1 Isa yee ka zaabi ka šelaŋ i se nda filla yaasayante ka nee: 2 «Beenaa Laamaa ga hima nda kokoy kaŋ na hiijay hoyandi tee nga izʼaroo se. 3 A na nga tamey sanba i ma hoyandikey cee. Amma hoyandikey mana baa ngi ma koy. 4 A yee koyne ka tam fooyaŋ sanba ka nee: ‹Wa nee hoyandikey se: “Nga ne, ay ŋaahayaa soolu. Ay haw yaarey nda agʼalman naasey koosandi. Hayey kul soolu. Wa kaa hiijaa ra.”› 5 Amma i mana hoyandoo daŋ assal, affoo kul koy nga fondaa ra. Affooyaŋ koy ngi faarey ra, affooyaŋ ngi maamalaa ra. 6 Wey kaŋ cindi na tamey dii kʼi zarabi kʼi wii. 7 Kokoyoo futu, a na nga soojey sanba i ma borowiikey din halaci ka ngi koyraa ton. 8 Woo banda ga, a nee nga tamey se: ‹Ŋaahayey soolu, amma hoyandikey mana hima nda a. 9 Adiši wa koy nongey kaŋ ra fondawey ga cere kubay, boro kul kaŋ war nʼa gar no din, war mʼa cee a ma kaa hiijaa ra.› 10 Tamey din fatta ka koy fondawey bande ka borey kul marga kaŋ i duu ey, ilaala nda ihenna. Hiijaa hugoo too.

11 Kokoyoo huru ka dii hoyandikey, a dii affoo kaŋ ga hiijaa hoyandoo darbaa sii. 12 A nee a se: ‹Ay ceroo, taka foo nda ni huru ne ra hiijaa hoyandoo darbaa sii ni jindoo ra?› Boraa dangay suk. 13 Kokoyoo nee tamey se: ‹Wa cewey nda kabey haw, war mʼa warra taray, taray kubaa ra. No din ra hẽeni nda hiɲekaamayan ga tee.› 14 Zama boro boobo goo no kaŋ ciyandi, amma Irkoy boro suubantey ga kacca.»

15 Woo banda ga, Fariziyeŋey koy cere guna ka dii taka kaŋ nda ngi na Isa dii nda nga meešennoo. 16 I na ngi taalibey nda Herod kondaa borey sanba a do ka nee: «Alfagaa, ir ga bay kaŋ cimi harkaw ti ni, nʼga Irkoy fondaa cawandi nda cimi, koyne mo nʼsi hunbur boro kul. Nʼsi borey ndumey guna. 17 Adiši ir bayrandi woo kaŋ nʼgʼa hongu. A ga hima alkaasi ma banandi kokoy beeroo se wala a si hima?» 18 Isa na ngi laalayyanoo bay, a nee: «Macin se war gʼay sii, almunafikey? 19 Wa alkaasoo nooroo cebe ya ne.» I kate a se nzorfu kaaray tamma foo. 20 A nee i se: «May biyoo nda nga maaɲoo ti woo?» 21 I nee a se: «Kokoy beeroo.» Waatoo din a nee i se: «Adiši wa kokoy beeroo hayey noo kokoy beeroo se, Irkoy waney, war mʼi noo Irkoy se.» 22 Boŋey haw nda woo kaŋ i maarʼa, i na Isa naŋ ka koy.

23 Zaari follokaa ra, Sadusiyeŋey kaŋ ga nee tunyan si bara man Isa, i nʼa hãa 24 ka nee: «Alfagaa, Musa nee: ‹Nda aru buu a mana duu ize, nga armaa ga hiija woyoo hala a ma duu bukaa se ize.›* 22.24 Alhukumoo 25.5–6. 25 Arma iyye bay ka bara ir ra, ijinaa hiiji, a buu a mana duu ize. Armaa na wandoo zaa. 26 Takaa din da ihinkantoo, ihinzantoo hala iyyantoo ga. 27 I kul dumaa ga, woyoo mo buu. 28 Adiši tunyanoo hane, iyyaa ra, may se a ga tee wande? Zama i kul hiiji a ka bisa.»

29 Isa zaabi ka nee i se: «War dere, war si Citaaboo bay, war si Irkoy hinoo bay. 30 Zama tunyanoo hane, arey si hiiji, woyey si nondi hiijay. Amma i mma tee sanda almalaykayaŋ beenaa ra. 31 Bukawey tunyanoo šennoo ga, war mana bay ka hayaa caw kaŋ Irkoy nʼa har war se: 32 ‹Agay ti Ibirahima Koyoo, Isiyaka Koyoo, Yakuba Koyoo?›† 22.32 Fattaroo 3.6, 15. Irkoy manʼti bukawey Koyoo, baahunantey Koyoo no.» 33 Alžamaa kaŋ ga haŋajer a se, nga cawandoo tee i se boŋhaway.

34 Waatoo kaŋ Fariziyeŋey maa kaŋ Sadusiyeŋey dangay suk Isa jine, i na cere marga. 35 Ngi affoo [kaŋ ti ašariyaa baykaw] nʼa sii kʼa hãa ka nee: 36 «Alfagaa, ašariyaa yaamarey kul ibeeroo ti affoo?» 37 Isa nee a se: «‹Ma baa ni Koyoo Irkoy nda ni binoo kul, nda ni hundoo kul, nda ni lakkaloo kul.›‡ 22.37 Alhukumoo 6.5. 38 Woo ti yaamarey kul ibeeroo, nga ti yaamar jinaa. 39 Ihinkantoo ne kaŋ ga hima nda ijinaa: ‹Ma baa ni cinaa sanda takaa kaŋ nda nʼga baa ni boŋ.›§ 22.39 Sargarey 19.18. 40 Yaamar hinkaa woo ga, ašariyaa kul nda annabey ga deeja.»

41 Waatoo kaŋ Fariziyeŋey marga, Isa nʼi hãa 42 ka nee: «Macin no war gʼa hongu Almasihu ga? May ize no?» I nee a se: «Dawda Haamaa no.» 43 A nee i se: «Adiši taka foo nda Dawda Irkoy Hundoo hinoo ra gʼa cee nda Koy ka nee: