Hibulu
Isilaeli wenena mono lufuwa wi fulo gedami ka
Komu ka
Lufuwa ama ya Yuda wenena Yesu koli kikito umamo ya lufuwa wi fulo gedami we kuliya ya kolámone. Yuda wenena ya Hibulu ka lamo yamu Hibulu wenenale, loto lo-lo one.
Hibulu wenena maleka ya Yesu kala kuwa kuwolafo-mota minamo yate Hibulu wenena Yesu koli kikito umamo ya olu keina mofu gedanako, koli kikitamo wenenawa yauti maleka yate itibito uto Yuda mono kanina kofa meyalo melenune, loti kolamo ne. Eti o minamo yamu ya lufuwa ama wiyami we yakafo Yesu ya Goti Nalafo lawoko ona kula nemo yakafo enisoleki, adeina polofeteki, Moseseki, Aloniki ido Goti yokila ki umu-umu amo we muki yaki olu afima o gedaima nenako, kate ligi-ligi kiyámoto, moda koli kikito umuto, kala meyalo meleto, auma wi kiki loto monimo wokele, loto lufuwa amau ya auma wito logimami ne.
1
Yesudokati ya Goti monala eyefe lenumo ka
1 Komu adeina Gotikafo autefo-kolofate-mota ka logimami, ya kamena malo-malo ido mona ailo-ailo ya polofete wenido melaito, mona gilibimo idamo ne. 2 Etito nefa, ido oiya ama kamena naba alitido ya moda Nalafo welalo melaito mona lilibami ne. Ido aya we Nalafo ya neta-mata muki moda aboga minenaiye, loto iyaina o edami we, ya mika kosina muki olu oloto pinae, loto imo, ya Nalafokafo olu oloto pi fuli limo ne. 3 Amo ya Goti ekeina lamenala ido aimola lebonala ona minoto, ido kala aumala nemo yakafo neta-mata muki olu auma wi gede minami we yakafo lifima noku wiyami lonola olu fuli loito, ya akaiya kuliyai we wenaba ana onaleka amedoto minaiye.
Yesu yamo enisole olu fulo gedeto nemo ka
4 Etito Melafokafo Nalafo kuliya naba iya ku edami yakafo enisole kulini olu fulo edami yamaidana oto amo moda dito neto, ido enisole ya lumuti minae. 5 Moda kolafe? Amokafo eti limo,
Namo ya onema kamo kedoneto, ya nanimo Nanefo ya minane,
loto loumuto (Sng 2:7), ido ka ma ya eti limo,
Namo ya Melafo minoneto, ido amo ya nanimo Nanefo minenagoliye,
loto ka mono lufuwau (2 Sml 7:14) nemo ka ya enisole mamu life? E’e, enisole yamu ádaiye. 6 Ido Kana Nalafo mikaleka ilifi melenae, loto imo kamenalo yaki ka ma ya eti limo,
Goti enisolela muki ya oudi-luti-kati umalo,
loto ka mono lufuwau (Lo 32:43, Sng 97:7) ya nemo ne. 7 Ido ka ma ya enisole yamu ya eti limo,
Kouba-naba wenenala enisole ya epe yaidana oto, ido yo famula yaidana oto olufe limo ne,
loto ka mono lufuwau (Sng 104:4) nemo ka ya enisole yamu lifa, 8 ido Nalafo yamu ya eti limo,
Gotiyo, kamo ekeina folomokalo ya kiyaba we wekudi minowa-minowa oto minomo dito minane.
Ido kiyaba we wekudi lono olanimo ya moda efe limo mona yakafoko kiyaba o gedemo idane.
9 Efe limo mona ya koli lalo umuto, ido lo melami ka meni umamo mona ya eleka naba-naba kofainako, yamu Goti, kamo Gotika yakafo koinakafo-mota olu fulo gedeto seka-muluga laloko kolinane, loto ya yá nowala fili kedomo ne,
loto ka mono lufuwau (Sng 45:6-7) nemo ka ya Nalafo loumami ka ya ne. 10 Ido ka ma ya eti loto loumami,
Wekolao, kana monau akaima ya mika olufe loto aumala umuto, ido kamo agakafo kosina yaki olufe lanima ne.
11 Netawa muki ya moda u kopa unagolifa, ido kamo ya moda minowaminowa oto minomo dito minane.
Muki ya ukanido owo yaidana oto lila melageto, 12 wenena ya kunu wakoti olu uku loti loloukamo yaidana oto kamo ya mika kosina muki olu uku loto lolokunanimo ne.
Ido wenena ukanido owo ma olu fuliti, ailo ma oluti wiyamo yaidana oto kamo ya mika kosina muki ya olu fulito, ailo ma olufe lenanimo ne.
Etito nefa, ido kamo kaimoka ya monau akaimati minanimo ya moda ayaidana otoko minomo uto uto, kamenaka ya fuli ádenami ne,
loto ka mono lufuwau (Sng 102:25-27) nemo ka ya Nalafo loumami ka ya ne. 13 Ido ka ma ya eti loto loumami,
Ane onaleka amedoto kiyaba oto minageto, ya kuwokafo-mota fulo kiyaga feumau gedenagolowe,
loto ka mono lufuwau (Sng 110:1) nemo ka ya kamena malo ya enisole mamu yaki life? E’e, enisole yamu ádaiye. 14 Enisole muki ya Goti kouba-naba wenenala, ouna-ana yaidana oti minamo, ya olu omuni kenami mona mele gedami wenena ani olu faka lenawae, loto gilifi melami ne, loti ya ma kolámafe?