E Pol Ka Hor To Alomin Orom To Tittiegom Ngang lKorin
O Rhek Ruk Kam Keknen Mang E Pol Ka Hor To Alomin Orom To Tittiegom Ngang lKorin
lKorin ngat kol e Pol ka hor to aktarang, to o mia kavurgem kun mnam e Yesus ka ngaomevek to endo ngat hera mnor he te, e Pol karo rhek ruk endruk ngta mien ko ta psom mar kam srim ngaro papat ormar. To ngat kaekon ngang e Pol orom ngarta hor kat kam havaeng te, ngat hortgem ngaro kerkeknen, nang kle kaikkiem E Nut karo keknen. Vanangko akuruk yok ngat kle kaesik ngang e Pol vop pum karo rhek ruk tegom kam srim mar ormar to ngat kaelha kam kerrereng.
Mnam e Pol ka hor ta ka mhe to aktarang orom, e Pol ta sirei mang lKorin ko ngat ngan vgum karo rhek ruk kun mnam ka hor to aktarang ngang ngar he khortgem ngaro kerkeknen, nang kle kaikkiem E Nut karo keknen. Ta sirei mang ngar tok to kle koripang endruk ngta mon la ppiagam ko ngat kaesik ngang vop, ko ngat kerkolkol vgum karo rhek ruk ta ktar ittiegom mar ngang ngar kam sisrim mar ormar.
Va mnam o kolkhek ruk endruk, E Nut karo mia tgus ruk kun mnam a mmie ka mhe to e Yudea, ngata kerkolkol mnam a vang kat, vanangko e Pol ta kle ka vle kam kaum o krek kam lol kngorom mar kmenik ngang ngar. He ekam tok, kun mnam ka hor ta ka mhe to 8 va 9, e Pol tkaelha orom o rhek akuruk kam hover lKorin ngaro vurkul kmen o krek mang a ngaeha to endo tok. E Pol ka hor ka mhe to kam nop orom ta havae mang o aposel ruk o ppiagar ko ngat ngae kpis ka vle ko mKorin he krere ka grung orom e Pol ka munik va ka kle krere kmon la ppiagam orom ka ngaeha to en a aposel nam kaeharom.
He enang tok, e Pol tkaelha kam totok mang en mruo orom karo rhek.
1
E Pol Tkaen Ka Mamrung Ngang lKorin
1 Vae, dok e Pol, a aposel to mkor e Yesus To E Nut Thim Orom Ka Msasaen, ko tmeng dok kam kol ka gu, kmikkiem gi enang ko E Nut mruo tmi kut svil mang dok kam kol ka gu tok. Va ngornopia to e Timoti, endo nam kaum kaeha kar dok ta vle mo kmok kat.
Ko kaittiegom kua hor ta ngang nguk ruk E Nut ka ngaomevek to ormuk ko tok mnam a rengmat ka pun to e Korin. Va ko kaittiek ngang E Nut karo mia mruo akuruk kat, endruk kun mnam o marhok tgus ruk mnam a mmie ka mhe to e Akaia kat.
2 Kua ngarkie ngang Ngor Teit to E Nut va Ngoldaip to e Yesus Kristus te, min kam ring ya mang nguk, va min kmeharom mularo vurkul kmongeik kat.
E Nut Nam Kaenkrovgem E Pol, He Nang En Kam Kle Kaenkrovgem O Mia Kat
3-4 E Nut, En Ngoldaip to e Yesus Kristus Kteit. En ta vle te, Ngor Teit to nama mrung dok ko nma turang dok mekam mekam kmenkrovgem dok. He ekam tok, koma hover En ekam ko nama turang dok pum kuaro vnek tgus ruk koma kerkolkol vgum mar. Nama turang dok he kaenkrovgem dok tok, he nang dok vat kam kle kturang kolenar he kaenkrovgem mar kat pum ngaro vnek ruk ngam kle ktua kerkolkol vgum mar kat. Va a serppak to E Nut nam kaenkrovgem dok orom, her a serppak to arhe ko kais kam kle kturang kolenar orom kmenkrovgem mar orom tok kat. 5 Ii, Endo E Nut Thim Orom Ka Msasaen mruo te lo vur tu hak kam kerkolkol vgum o vokngnes e. He ekam tok, dok kat kom lua tu kat kam kerkolkol vgum o vokngnes mang en tok kat e. Va gi enang ko kom lua tu kam kerkolkol vgum o vokngnes mang e Kristus tok, E Nut nam lua tu kam turang dok kmenkrovgem dok her vgum E Kristus to kat arhe. 6 Ii, ko koma kerkolkol vgum o vnek mang a knovvur her mi kut mang kam kle kaenkrovgem muk ko E Nut nak susulgim muk vgum a knovvur to tok. Ii, va E Nut nma kaenkrovgem dok orom a serppak, he nang dok kat kam kle kaenkrovgem muk kat orom a serppak to koma ktar kol ekam E Nut ko ko her kerkolkol vgum o vnek ruk tok. Ii, E Nut nma kaenkrovgem muk vgum dok tok, he nang En kam kle kaeharom muk kam matnge vgum o vnek ruk endruk mor tgus ngot kaum kerkolkol vgum mar, nang muk kam lua kaeloong mnam mar, mar kam marer kam nop e. 7 To enang tok, kom ngae sei kam nho mkor muk lserppak hak te, mguer mia matnge vgum o vnek ruk endruk, ekam ko ko smia mnor hak te, ekam ko muma kaum kerkolkol vgum o vokngnes lsir ruk dok mruo koma kerkolkol vgum mar, va E Nut nera kaum kaenkrovgem muk, gi enang ko nma kaenkrovgem dok tok kat.
8 Yu! Koornopeik, kua svil muk kam mmok mang o ngaelaut ngo ngnorok ruk ko sei kam kerkolkol vgum mar kun mnam a mmie ka mhe to e Esia. O vnek ruk ngat kol dok ko tok, ngate ho mi kut vovoem dok hak. Va kua serppak tho lo is mang ngar hak kam matnge vgum mar. He ekam tok, kuaro papat ngat ngae ho mi ktua tu hak kam pis mang o nghek ko ko sia khanang dok he. Ko ko kle her gia pat re te, ngor ho mi ktua ru ko he! 9 Kua mien te, kun mnam kuaro papat ko her pat re te, E Nut ther mrua monik kim a yor ngang dok he. Vanangko ko her kerkolkol vgum o vnek ruk endruk tok, he nang dok kam mia kol a pat ta ti te, dok nguak or kam mrua kaur orom kuaro mur serppak mruo kam mrua hong dok pum o vnek ruk endri, nang kle kaur orom her E Nut to nera hover o yoror petgim ngaro nnak ka serppak mruo. 10 Ii, tesgun ko her kerkolkol vgum o vokngnes ruk ngata kpom dok klik hak. Va ko re kam ho mi ktua yor hak vgum mar, vanang her E Nut to arhe tsulgim dok he khong dok pmar. He tete kua mnor kat te, mnam o kolkhek ruk o vokngnes nga kta kirpagis kim dok koknaik va lmien te, E Nut ner kle ktua sulgim dok, gi enang tok kat. He enang tok, ko her el kuaro papat lserppak te, dok kam sei kam nho mkor E Nut te, En ner lua tu hak kam sulgim dok mekam mekam koknaik kat e. 11 Kom sei kam nho mkor E Nut tok, ekam ko muma mokpom kar dok orom mularo ngarkie kam turang dok ormar. He vgum mularo ngarkie ngarlavurgem ruk endruk, o mia ngara kanprim E Nut ge orom dok ko En nera ngan vgum muk orom mularo ngarkie he kring ya mang dok to kle ka nngiar ngang dok kam pet dok petgim o gi vrong vnek ruk ngma pis kim dok enang tok.
E Pol Ta Mrua Totok Mang En Mruo
12 Tete ta, kuaro papat ngata sei kam serppak kam havaeng nguk te, mguak kommen dok he kvokom dok ko kua vrek tho mi kut mmok kngae ka ngmeang tgus hak ko pum E Nut kalo keik. Ko koma vle kun pgegom o gi vrong mia ruk mo mmie he kolkol ekam E Nut orom kuaro keknen ruk ko her khenam mar ma mmok ngang ngar ko ngat her gia mmok hak. Va kat kom ho lo gia kauyang ngar hak kmeha ngang ngar kat e. Va her sim kut muk ruk kat arhe ko her vle kar muk enang tok kat tesgun mnam o kolkhek ruk koma vle ko kmuk. Ii, tesgun ko her eha ngang nguk mekam mekam enang tok, ekam ko tesgun kom lo lol o papat laol ruk mkor o mia ruk ngam lo kor mnam mar mang E Nut he lua mokpom kar kmeha kmikkiem mar ko koma patter muk ormar enang tok e. Nop hak. Kom her kle kaeha ngang nguk kam ring ya mang nguk ha, kmikkiem a papat to mang E Nut ko nma ring ya mang o mia enang tok. 13-14 Ii, tesgun kom lo kaikkiem o papat ruk laol enang tok kam ring ya mang nguk orom kuaro rhek ruk ko her ittiegom mar ngang nguk e. Nove, ko kom lo ittiek ngang nguk orom o rhek ruk laol ko ngta tvok kim muk, endruk mum lo kais kam him mar va lua mnor mang ngaro pneik e! Ho mi kut nop hak! Mum gia pat mang dok tok tete ekam ko mut lo vua mmok mang dok e. Vanangko ko ho mi ktua nho lserppak mkor muk te, vur koknaik ko pekam ko nguak polger kuaro rhek ngang nguk, mguer kle ho ka mmok mang dok hak, he nang muk kam kat kor mnam muk mang dok to kle karmail mang dok, gi enang ko dok ngor ho mi ktua karmail mang nguk tok kat mnam a kolkha to a kser kim ko Ngoldaip to e Yesus na kat kaeknik mnam.
15-16 Va ekam ko ko ho mi ktua nho lserppak mkor muk enang tok, ko her ktar el kua pat mo malpek te, dok kam ktar ka khap he ka ptang nguk ko nguak ngae mMasadonia, he nang dok kam turang nguk. To nguak kootpum dok mMasadonia, nguak kta khap ko kmuk ka ptang nguk kat na, he nang dok kam kta turang nguk nglomin tok kat. Ii, nguak kat kaeknik ngok kmuk tok, he nang muk kmel kualo nhar ma mmie mang kua ngae to ngok mYudea. 17 Ii, ko her mi kut el kua papat to kam ptang nguk mo malpek tok arhe, va nok pathe muta pat re te, ko her gi el kua papat to endo gi kuo mang kua vok vor ngola? I, o nok pathe muta pat re te, dok ko kaenang o mia ruk mo mmie ko ngam gi vrong kael ngaro papat mo malpek orom ngaro naprai alomin kat vor ngola? Ii, ko mar ngama re kvat a re to te, “Mare,” kuo mang ngaro pkor kmeharom a papat tang, to kle khortgi kam re kvat a re to te, “Nove” kuo mang ngaro pkor tok kat kam lo kat kaikkiem a papat to endo kmeharom kat ngola?
18-20 O-o, ho mi kut nop hak! Kom lua vle enang o mia ruk enang tok e. Parem ko, kmikkiem lsir gi enang ko E Nut nam kaottam karo rhek tgus ruk tel karo tnangal mang Endo Thim Orom Ka Msasaen ormar, mar kam pis lmien, va dok kat, kuaro rhek ruk mang a knovvur, endo dok kar e Silas va e Timoti ngot havaeng nguk mang te, he e Yesus Endo E Nut Thim Orom Ka Msasaen, ngat her ngae sim ktua vle lmien gi enang tok kat arhe ko ngat ngae ho lo vur vle te, “Mare” ngta mien, nang kle ka vle kat te, “Nove” ngat lua mien kat e. Ho mi kut nop hak! Kua re tok, ekam ko a re to mang E Nut Khal to e Yesus te, En her Endo E Nut Thim Orom Ka Msasaen, tlua vle te, “Mare” ta mien, nang kle ka vle kat te, “Nove” tlua mien kat e. Nove. Ko o rhek tgus ruk mang e Yesus To E Nut Thim Orom Ka Msasaen ngat ho mi ktua mien hak, kais mang tiok he, ko a mmie tlo pal vop. Ii, E Nut karo rhek tgus ruk tel karo tnangal ormar mang Endo Thim Orom Ka Msasaen ngta mien tok ko E Nut tsi sovet kmel karo tnangal ngarlavurgem mang en tok, va o tnangal ruk endruk tgus ngat her mi pis lmien orom en arhe. He ekam tok, her vgum E Nut karo tnangal ruk mang Endo E Nut Thim Orom Ka Msasaen arhe, dok kar muk ngot kais kam kaum khover E Nut kam kaum kre te, “Ol mis E Nut A Ho Minar Hak.” 21-22 Ii, va Endo tmur eharom muk kam sir lserppak kam sim kor mnam muk mang e Yesus te, en her Endo E Nut Thim Orom Ka Msasaen, her E Nut to arhe, Endo tmur eharom mor tok kat kam sir lserppak kam sim kor mnam mor mang en gi enang tok kat. Ii, her E Nut to kat arhe Endo tmur el ka tnangal ngang ngor orom E Nunu A Totur, en kmel rengmat kun mnam mor tgus kam vle te, ka ngaelmir ka gi kaunun to kam khenam ma mmok te, tmur him mor orom a msasaen to kmeha ngang En mruo. Ii, va E Nunu A Totur ta vle kat te, E Nut ka ngaelmir ka gi kaunun to kam khenam ma mmok kat te, her mor ri kat arhe, mor ruk E Nut tmur el mor kam vle ngang En mruo. Ii, va E Nunu A Totur ta vle kat te, E Nut ka ngaelmir ka gi kaunun to kam khenam ma mmok kat te, ner mi kaottam ka tnangal ekam mor koknaik ko ner kle ho mia sulgim mor hak.
E Pol Ta Halger Karo Rhek Ruk Mang Ko Kman Ko Tlo Pis Kam Ptang lKorin
23 To enang tok, kua rere kvat E Nut mang dok kam tmor kim E Nut ko En tmur mnor kat mang dok te, ko mi ktua mien hak te, ko hortgem kua papathe lo kta ptang nguk ko mKorin ekam ko ko her mrung nguk he lua svil kam pis kmen a kapnes to a serpgar ngang nguk. 24 Vanang klua vle ngang nguk enangthe dok mula taven to koma sopong nguk kmikkiem kuaro rhek enangthe ko kais kmen a kapnes ngang nguk ko mum lua sir lserppak orom mularo papat ruk kmor mnam muk mang e Yesus he mokpom kar e. Nove. Parem ko, kua kle va kaum kaeha kar muk ha, kmenserpagam mularo papat ruk endruk, he nang muk kam sirei vgum mar, ekam ko, her vgum mutaro papat mruo ruk kmor mnam muk mang e Yesus he mokpom kar, mut kais kam ho gia sir lserppak.