81
Sɛnwee wi daga
mbaa nuru Yɛnŋɛlɛ li yeri
mbaa nuru Yɛnŋɛlɛ li yeri
1 Yurukɔɔlɔ to wi sɛwɛ yurugo, pe maa ki koo na Gati ca fɛnnɛ ŋgɔni gbɔɔn. Asafu Yɛnŋɛlɛ gbɔgɔyurugo.
2 Yaa yuuro koo Yɛnŋɛlɛ li kan yɔgɔrimɔ ni,
katugu lo li maa fanŋga kaan we yeri!
Yaa Zhakɔbu Yɛnŋɛlɛ li sɔnni magaŋgbɔlɔ ni!
3 Yaa yuuro koo, yaa pimbigile gbɔɔn,
yaa ŋgɔni magandanla woo gbɔɔn konaa juru ni.
4 Yaa mbanlaga ki wiin yevɔnŋgɔ fɛti wi na,
na yeŋge kiga ka wali, ye mbanlaga win we fɛti pilige ki na† 81.4: Zhufuye pàa pye na yevɔnŋgɔ fɛtiye piin, (Ɛki 28.11-15; Amɔ 8.5). Na yeŋge kiga ka wali, pe ma gbogolo fun ma fɛti wa yɛgɛ pye (Levi 23.24,34; Nɔmbu 29.12-39)..
5 Katugu ki yɛn kondɛgɛlɛ ma Izirayɛli woolo pe kan,
ki yɛn Zhakɔbu Yɛnŋɛlɛ lo kakɔnndɛgɛlɛ.
6 Ki yɛn ŋgasele na làa kan Zhozɛfu setirige piile pe yeri,
sanga ŋa ni làa yiri Ezhipiti tara fɛnnɛ pe kɔrɔgɔ we.
Mìla magala la logo, na mi sila jɛn, ma yo fɔ:
7 «Mì tuguro ti tugu mari laga wa ye pajoro ti na,
ma ye kɛyɛn yi wɔ tunŋgbanra ti kanjapige lɛmɛ pi ni.
8 Wagati ŋa ni yàa ye wa jɔlɔgɔ ki ni, yàa gbele mala yeri, a mì ye shɔ.
Mala ta wa yɛnŋɛlɛ gbaanra ti sɔgɔwɔ, mìla ye yɔn sogo,
mìla ye wa ma wele wa Meriba tɔnmɔ laga ki ni† 81.8: Ɛki 17.7; Nɔmbu 20.13.
Wɔnmatigiwɛn laga.
9 Na woolo, yaa nuru na yeri, mi yaa yɛrɛwɛ kan ye yeri!
E, Izirayɛli woolo, ndɛɛ ki pye ye mbe ja yɛnlɛ mbaa nuru na yeri, ki mbe jaga jɛn!
10 Yarisunŋgo ka yɛgɛ si daga mbe yan wa ye yeri,
yaga ka kanŋguuro kan cɛnlɛ la yɛgɛ yarisunŋgo yɛgɛ sɔgɔwɔ mbege gbɔgɔ† 81.10: Ɛki 20.2-3; Dete 5.6-7.
11 Muwi mi yɛn Yawe Yɛnŋɛlɛ, ye Yɛnŋɛlɛ le,
na lì ye yirige ma ye wɔ wa Ezhipiti tara;
ye ye yɔn ki yɛngɛ jɛŋgɛ, mi yaa ye kan ye tin.
12 «Ɛɛn fɔ, na woolo pee logo na yeri,
Izirayɛli woolo pee yɛnlɛ na na.
13 Kona, a mì si pe yaga wa pe nuŋgboŋgbanla li ni,
a pe nɛɛ tanri pe yɛɛra nandanwa koŋgolo ke na.
14 «E, ndɛɛ ki pye na woolo pe mbe ja yɛnlɛ mbaa nuru na yeri,
ndɛɛ Izirayɛli woolo pe mbe ja yɛnlɛ mbaa tanri na koŋgolo ke na,
15 mi jɛn na pe juguye pe go sogo pe kan le ki yɔngɔlɔ nuŋgba ke ni,
mi jɛn nala kɛɛ ki yirige pe winfɛnnɛ pe na.
16 Kona Yawe Yɛnŋɛlɛ li yɛn ma mbele mbɛn, pe jɛn naa fɔli li yɛgɛ sɔgɔwɔ.
Pa ko ki jɛn na kɔn mbe tɛgɛ pe kan fɔ sanga pyew† 81.16: Ŋga kì yo fɔ: Pa ko ki jɛn na kɔn mbe tɛgɛ pe kan fɔ sanga pyew, Yɛnŋɛlɛ sɛnrɛ sɛwɛɛlɛ pele ni, ki yɛn ma yɔnlɔgɔ ma yo fɔ: Pa kona Izirayɛli woolo pe jɛn na fɛrɛwɛ ta fɔ sanga pyew..
17 Yɛnŋɛlɛ li jɛn naa pe baro bile wi ni fuun tiyɔɔn wo ni,
mbe waliwege sɛnrɛgɛ kan pe yeri pe ka pe tin jɛŋgɛ.»
†81:4 81.4: Zhufuye pàa pye na yevɔnŋgɔ fɛtiye piin, (Ɛki 28.11-15; Amɔ 8.5). Na yeŋge kiga ka wali, pe ma gbogolo fun ma fɛti wa yɛgɛ pye (Levi 23.24,34; Nɔmbu 29.12-39).
†81:8 81.8: Ɛki 17.7; Nɔmbu 20.13
†81:10 81.10: Ɛki 20.2-3; Dete 5.6-7
†81:16 81.16: Ŋga kì yo fɔ: Pa ko ki jɛn na kɔn mbe tɛgɛ pe kan fɔ sanga pyew, Yɛnŋɛlɛ sɛnrɛ sɛwɛɛlɛ pele ni, ki yɛn ma yɔnlɔgɔ ma yo fɔ: Pa kona Izirayɛli woolo pe jɛn na fɛrɛwɛ ta fɔ sanga pyew.