1 Na ba꞉moe leta dododimo, na ba꞉ hibima꞉ midipino watodawa etala.

Naeno hido hopodalagi Gaiyase, ama꞉ nolata. Nale ba꞉moe leta ama꞉tamo poememo, mabu ama꞉la, nala, a Godokono hibi komo ipuwalo ba emedena nale ama꞉ malemalelo nemalagidolonamata. ✡ Oel 19:29; Lom 16:23

2 Naeno hido hopodalagi, na ama꞉ mabuma꞉ Godotamo ba꞉ma ka꞉na toetoenakomo, ebete ama꞉ ba owalubina amia꞉no emede ipuwalo hiliyonomo komate modobolo kopola꞉nama꞉. Ba꞉gala nale ama꞉ a꞉kadipatenakomata ama꞉le tawetaweheno kemedenama꞉, mabu amia꞉no tepo ipuwoeno hibima꞉ midi komote helonomoma꞉ keba ka꞉na keda꞉na, wadiyala amia꞉no apeno helote atumu modobonomoma꞉ na꞉kaeda꞉namene. 3 Ba꞉bema꞉ numa꞉, komo hibima꞉ midipi ekaka꞉te natamo pelamete amia꞉no emede komo da꞉pehawakalimi, ba꞉ba tetelo na kalakala konomo ba꞉bo lawimo, mabu iba꞉te tabo ba꞉ma ka꞉na pega꞉luya꞉, ama꞉ Godokono hibi komo ipuwalo pata꞉nata ba꞉gala amia꞉no hibima꞉ midi komo kodakodanomola. ✡ 2Yon 4 4 Ba꞉ hibila, naeno hibima꞉ midipi gugudi ipuwalo eta lumagino komo ba꞉ma ka꞉na dulimo, ebete Godokono hibi komo ipuwalo da꞉pata꞉na, ba꞉ba tetelo naeno kalakalate ebe mabuma꞉ hununomamo odolote konomoma꞉ keda꞉ma꞉ne.

5 Naeno hido mabulubi, numa꞉, ama꞉le hibima꞉ midipi ekaki Godokono oko owati ipuwalo ulamete ibi baa꞉mo ba꞉gala laha haboeno komamo dowalubilinaka, ba꞉bema꞉ ama꞉ atumu Godokono eta hibi okodawama꞉ eda꞉nata. Ba꞉gala kalakala konomola, Godokono okopi hiliyonomo ipuwalo ama꞉ amia꞉no tawakalubi kapiya kowalubilinaha꞉, ao, puya꞉te hiya꞉hiya꞉ kapela habahabane da꞉pelamenaka ama꞉le ibi atumu hidonomamo owalubilinakata. 6 Ba꞉bema꞉ ama꞉le dopamo pui kowalubiliui, ba꞉ba꞉te atamo pikuliti sose tawakalubino holoholo hapulu amia꞉no malemale emalagidolo komo kalakalago a꞉pehawakalimiya꞉. Ba꞉bene eta tetelo ba꞉bako hidohido okopa꞉te ama꞉tamo gala da꞉kapikulimina꞉, iba꞉te la꞉godolo emedenate ba꞉bene eta habamo gala tolamema꞉ dewagelemena꞉, wadiyala ama꞉ ibi atumu malemale komago noelamiya꞉, ama꞉le Godokono komo hidohido ga꞉limapi gugudi keba ka꞉na kowalubilionaka ba꞉ba ka꞉na. ✡ Tai 3:13 7 Ama꞉ numa꞉, ba꞉bako okopa꞉te Kelisokono mahilo mabuma꞉ ibino hiya꞉hiya꞉ haba miya꞉palete ya꞉lo ikuliya꞉, iba꞉te hiya꞉hiya꞉ habahaba hiliyonomolo ba wapata꞉lamena ebeno Hido Tabo hibima꞉ midiha꞉pa꞉tamo ba꞉bo konolamagimima꞉. Huiyatiya ba꞉be oko tupuimihino dopamo iba꞉te ibino tepo ipuwa ba꞉ma ka꞉na kodakoduilamiya꞉, iba꞉te eta kapiya deha꞉poto komo hibima꞉ midiha꞉pa꞉godone lawe modoboha꞉ma꞉ ga꞉lalo a꞉kalawa꞉mena꞉. ✡ 1Kol 9:12 8 Ba꞉be mabuma꞉ wadiyala a hibima꞉ midipa꞉te ba꞉bako okopi baa꞉mo ba꞉gala laha haboeno komamo bowalubilinakoma꞉, iyo, a ba꞉be owalubi komodo Godokono Hibi Tabo olamagi oko iba꞉go kapimilo bowatihonama꞉.

9 Ba꞉ hibila, nale amia꞉no sose tawakaluba꞉tamo eta leta dopamo ododimo, huiyatiya ba꞉ba tetelo Diyotipasiti ba꞉be leta lawete na sose watodawaha꞉ma꞉ goelo ebete naeno tabamo kapapamiwataha꞉. Iyo, ebeno ubi komo ba꞉ ba꞉ma ka꞉nala, ebe ha꞉kiya ebe ba adipate sose tawakalubi ipuwalo ebe kapiya dopo lumaginomoma꞉ keda꞉ma꞉. 10 Ba꞉be mabuma꞉ naeno pe tetelo ebete kebe kuba komo dododilina ba꞉gala a sose watowatopino komoma꞉ kebe kuba tabo dolamagina, nale ba꞉bi komo sosetamo ba pehawakalilame ebe ba꞉bo kopikiyahamema꞉nemo. Numa꞉, ebe ubihinola ba꞉moi kapiyakapiya kuba komo ododili, ba꞉bema꞉ ebete eta komo ba꞉ma ka꞉na kaododinako, puya꞉te Godokono hibi oko owatima꞉ la꞉tamo da꞉pelamenaka, ebete ebeno awagaha ipuwalo ibi baa꞉mo ba꞉gala laha haboeno komamo a꞉kowalubila꞉le, ba꞉gala puya꞉te ibi dopamo dowalubilinakui ebete ibi ba꞉ dito duhilami. A꞉iye! Ebe ha꞉kiya ebe sose watodawama꞉ goelo ba꞉bi hidohido ukuia꞉gopino owalubili komoma꞉ kuba huiya ba ikalame, la꞉eno soseno kapiyuilame komamo pelamema꞉ talona ba꞉bo ihatelami!

11 Ba꞉bema꞉ naeno hido mabulubi, ama꞉ eta lumagino kuba ododi komo dumimina꞉, ebe akibamita꞉la꞉. Wadiyala ama꞉ hido komote na꞉ta꞉matuya꞉, mabu puya꞉te hidohido komo dododilina ibi ba꞉ Godokono gugudila, huiyatiya puya꞉te kuba komokomo dododilina iba꞉te dopamo Godokono hibi komo kumiya꞉ha꞉. ✡ 1Yon 3:6-10 12 Ba꞉ ba꞉ba ka꞉na na Dimitiyasikono komo nemalagidolutamo, hiliyonomo tawakaluba꞉te ebeno ododili komoma꞉ hidohido tabo bega꞉lana, ba꞉gala ebeno emede komote atumu ebeno komo ba꞉ma ka꞉na hawakalimina, Godokono hibi komote ebe ipuwalo bitana. Numa꞉, a sose watowatopa꞉te atumu ebe hido lumaginomoma꞉ kaga꞉lanama꞉, ba꞉bema꞉ keba tetelo a watowatopa꞉te ba꞉mako tabo da꞉ga꞉lama꞉, ba꞉ba tetelo ama꞉ kiya꞉tawama꞉na꞉ta aeno tabo ba꞉ hibila mabu a ha꞉da amihohopima꞉ keda꞉hanaha꞉.

13 Ba꞉ hibila, nagodolo komo hiliyonomo komokomo ba꞉pola꞉na la꞉ kokiyahalamema꞉, huiyatiya na ubihinola ba꞉bi komokomo pepamo miya꞉teho. ✡ 2Yon 12 14 Ba꞉bema꞉ naeno ukui bitana tete tatalila naeno apenomamo ama꞉tamo kopuluhukuma꞉, iyo, gabote ditanamene na kopema꞉nemo. Ba꞉ba tetelo na amia꞉no holoholo ba pumi aeno tabo komokomo ba꞉bo koga꞉lama꞉nema꞉.

15 Wadiyala Godokono kalakalate ama꞉godolo nitanamene. A hibima꞉ midipino kapiyuimi ipuwalo puya꞉te amia꞉no mabulubima꞉ deda꞉hana, iba꞉te ibino nolata tabo ama꞉tamo poema꞉, ba꞉bema꞉ la꞉eno kapiyuimi ipuwalo puya꞉te aeno mabulubima꞉ deda꞉hana, wadiyala ama꞉ sose tawakalubino holoholo hapulu ibi ka꞉lamiti aeno nolata tabo iba꞉tamo ba꞉bo na꞉hawakalimiya꞉.

Ba꞉moe ba꞉ naeno tabo kuititila. Ba꞉ba꞉la.