1 Ńmɔ Pole nɛ̂-á pɩ Yesu Krista tɛ̃ntõ̀ névilɛ à yɩ̃nɛ Liyel nɩ̀vɩ̀nɩ̀nɛ, ńmɔ ye n tɛkɩ n mɔ sɛ́bɛ́y mɛ̀nɛ névye tyɩ́ nónó-á pɩ Liyel nolɛ Yefɛsɩ kwil sɔkɔ, tɛ́ mɛ n kɔ pallɛ pé wrɔ́ kwrɔ́nmɔnɔ gbõ̀ yõ Yesu Kristalɛ. 2 Mé kélɛ n yah n kɔ̃ á Sú Liyel ànɛ̂ Tɛ̃̀ ǹgbɛ̃ Yesu Krista tyɩ́ nɛ, pè yõ̀bènɔrɩ pɩ yé tyɩ́ pè mó yèvɩnɩnɛ yé kɔ̃.

3 Gbílkínɔ́ nɛ n sah Liyel yõ, ǹmɔ nɛ̂-á á Tɛ̃̀ ǹgbɛ̃ Yesu Krista Súlɛ. À ye sãm mɔ á sɔkɔ Krista yõ sɛ̃́nɔ́ gbõ̀ yõ, à pèpɔrɩ duke duke pól pɩ á tyɩ́ nónó-á wil yĩ̂nyõ sɔkɔ. 4 Kèkõyṍ mɔ́-ńkɛ̃̂ gbĩ́ dùkùlɛ, Liyel sõ̀ ápi yah tɔkɔ pɩ ǹ tyɩ́lɛ Krista gbõ̀ yõ sɔkɔ, nɛ á pɩ yályál wɛ́nyo-ńsah kɛ̃́nɛ á tyɩ́ péwɔ yah sɔkɔ. Tyɩ́nɔnɔ sɔkɔ, 5 Liyel sõ̀ kwãh tɛ̃ kè yah tɔkɔ nɛ páh kɩ ápi pɩ pé wɛ̃́npìlɛ Yesu Krista gbõ̀ yõ. Yé náh wɛ di, képah ye sõ̀ à pɩ à yɩ̃nɛ ǹ dyɔ yĩ́ĩ́ tɛ̃̀nɛ. 6 Á ye ǹnɛ n gbilki ǹ pèpɔrɩ yĩnnɛ, wǎh nɛ̂ pɩ á tyɩ́ ǹ nɩ̀dɛ̀ Pídĩ́ gbõ̀ yõ. 7 Ǹmɔ tṍ kwɛ́nɔ́ gbõ̀ yõ ye á wɛ wil pèkè sɔkɔ, tɛ́ á tyípêl mɛ yɔ̃ mɔ á tyɩ́. Sɛ̃́ ye Liyel pɩ yõ̀bènɔrɩ ǹgbɛ̃nɛ á tyɩ́, 8 képah nɛ̂-á à pɩ á tyɩ́ náhnáh à yɩ̃́pɩ̃̂ ànɛ̂ lékã́mnɛ á kɔ̃ yĩ́ĩ́. 9 Sètĩ̀n sõ̀ tir nɛ̂ tyɩ́-á nɔ ǹ tyɩ́, à sõ̀ képah yah tɔkɔ sah ǹgbò dùkùlɛ. Núkúnúkú, à kélɛ á wɛ̃kɩ. Krista gbõ̀ yõ ye sõ̀ à yah tɔkɔ tyípépɛ̌y mɛ̀nɛ. 10 Ké pɩ gbĩ́-à pɔ nɔ, à kɩ yíyìn pól tuke mɔ nónó-á mɛ yĩ̂nyõ ànɛ̂ sétáh yõ, nɛ́núkù kɔ̃ à kɩ pɩ sé yõ̀tɛ̃̀nɛ, ǹmɔ nɛ̂-á Kristalɛ. 11 Á wrɔ́ kwrɔ́nmɔnɔ gbõ̀ yõ Kristalɛ, nɛ̂-á sõ̀ á wɛ wɛ tɛ̃̀nɛ, Liyel ye kélɛ á kɔ̃. À sõ̀ kwãh tɛ̃ á yah tɔkɔ sah ǹ tyɩ́lɛ. Ǹmɔ nɛ̂-á Liyellɛ, ǹ dyɔ yĩ́ĩ́ tir ye à n nɛ n pɩ à yɩ̃nɛ wǎh kè yah tɔkɔ sɔ̃́. 12 Képah ye, ápi nónó ǹgbò-á á gbõ̀ sah Krista yõ, á ye gbílkínɔ́lɛ n sah Liyel yõ. 13 Yépi tɔlɛ, yé wrɔ́ kwrɔ́nmɔnɔ gbõ̀ yõ Kristalɛ, yé gbɩ wɛy wɛ noh, képah nɛ̂-á Nɩ̀vɩ̀nɩ̀ tirlɛ, nɛ̂-á yélɛ n pwah n mɔ. Ǹmɔ yõ sɛ̃́nɔ́ gbõ̀ yõ ye tɔ̃, Liyel-á ǹ vyãhlɛ yé kɔ̃ ǹ Mirki nɛ̂ tyɩ́ sɔkɔ, à kélɛ yé kɔ̃ à yé pɔkɔ mɔ. 14 Liyel Mirki nɛ̂-á à á kɔ̃, képah álɛ n wɛ̃kɩ nɛ wǎh ǹ vyãhlɛ ǹ no kɔ̃ yî nónó tyɩ́ sɔkɔ, áyáh kɩ sè wɛ n pi. Képah á nɩlɛ n sũ nɛ áyáh kɩ sè wɛ n pi, áyâh sõ nɛ̂nɛ pwáhnmɔnɔ wɛ pnɛ́pnɛ́. Képah sɔkɔ, gbílkínɔ́-á kɩ n sah Liyel yõ.

15 Képah ye, ńmɔ tɔ-á fyɔ̀ noh nɛ yáh mɛ sɛ̃ Tɛ̃̀ ǹgbɛ̃ Yesu yõ, ànɛ̂ ǹ yõ sɛ̃́pú tyɩ́-á mɛ nɔ yé tyɩ́, 16 gbĩ́mɛgbĩ́, mè n nɛ n wɛkɩ Liyel tyɩ́ yé tyɩ́ sɔkɔ, ǹ tɛ́ ǹnɛ n ye n gbo yé tyɩ́. 17 Mé kélɛ n yah n kɔ̃ á Tɛ̃̀ ǹgbɛ̃ Yesu Krista Liyel tyɩ́, ǹmɔ nɛ̂-á tɔ̃́rɩ́ nɛ́tɛ̃̂nɛ, nɛ à lékã́m Mirkilɛ yé kɔ̃ nɛ̂-á kɩ Liyel dùkùlɛ yé wɛ̃kɩ tɛ́ kɩ yé kɔ̃ yé kɩ à pɩ̃ yĩ́ĩ́. 18 À mó yé lékã́m yɩkɩ mɔ, sɔ̃̀nko wǎh yé ye nɛ yé yé gbõ̀ sah kwâh nɛ̂ yõ sɔkɔ yé fɛ̃ ké dùkù pɩ̃; ànɛ̂ wǎh mɛ yípéplɔ nónó yah sah ǹ no kɔ̃, yé sé tɔ pɩ̃. 19 Yè mó pɩ̃ gbǐl tɛ̃́nwɛnɔ nɛ̂-á à mɛ yah sah á kɔ̃ ápi nónó-á Yesu yõ sɛ̃́púlɛ. Kénɛ tɛ̃́nwɛnɔ mɛ̀ ye Liyel tõ̀ pɩ tǎhkɩ̀lɛ, 20 wǎh Krista lékó yilki mɔ gbĩ́ nɛ̂nɛ tɛ́ à kɔ̃ à kɔ̃ tɛ̃ ǹ gbõ̀yõ̀ sõ̀lɛ yĩ̂nyõ sɔkɔ. 21 À mɛ tɛ̃̀nɔ́lɛ tɔ̃́rɩ́, ànɛ̂ tǎhkɩ̀, ànɛ̂ tɛ̃́nwɛnɔ, ànɛ̂ yõ̀tɔ̃rɩ́nɔ pól yõ sɔkɔ. Nónó yni-á mɛ wil kwɛynɛ, ànɛ̂ nónó yni-á kɩ n wil n pi ńsõ̂nɛ, ǹmɔ mɛ pépi pól yah sɔkɔ. 22 Liyel yíyìn pól pɩ Krista gbáhkɩ̀ súnsàh-ǹsahlɛ, tɛ́ à pɩ ǹ yõ sɛ̃́pú tĩ̀nkì pól yõ̀tɛ̃̀ ǹgbɛ̃nɛ, 23 pépi nónó-á ǹ wil gbɛ̃́nsêlɛ. Krista mɛ tɛ̃̀nɔ́lɛ pépi sɔkɔ ǹ tɔ̂ɔ́, ǹmɔ nɛ̂-á Liyel tɔ mɛ tɛ̃̀nɔ́lɛ ǹ sɔkɔ ǹ tɔ̂ɔ́.