16
Zobi
1 Olaṉa se Zobi,
2 “Ele avosi qua sari zinama gugua arini;
sari minanoto tamugamu si vari sigiti hola i.
3 Vea, kote loke vina betona sa zinama tamugamu?
Na sa kamo gamu ke toke la au mo gamu?
4 Be guana gamu si tasuna meke arau si atu va manoto,
si kote zama va gelenae gugua tugo gamu si arau.
Kote nuke ia rau sa batuqu koari na qua zinama leleadi.
5 Kote va ṉiṉira gamu rau koari na qua zinama variva manoto,
meke vagi pani sari mia tinalotaṉa.
6 Ba pana zama rau kamahire si lopu beto sa sigiti,
meke pude lopu zama gua si koa eko nana tugo sa sigiti.
7 Kei Tamasa, ele va mabo au Goi,
Qua tatamana si huara pania Agoi.
8 Guana hiva va sosode ia Agoi sapu arau tugo si sea,
ke va viviqe au Goi; na kapu meke susuriqu mo si koa.
Ari tie si doṉo la ia mo sa tiniqu meke zutu au mo.
9 Gina ta ṉaziri nau sa Tamasa si arau,
ke daku lulura pani au Sa,
garata livo meke doṉo va bubugorae mae au Sa.
10 Va sisire meke hegere nau ri tie,
vari likohae nau rini meke poharau rini isumataqu.
11 Luara vala nau sa Tamasa koari tie pu lopu vahesina si Asa,
oki vala nau Sa pa limadia rina tie kaleadi.
12 Korapa koa va leanaqu meke mae huara pania Sa qua tinoa,
kunele vagi au Sa meke seke va munala pani au Sa,
meke va turu veko au Sa pude Nana gonagonana tupi.
13 Gona nau tupi rini pa doduru vari kaliqu,
gona goto i Sa sari na leleqataqu, namu loke Nana tataru;
sa pepeso si boboso mo pa eharaqu.
14 Va bakora pilipule au Sa,
komitau Sa guana keke varane sapu hiva va mate tie hola.
15 Kuliusu si rau ke va sage poko baika,
meke habotu qua pa kavuru.
16 Ziṉara nia mataqu sa kinabo,
meke moqo sari mataqu guana huporo vari likohaedi.
17 Ba loketoṉa si tavete va sea ia arau,
meke toṉotona sa qua vinaravara la koasa Tamasa.
18 Kei pepeso, mu lopu tomea sa sinea sapu ta evaṉa mae koa rau,
mu lopu va nosoa sa qua tinepa pude harupau pa tinoṉoto.
19 Koanana pa Maṉauru sa tie sapu kote zama poni au,* Zob 19:25
asa kote toketoke hukata nau pa Maṉauru.
20 Zama poni au sa qua baere,
sipu korapa zoloro la koe Tamasa sa kolo mataqu.
21 Na hiva nia rau si keke tie pude tepatepa poni au koe Tamasa,
gua sa tie sapu tepa sisigiti koari nana baere.
22 Sari qua vuaheni si korapa hola taloa,
meke kote ene taloa si rau meke lopu kekere pule mae.