1 «Hantum almalaykaa se kaŋ goo Efez koyraa Egilizoo ra, nee a se:

‹Hayaa ne kaŋ boraa kaŋ kabe hennaa ra handaray iyyaa goo kaŋ ga dira fitilla gorodoo iyyaa gamey ra gʼa har: 2 “Ay ga ni teegoyey, nda ni taabiyanoo, nda ni muɲeyanoo bay, ay ga bay mo kaŋ nʼsi hin ka boro laaley suuri. Nʼna borey sii kaŋ ga nee diyawyaŋ ti ngi, ka gar i manʼti a. Nʼgar taariharkawyaŋ no. 3 Nʼgoo nda muɲeyan, ni hottu ay maaɲoo sabbu se, ni binoo mana hun. 4 Amma haya foo goo ni ra kaŋ si kan ya ne kaŋ ti nʼna ni baji jinaa fur. 5 Hongu nongoo kaŋ ra nʼkaŋ, ma tuubi, ma ni cee jinaa teegoyey tee. Nda mana tuubi, ay ga kaa ni do ka ni fitilla gorodogoo kaa dogoo ra. 6 Amma haya henna foo goo ni ra kaŋ ti nʼga konna Nikolayitey teegoyey kaŋ agay mo ga konna ey.”›

7 Boro kaŋ goo nda haŋa ma maa hayaa kaŋ Irkoy Hundoo gʼa har Egilizey se!

Boro kaŋ hin, ay gʼa noo hunayan tuuroo izey ra kaŋ goo Irkoy saddiŋaa ra a mʼa ŋaa.»

8 «Hantum almalaykaa se kaŋ goo Isimir koyraa Egilizoo ra, nee a se:

‹Hayaa ne kaŋ boraa kaŋ ti ijinaa nda ikokorantaa gʼa har, boraa kaŋ buu, a yee ka huna: 9 “Ay ga ni zaraboo nda ni talkataraa bay, amma almankoyni ti ni, borey kaŋ ga nee Alyahuudu ti ngi, ka gar i manʼti a, ay ga ngi wowey bay, i manʼti kala Šaytan margahugoo. 10 Masi hunbur hayaa kaŋ ga kaa ka ni zarabi. War borey ra, Ibilisi ga hayayaŋ warra kasaa ra ka war sii. War ga duu zarabiyan jirbi woy (10). Laadir hala buuyan ga, ay ga ni noo hunayan fuulaa.”›

11 Boro kaŋ goo nda haŋa ma maa hayaa kaŋ Irkoy Hundoo gʼa har Egilizey se!

Boro kaŋ hin, buuyan hinkantoo si duu a ga fondo.»

12 «Hantum almalaykaa se kaŋ goo Pergam koyraa Egilizoo ra, nee a se:

‹Hayaa ne kaŋ boraa kaŋ kone takuba goo kaŋ mee hinkaa kul ga kan gʼa har: 13 “Ay ga nongoo bay kaŋ ra nʼgoo nda goray, a manʼti kala Šaytan kokoy gorodogoo. Ni hawa ay maaɲoo ga ka boori, manʼay naanaa naŋ ba Antipas waati kaŋ ti ay seede laadirantaa kaŋ i nʼa wii war do, nongoo kaŋ ra Šaytan ga goro. 14 Amma haya kaccu goo ni ra kaŋ si kan ya ne: boroyaŋ goo ni do kaŋ hawa Balam cawandoo ga, Balam ka Balak cawandi a ma kumsay daŋ Izirayel borey se kaŋ gʼi tuti i ma hayey ŋaa kaŋ sargandi toorey maaɲey ga, i ma woy nda aru izefututaray tee.* 2.14 Kabuyaney 22—24; 25.1–2; 31.16. 15 Takaa din da boroyaŋ goo ni do kaŋ hawa Nikolayitey cawandoo ga. 16 Woo se ma tuubi. Nda manʼti woo, ay ga kaa ni ga nda cahãyan, de ay gʼi wongu nda ay miɲoo takubaa.”›

17 Boro kaŋ goo nda haŋa ma maa hayaa kaŋ Irkoy Hundoo gʼa har Egilizey se!

Boro kaŋ hin, ay gʼa noo ŋaahayaa kaŋ se i ga nee man tugantaa. Ay gʼa noo tondi kaaray, tondoo woo maa taaga ka hantumandi a ga, boro kul sʼa bay nda manʼti boro kaŋ ga duu a.»

18 «Hantum almalaykaa se kaŋ goo Tiyatir koyraa Egilizoo ra, nee a se:

‹Hayaa ne kaŋ Irkoy Izʼaroo gʼa har, boraa kaŋ moɲey ga hima nda nuune deene, de cewey ga hima nda alhan nerante: 19 “Ay ga ni teegoyey, nda ni bajoo, nda ni naanaa, nda ni goyoo nda ni muɲeyanoo bay, ni teegoy kokorantey bisa ijinawey. 20 Amma haya foo goo ni ra kaŋ si kan ya ne kaŋ ti nʼna Žezabel, woyoo kaŋ ga nee annabi ti nga naŋ a mʼay tamey cawandi kʼi derandi kʼi tuti i ma woy nda aru izefututaray tee ka hayey ŋaa kaŋ sargandi toorey maaɲey ga.† 2.20 Kokoyey 1na 16.31; 18.19; Kokoyey 2to 9.22. 21 Ay nʼa noo waati hala a ma tuubi, amma a si baa nga ma tuubi ka fay nda nga izefututaraa. 22 Nga ne, ay ga nga nda borey kaŋ ga zina tee a bande warra daari boŋ zarabi beeri ra, nda manʼti i nka tuubi ka fay nda ngi teegoyey. 23 Šikka sii, ay ga izey wii, woo ra Egilizey kul ga bay kaŋ agay no ma boro kuneheroo nda binoo fesufesu. War boro foo kul ay gʼa bana ka sawa nda nga teegoyey.

24 Amma war borey jerey kaŋ goo Tiyatir, ay ga nee war kul kaŋ mana hanga cawandoo woo bande, kaŋ mana hayaa bay kaŋ se i ga nee Šaytan sirrey. Ay nee: ay si jeraw daŋ war ga koyne. 25 Amma hayaa kaŋ goo war kone, wʼa dii ka boori hala ay ga kaa.

26 Boro kaŋ hin, de a nʼay teegoyey dii hala benantaa ga,

29 Boro kaŋ goo nda haŋa ma maa hayaa kaŋ Irkoy Hundoo gʼa har Egilizey se!»