ama꞉ a꞉kakiyahama꞉mata, ao, na huiyatiya ama꞉ tataba gabodo toemehomata. Ama꞉ numa꞉, na ba꞉ Polote, na kadelema꞉ ba eda꞉na Ya꞉su Kelisoko mabuma꞉ du genamalo emedenamo, ba꞉bema꞉ amia꞉no malemale natamo hibilo ditana, wadiyala ba꞉be komo hawakalimima꞉ ama꞉ ba꞉moe naeno toetoe tabo komamo na꞉papamiwatuya꞉.

10 Ba꞉bema꞉ hopodalagi, nale Onisimasiko* Ba꞉moe Onisimasikono mahiloeno ipuwa nitana ‘Hidohido Komo Ododilidawala.’ Ebete dopamo Pailimonikono huiyaha꞉ okodawama꞉ eda꞉nami, huiyatiya ebete Pailimonitamo da꞉maubuya꞉, ba꞉ba tetelo ebete pilo komo ododiti ebegodone Loma ko habamo ba꞉ dito alahuliya꞉. Ebete ba꞉bolo ba nemede eta hegelalo Polokoba꞉ da꞉naluguya꞉ ebegodone Ya꞉sukunu Hido Tabo uliti hibima꞉ mididawama꞉ ba꞉bo ediya꞉. mabuma꞉ ama꞉ betoemehomata, mabu nale ba꞉moe du genamalo ba emedena ebete hibima꞉ midi ipuwalo naeno eta guduma꞉ edi. ✡ Kol 4:9; 1Kol 4:15 11 Dopamo ebete amia꞉no genamalo ba emedena, diyala, ebete komo tetelo ebeno oko owati ipuwalo hidohido komo ama꞉tamo da꞉ kododilinakuiha꞉. Ka꞉lo huiyatiya ebete uli lumagima꞉ eda꞉na, ba꞉bema꞉ na iya꞉tawala ba꞉ma tetene tupuimiti ebete ama꞉tamo ba꞉gala natamo hidohido komo kapiya hibilo bododilinakomene.

12 Ba꞉bema꞉ numa꞉, nale naeno uli gudu ama꞉tamo poememo. Naeno tepo ipuwoeno malemale komote ebetamo ditana bada konomola꞉ka꞉, 13 ba꞉bema꞉ na ubi ba꞉ma ka꞉na ihatimo, Ya꞉sukunu Hido Tabo mabuma꞉ Onisimasiti nago ba꞉moe du genamalo ba emedena natamo hido owalubi kihatenama꞉. Ba꞉ hibila, ama꞉ muhululu ba emedena ama꞉ modoboha꞉ owalubi natamo ihate, ba꞉bema꞉ kubaha꞉ amia꞉no okodawate amia꞉no haba pelawete na tamelo ba luta naeno modoboha꞉ komokomo kododilima꞉ne. 14 Huiyatiya nale ukui ba꞉ba ka꞉na ba ihatita ebe ama꞉tamo poemema꞉ kamawaditaha꞉, mabu na ubihinola ama꞉le modobo tabo goeheno ebete na dito owalubinina. Ba꞉bema꞉ ama꞉la, nala, ale ba꞉moe guduino komoma꞉ ukui kapiyama꞉ eda꞉heno, nale ebe kodakodalo atila꞉na modoboha꞉.

15 Diyala, Godote Onisimasikono komoma꞉ ubi ba꞉ma ka꞉na kuda꞉ ihati, ebete ama꞉godone alahula꞉te tete nanekele ama꞉godolo emedeheno eta habalo konemeda꞉tepama꞉, huiyatiya kalakala konomola, ba꞉ma tetelo ebete ama꞉tamo gala da꞉kapemene ebete ama꞉godolo tete ga꞉ga꞉nomolo bemedenamene, mabu hibila, ba꞉ma tetelo la꞉ netewapa꞉te hibima꞉ midi ipuwalo ba꞉ kapiya badininipalama꞉ eda꞉namata. 16 Ba꞉bema꞉ ba꞉ma tetelo ama꞉le ebe amia꞉no huiyaha꞉ okodawama꞉ da꞉goena, wadiyala ama꞉ atu tetelo ebe amia꞉no hibima꞉ mididawa ekawi etama꞉ ba ka꞉mina ebe malemalelo nemalagidolona. Hibila, Onisimasiko mabuma꞉ naeno kalakalate konomoma꞉ eda꞉na, huiyatiya ama꞉le ebe gala da꞉kumimina꞉, ba꞉ba tetelo amia꞉no kalakala komote nagodolo ditana ba꞉be kalakala hibilo kogogoloma꞉ne, mabu ebe ba꞉ amia꞉no hido okodawala ba꞉gala ebe Kodawa Ya꞉suku ipuwalo amia꞉no ekawima꞉ eda꞉na. ✡ 1Tim 6:2

17 Ba꞉bema꞉ ama꞉le na Kelisoko ipuwalo amia꞉no hido hopodalagima꞉ da꞉ka꞉namina, wadiyala ama꞉le Onisimasiko konomo kalakalago na꞉lawiya꞉, nale ama꞉tamo da꞉pemo ba꞉ba tetelo ama꞉le na keba ka꞉na na꞉ka꞉laweneomena꞉ ba꞉ba ka꞉na.† Poloko tetelo Loma Gabomanino tutumu tabote ba꞉ma ka꞉na itanami, kebe huiyaha꞉ okodawate ebeno oko namutudawagodone dalahula꞉mene, ba꞉be dubuti ebe gala da꞉kumimini, ebeno kuba ododi mabuma꞉ talona puliyala ebete ebe anakapumima꞉. Ba꞉bema꞉ Polote ba꞉be komo ba emalagidolo Pailimoniko na꞉kiyamiya꞉, ebete Onisimasikono kuba egebolemete ebe kalakalago na꞉lawa꞉mene, heloagoha꞉. 18 Ba꞉gala ebete alahula꞉heno, diyala, dopamo ebete eta kuba ama꞉tamo kuda꞉ ododi, ba꞉ma ka꞉na ebete pilo komo dododi, wadiyala ama꞉ huiyatiya ba꞉be kuba naeno kubama꞉ na꞉midiya꞉, ba꞉bema꞉ hibila, ba꞉be komo galane na ha꞉kiya kopetuputupuimima꞉nemo. 19 Ama꞉ numa꞉, eta lumagiti na mabuma꞉ ba꞉moe letoeno tabo komokomo ba miya꞉teho, huiyatiya na Polote naeno hibi komo hawakalimima꞉ na ha꞉kiya naeno kokotamo ba꞉moe kapiya tabo bimiya꞉temo, nale Onisimasikono kuba ododi mabuma꞉ ama꞉tamo hibilo kopehuiyama꞉nemo. Huiyatiya ama꞉le na ba꞉be komo kohuiyama꞉ kiyanameheno ebeno kuba ododi komo dito degebolememena꞉, kubaha꞉, mabu ama꞉ hibilo iya꞉tawala, nale dopamo kebe konomo owalubi komo ama꞉tamo dihatimo, iyo, nale Ya꞉sukunu komo ama꞉tamo ba hawakalimi amia꞉no ka꞉ka꞉ mula꞉ gabo ba꞉bo iya꞉tumiya꞉mata. 20 Ba꞉bema꞉ naeno ekawi, na ubila ama꞉ ba꞉moe malemale komo Kodawa Kelisoko mabuma꞉ natamo nododiya꞉, ba꞉bene nale ebe ipuwalo ba emedena naeno temeteme komokomo emalagidoleheno gelebadi ukui ba꞉bo kolawema꞉nemo. 21 Ba꞉ hibila, na niya꞉tawutamo ama꞉le naeno tabo komo Onisimasiko mabuma꞉ dumimina꞉ ba꞉bo kopapamiwatama꞉na꞉ta. Iyo, amia꞉no malemale natamo konomola, ba꞉bema꞉ na iya꞉tawala ama꞉ ba꞉moe kapiya ubi komamo a꞉kapapamiwatamena꞉ta, huiyatiya nale ba꞉moe leta ipuwalo kebe ubi komokomo kahawakalilamitaha꞉, ama꞉le ba꞉bi hiliyonomo komamo atumu kakapapamiwatama꞉na꞉ta.

22 Ba꞉gala eta kapiya komo. La꞉ Kolosi sose tawakaluba꞉te Godoko da꞉toemehonakoma ebete na du genama guni kuluhukunatenema꞉, nale ba꞉be hido komote ebegodone kuluhukuma꞉ kalakalago latiminamo. Ba꞉be komote duluhukumini nale ama꞉tamo hibilo kopema꞉nemo, ba꞉bema꞉ wadiyala amia꞉no genamalo haba na꞉hiduimiya꞉ nale ama꞉go kopemeda꞉tepama꞉. ✡ Pil 1:25; 2:24

23 Du genamalo nago demedena ba꞉be dubu Epa꞉palasiti ebeno nolata tabo la꞉tamo poeme, ✡ Kol 1:7 24 ba꞉bene puya꞉te ba꞉malo oko nago dowatina, ibi ba꞉ Makako, A꞉listakasiko, Dimasiko, ba꞉gala Lukuku, ba꞉moi ba꞉te atumu nolata tabo la꞉tamo kapoema꞉. ✡ Kol 4:10-12,14; 1Tim 4:10-11

25 Kodawa Ya꞉su Kelisokono malemale komote la꞉eno tepo ipuwalo nitanamene. Ba꞉moe ba꞉ naeno tabo kuititila. Ba꞉ba꞉la.