5
Sexien xa elda xil ti lilaxat moletin na Hi xil ixo en
1 Ieok bei tengan nisel xat xamim xa mube elda xil vengan xa inou mun nabe elda tei. E pe metok, inou natepus longpangasien xil xa Iesu tehuri. E melele xa ipisen minehinen te xeihen nan mi moletin xil, inou mun nisoh vituei itela. 2 Nasel xat xamim tengan mulaxat kuh moletin xil xa Hi miling xil ladi pe hemim nggoni ngan taxa mube moletin xil xa di lalaxat kuh sipsip xil. Munapol ni ti naxoni ngan xa mosav xil di langgeih xat xamim tengan mupol ni, mu tengan muvur mani vaxo en. E mupol ni itel sien e itel nenemien xa ihos ixoni ngan xa Hi ien bei tengan mupol ni. ✡ Sion 21:15-17; Pol 20:28 3 Reitin xa Hi teling xamim tengan ti mulaxat moletin nan xil, e munapol ni ti natel sexien te xeihen mu natel nenemien xa be nesao. E bos mak mu xa mupol ni sexien hos xil xa moletin xil likila lipol ihusili. ✡ 2Kor 1:24; Plp 3:17; Taet 2:7 4 Reitin, Vat na ngan xil xa di lalaxat moletin nan xil mei istal. E melele xa imei, xi isa merereen e his tei xa eilep mi xamim xa ixoni vatluvoluv te lelaxatien xa minehinen teni iti vehakut. ✡ 1Kor 9:25
5 E xamim xa mube horam maxoe xil, bos xa mulong xat elda xil te sias. E melele xa mudi vituei, xamim vus mupol ni nenemien namim ihe tan vengan xa Vanuvei Eo di biteni bit,
“Hi di pol ni nggeih ba xat rin na ngan xil xa labe koai,
e di pisen eheien hos nan mi ngan xil xa di lapol ni nenemien nae be tan.” (Pro 3:34)✡ Mat 23:12; Tem 4:6
6 Ma, mupol ni nenemien namim ihe tan e muhusil xat nenemien na Hi te xeihen xa mudi pe hen. E xi ipet rat hisemim e melengien hos tei xa xi teling xati ngamu teta. ✡ Siob 22:29; Mat 23:12; Luk 14:11; 18:14; Tem 4:10 7 Reitin, del nenemien xa be tan musa sen nenexoen namim xil vus iha mi Hi, vengan xa eheien nan di e xamim e di milaxat kuh xamim. ✡ Sam 55:22; Mat 6:25-30
8 Muxuxou kuhi e muketeh xol meulien namim vehakut, vengan xa Temat xa be elu namim di mikakao xuxus xorelis xamim e di milang ni suse tengan vapurun xamim vaxo en. Reitin, xi nggoni laeon tei xa mae nggati, xa di milang ves moletin tengan vatal papasi e vaa ni. ✡ 1Tes 5:6 9 Ma, musoh ixeih e neketen namim e musikoe xole tengan namei ti sangas visal xamim. Musoh ixeih imak vengan xa mukila xa tuemim sav xil mun te neketen xa ladi e rute xil vus e ut etan di langgur hisit longpangasien xil taxa xamim di mungguri. ✡ Efes 6:11-13; Tem 4:7 10 E melele xa mulong pangas xamim e tenbemim vuteili, Hi te eheien hos xil vus iling pilei xamim e itutou ni xamim. Xi isak ni neketen namim mei ixeih mu e isak ni nenesien namim naxelial ti mun. Hi xa tekes xamim tengan mei muvisti vatel Iesu Kristo xa minehinen te xeihen nan iti vehakut, xi ipol ni holesok xil ak ve xamim. ✡ 1Tes 2:12 11 !Xeihen te lelaxatien na Hi iti vehakut xa vehakut tang! Reitin.
Sepinien kor
12 Inou di nadis uvei ak xa tamure tang mi xamim del tutouen na Saelas xa be tuxoli hos tei xa di nggusil xat Hi. E uvei ak, ieok bei tengan nasel xat xamim e namiteni xa sepinien xil ak be reitin usil naha xa Hi di pol ni e rin nar ve eheien hos nan. Ma mupol ihusili.
13 Moletin xil te sias xa xiak te hal ‘Babilon,’* Koute te his taon ak tehe ‘Rom.’ E melele te oltestamen, Babilon tehe taon xa mahulong xa tehur xeihen tengan valaxat kantri xil holu e ut etan. E xil latepol ni texeih mi moletin xil na Hi. E tetutou, Hi tesak ni xeihen teni tekesae. xa Hi tehosei xil latehe nan, xil di labit ‘bos makoe’ bat mi xamim xa xamim mun mube nan. Mak mun, xa nggoni natuxoli e neketen, di misa ‘bos makoe’ nan bat mi xamim. 14 Musa hemim metu mi xamim itel eheien na Hi.
Nasis xa tomat na Hi iti mi xamim vus xa di mubisti del Iesu Kristo.
✡5:2: Sion 21:15-17; Pol 20:28
✡5:3: 2Kor 1:24; Plp 3:17; Taet 2:7
✡5:6: Siob 22:29; Mat 23:12; Luk 14:11; 18:14; Tem 4:10
✡5:7: Sam 55:22; Mat 6:25-30
*5:13: Koute te his taon ak tehe ‘Rom.’ E melele te oltestamen, Babilon tehe taon xa mahulong xa tehur xeihen tengan valaxat kantri xil holu e ut etan. E xil latepol ni texeih mi moletin xil na Hi. E tetutou, Hi tesak ni xeihen teni tekesae.