10
Isilaeli wenena yate Goti monala ya kolife ádamo ka
1 Ena mono wenenane-motao, Isilaeli wenenane yamu kolito Goti loumomo, ya olu omuni ko gedageto ya sene-muluneu lalo kolinae, loto loumumo idowe. 2 Wenenawa yate Goti yamu auma witi kolafa, ido kolife ádo minae. Aya monanina ya geyefe loto ya lowe. 3 Gotikafo monatina efe limo wenena minae, loto lo ledenami mona yamu kolife ádoti, lo melami ka meyalo melenumo ya Goti omunalo ya monate efe lenagoliye, loti inanimo monanina yamuko kolimo idamo yamu ya Gotikafo monatina efe limo wenena minae, lo gedenami kanu ya meni umu minae.
4 Yamu kolalo. Kilistokafo Goti lo melami ka ya moda efe loto meyalo mele fuli lo fulitami, yamu koli kikitamo wenena muki ya ebate oluto aimola efe limo monalawa ya lamodoka meleto, ya monatina efe limo wenena minae, loto lo ledami ne.
5 Kolafe? Lo melami ka meyalo melado ya monatina efe limo wenena minae, loto lo gedenami mona yamu Mosesekafo eti loto lufuwa wiyami,
Lo melami ka lonowa olunawamo wenena ya kawa muki meyalo melenawamo yako omuni kofawa minenawae,
loto ka mono lufuwau (Wkp 18:5) ya nemo ne. 6 Eti loto nemo nefa, ido koli kikitamo yamu ya monatina efe limo wenena minae, loto lo gedami mona yamu eti limo,
Linate kema ya kosinauka dinami ne? loti seti-muludigu kolámalo,
loto ka mono lufuwau (Lo 30:12) nemo ka, ya dito Kilisto ilimito lumunuwe, loti seti-muludigu kolámalo, loto limo ne. 7 Ido,
Kema ya no-lowa feumau ya lumunami ne? loti yaki seti-muludigu kolámalo,
loto ka mono lufuwau (Lo 30:13) nemo ka, ya lumuto Kilisto folaiguti olu nedi edeto ilimito dinune, loti yaki seti-muludigu kolámalo, loto limo ne. 8 Aya ka ya nediye liye?
Kawa kuwa ya moda linatedoka adu meleto minoto, ya lutigu wetigu moda mino gedaima ne,
loto ka mono lufuwau (Lo 30:14) nemo ka, ya kawa kuwa koli kikitenawae, loto lo oloto melemele onimo ka ya ne.
9 Moda kolafe? Kamo ya Yesu ya Wekola ne, loto wekakafo lo oloto melenanimo, ido Gotikafo folaiguti olu nedi edami ne, loto seka-mulugau koli kikitenanimo, ya olu omuga kenami ne. 10 Koli minafe? Lutekafo koli kikitenumo ya Gotikafo monatina efe limo wenena minae, loto lo ledenagoliye. Ido wetekafo lo oloto melenumo ya olu omude kenami ne.
11 Aya yamu ya eti limo,
Amo koli kikito umamo wenena muki ya ukanido kolámenagilae,
loto ka mono lufuwau (Ais 28:16) ya nemo ne. 12 Etito ya Yuda wenena, Giliki wenena, ailo feka wenena olu ailo-ailo itenami ma minámaiye. E’e, Wekola lawoko ya muki Wekolate nenako, amokafo wenena muki lula finawamo ya olu lalo o gedemo dinagoliye. 13 Aya yamu ya eti limo,
Wekola kuliyalo lula finawamo wenena muki ya olu omuni kenami ne,
loto ka mono lufuwau (Jol 2:32) ya nemo ne.
14 Etito nemoma nenako, yamu mate koli kikito umámamo wenena ya egaidana oti lula finawamo ne? Ido kala kuwa kolámamo wenena ya egaidana oti koli kikito umunawamo ne? Ido kawa kuwa lo oloto melenami we ma minámenami ya egaidana oti kolinawamo ne? 15 Ido gilifi melámenawamo ya egaidana oti lo oloto melenawamo ne? Aya yamu ya eti limo,
Ka lalo oluti oti lo oloto melamo wenena ya kiyani omona biyane ne, loti muluni idaito lalo geyamo ne,
loto ka mono lufuwau (Ais 52:7) ya nemo ne.
Isilaeli wenena koli kiki ádamo ka
16 Etito nefa, ido kawa kuwa lalo ya ma koliti kolámoti o minae. Yamu ya Aisaiyakafo eti limo,
Wekolao, ka wetata o gimonimo ya kemakafo koli kikito minaiye?
loto ka mono lufuwau (Ais 53:1) ya nemo ne. 17 Etito kawa kolinawamo yako koli kikitenawamo ne. Ido Kilisto kala lo oloto melenawamo yako kolinawamo ne.
18 Etito nemo nefa, ido ka ma lenagolowe. Kolalo. Amo ya kawa kuwa ya ma kolámafe? E’e, moda kolitamo ne. Aya yamu ya eti limo,
Noni lebona mikau-mikau u fulitami,
ido ka lamo ya eba negu-negu ba lomo u fuli limo ne,
loto ka mono lufuwau (Sng 19:4) ya nemo ne. 19 Ido ka ma lenagolowe. Kolalo. Isilaeli wenena yate kolife ádafe? E’e, moda kolife lotamo ne. Aya yamu Mosesekafo komu Goti welaloti ya eti limo,
Namo ya wenena ma kulini minámami ya olu faka lo gedenamo, ya linate komumu winagilae. Wenenawa ka maninigu minámami ya ani olu faka lo gedenamo, ya linate seti kala-kala lenagoliye,
loto ka mono lufuwau (Lo 32:21) ya nemo ne.
20 Ido aiga Aisaiyakafo Goti welaloti ka ma auma wito eti limo,
Namo monine wilámamo wenena yate olu oloto pi nedamo ne. Namomu koliti loga-miga ámamo wenena ya monane olu oloto pi gimomo ne,
loto ka mono lufuwau (Ais 65:1) ya nemo nefa, 21 ido Isilaeli wenena yamu eti limo,
Luni-kani gedito, ka koliti kolámoti amo wenena ya kamena fana ane folado gimomo ne,
loto ka mono lufuwau (Ais 65:2) ya nemo ne.