32
1 «Beenaa, haŋajer ay ga šelaŋ!
Laboo, haŋajer ay miɲoo šenney se!
2 Yala ay bayraa ma doo sanda ncirɲi,
yala ay šennoo ma zunbu sanda harandaŋ,
sanda ncirɲi kaŋ goo subu firzi boŋ,
sanda hari kaŋ goo suboo boŋ!
3 Zama ay ga Abadantaa maaɲoo fee.
Wa ir Koyoo beerandi!
4 Nga ti Tondoo, nga teegoyey ga timme,
zama nga fondawey kul ga šerre.
Koy no kaŋ ga laadir, šerre jaŋay sii a do,
a ga šerre, cimikoyni no.
5 I na ngi boŋ hasara, manʼti nga no,
haawoo manʼti kala nga izey wane,
zamankasinay golbante kaŋ ga Irkoy hoo.
6 Takaa woo nda war ga hima ka Abadantaa dii wala, jama hollokom kaŋ sii nda lakkal?
Manʼti ni baaba no kaŋ na ni taka wala?
Manʼti nga ka ni tee ka ni gorandi wala?
7 Hongu waati bisantey,
wa hongu jiiri bisantey zaman ka kaa zaman.
Ni baaba hãa, a gʼa deede ma ne.
Boro beerey hãa, i gʼa har ma ne.
8 Waati kaŋ Jerantaa na gandawey noo tubu,
waati kaŋ a na adamizey fay, a na jamawey hirrey kayandi ka sawa nda Izirayel borey hinnaa.
9 Zama Abadantaa bagaa manʼti kala nga jamaa,
Yakuba ti nga tuboo.
10 A mana duu a kala saaji ganda ra,
saaji bibi kaŋ ga wurru a ga kogu.
A gʼa kuubi kʼa bere, a ga huga nda a,
a gʼa dii sanda nga mootondoo.
11 A ga hima nda dutal kaŋ ga nga izey tunandi nga tejoo ra,
a ga ɲuuti-ɲuuti nga izey boŋ ka nga fatawey kʼi gum kʼi zaa,
kʼi daŋ nga fitawey ra.
12 Abadantaa hinne no mʼa gongu, koy waani kul sii a bande.
13 A nʼa dirandi gandaa hodaddawey ra kʼa ŋandi faarey izey,
tondi yuu no a gʼa sunsumandi,
a gʼa noo jii kaŋ nin tondi ra.
14 A gʼa noo haw waahoonu, nda feeji waa, nda feeji-ize maani,
nda Bašaŋ feeji gaarey, nda jindaarey maanoo,
nda farin hamni.
Nʼga alaneb-izey haroo haŋ nda alaneb hari moora.
15 Yešurun* 32.15 Yešurun manʼti kala Izirayel maa foo. warga, a na tafa. Ni warga, ni naasu, ni yuttu.
A na Koyoo naŋ kaŋ nʼa tee,
a na nga hallasiroo Tondoo kaynandi.
16 I ga nga canseroo tunandi nda koy waaniyaŋ ganayan,
i ga almuhalyaŋ kʼa futandi.
17 I ga sargari kaa ganjey se kaŋyaŋ manʼti Irkoy,
koyyaŋ kaŋ i sʼi bay, itaagayaŋ kaŋ kaa a mana gay,
kaŋyaŋ war baabey manʼi gana.
18 Nʼna Tondoo yala kaŋ na ni daŋ aduɲɲa ra,
ni dirɲa Koyoo kaŋ na ni hay.
19 Waatoo kaŋ Abadantaa dii woo, a mana tee a se,
zama nga izʼarey nda nga ize woyey nʼa dor.
20 A nee: ‹Ay ga agay ndumoo tugu i se,
ay ga dii haya kaŋ noo ngi kokoroo ga ti a.
Zaman laala izeyaŋ no,
izeyaŋ no kaŋ si laadir.
21 I nʼay canseroo tunandi nda hayayaŋ kaŋ manʼti Irkoy,
i nʼay futandi nda haya yaadayaŋ.
Agay, ay ga ngi canseroo tunandi nda haya kaŋ manʼti jama,
ay gʼi futandi nda dumi hollokom.
22 Ay futuroo nuunaa dii,
a ga dii hala alaaharaa kunehere,
a ga laboo nda nga hayey kaŋ ga zay a ra ŋaa,
a ga dii hala tondi hondey asaasey ga.
23 Ay ga bone marga kʼa zumandi i boŋ,
ay ga ay birawey benandi i ra.
24 Heray gʼi ɲoomandi, gaaham konni nda wirci laala kaŋ ga bere gʼi ŋaa,
ay ga ganjihoogawey hiɲey nda gandakoyey naajey sanba i ga.
25 Taraa ra, takuba ga ngi izey wii,
hugoo ra, hunburay gʼi wii,
takaa follokaa no ma tee arusooga, nda woysoogo,
nda ize taana, nda hinbiri kaaray se.›
26 Ay nee ay boŋ se: ‹Ay gʼi say-say kʼi benandi,
ay ga kate borey masi yee ka hongu ey,
27 nda ay mana hunbur iberoo ma fooma ay ga, ngi yenjekaarey ma dere
ka nee: “Ir gaaboo kʼir ka hin, manʼti Abadantaa ka woo tee.”
28 Zama ganda no kaŋ mana duu hoyray henna,
lakkal sii i se.
29 Nda a gar i mma bara nda lakkal i ga faham woo se,
i ga ngi kokoroo guna.
30 Taka foo nda boro foo ga boro zenber foo (1.000) gaaray?
Taka foo nda boro hinka ga boro zenber woy (10.000) gaaray,
nda ngi Tondoo manʼi nondi,
nda Abadantaa manʼi daŋ kabe ra?
31 Zama ngi tondoo manʼti ir wanoo dumoo,
ba ir iberey ga tee woo se seede.
32 Ngi alanebɲaŋoo mana hun kala Sodom nda Gomor† 32.32 Sintinoo 18.20–21; 19.4–11. alanebɲaa faaroo ra,
ngi alaneb-izey manʼti kala alaneb-izeyaŋ kaŋ ra pozina goo,
ngi fafey ga hottu.
33 Ngi alaneb hari mooraa manʼti kala gandakarfu naaji,
gondi kaŋ ga wiiya naajoo no.
34 Woo mana tugandi ay jeroo ga wala?
Manʼti agay alman jisidogoo ra a goo wala?
35 Agay no ma bana, agay no ma alhaku kaa
waati kaŋ ngi cewey ga tanši.
Zama almasiibaa zaaroo ga baa ka kaa i ga.
Hayaa kaŋ kayandi i se ga kaŋ i boŋ nda cahãyan.›
36 Abadantaa ga nga jamaa ciiti,
amma a ga hinna nga tamey se,
waati kaŋ a ga dii kaŋ ngi sahã ben,
de mo baɲɲa mana cindi, borcin mana cindi.
37 A ga nee: ‹Man ra ngi koyey goo,
tondoo kaŋ ga i ga talfi?
38 Man ra borey goo kaŋ na ngi sargarey maaney ŋaa,
i na ngi sargari hari-harey alaneb hari mooraa haŋ?
I ma tun, i ma war faaba,
i ma tee war hallasidogoo.›
39 Sohõ wa guna, agay no, cimi no agay no,
koy sii no kala agay.
Agay no ma wiiya, agay no ma hunandi,
agay no ma boro maray, agay no mʼa noo baani.
Boro si boro kaa ay kaboo ra.
40 Zama ay nʼay kaboo jer beenaa here,
ay ga nee: ‹Ay ga žee ay hundi duumantaa ga.
41 Nda ay nʼay takubaa kaŋ ga hima nda meli miɲoo kaanandi,
nda ay kaboo na ciitoo dii,
ay ga bana ay iberey ra,
agay alhakoo ga hun ay konnaykey ra.
42 Ay birawey ga suu nda kuri,
ay takubaa ga bukawey nda baɲɲey hamey nda ngi kuroo ŋaa,
ba iberey boŋkoyney kurey.›
43 Gandawey cindey, wa war ɲaaloo cebe Irkoy jamaa se.
Zama a ga faasa nga tamey kurey se,
a ga alhakoo kaa nga yenjekaarey ra,
a ga nga laboo zunubey yaafa nga jamaa se.»
44 Musa kaa, nga nda Hoše‡ 32.44 Hoše da se i ga nee Žozuwe, Kabuyaney 13.8, 16ra., Nun izʼaroo ka baytoo woo kalimawey kul har jamaa jine.
45 Waatoo kaŋ Musa na šenney kul har Izirayel kul jine ka ben, 46 a nee i se: «Wa miile šenney kul ga kaŋ ay nʼi har war se hõ ka war izey yaamar i ma gaabandi ka ašariyaa šenney wey kul ka dira. 47 Zama manʼti šenni yaadayaŋ no war se, war hunaroo no. Šennoo woo no ma war noo aloomur laboo ga kaŋ war ga kaa kʼa mayray Žurdeŋ isaa deŋyanoo banda ga.»
Musa buuyanoo bayrandi
48 Zaari follokaa din da ra, Abadantaa šelaŋ Musa se ka nee: 49 «Žigi Abarim tondi hondey ga, Nebo tondi hondoo boŋ kaŋ goo Mowab gandaa ra, Žeriko tenje, ma Kanaŋ gandaa guna kaŋ ay gʼa noo Izirayel borey se a ma tee ngi halaalaa. 50 Nʼga buu tondi hondoo boŋ kaŋ ga nʼga žigi, nʼga ni hayragey gar alaaharaa, sanda Haruna, ni armaa kaŋ buu Hor tondi hondoo ga, de a na nga hayragey gar alaaharaa. 51 Zama war na laybu beeri tee ay ga Izirayel borey game, Meriba kaŋ goo Kadeš haroo do, Tisin saajoo ra, war manʼay henanyanoo cebe Izirayel borey game.§ 32.51 Kabuyaney 20.1–13. 52 Nʼga gandaa honnay ni jine, amma nʼsi huru gandaa ra kaŋ ay gʼa noo Izirayel borey se.»