17
1 Na leana tu sa hena bereti popana pa binule,
hola nia sa vetu sapu inevaṉa lamo, turaṉae ninominomi.
2 Na nabulu gilaena kote kopu nia sa koburu tavia sapu variva kurekurena,
meke kote vagi nana hinia guana keke mo koari kasa tamatasi koreo.
3 Na nika va kolo i sari siliva na qolo pude va via i,
ba e Zihova podeki sari na bulo.
4 Na tie kaleana si va avoso la koarini pu kaleana berudi;
na tie kokoha va taliṉa la i sarini pu sekesekei meadi.
5 Asa pu va sisire nia sa tie malaṉa si zama va gorea si Asa pu tavetena,
meke asa pu qetu totoso kamo sa tinasuna koari kaiqa si kaqu tava kilasa.
6 Sari tudia ri na tuna si na qinetuqetu tanisa barogoso,
meke sari na kaleqe na barogoso si na vinahesi tadi koburu.
7 Na tie bokaboka pa zama si lopu goto la koasa pu pekipeki,
gua tugo sa beru kokoha koasa baṉara.
8 Na tinabara golomo si na tiṉitoṉa arilaena koasa pu tavetia;
be pavei si la gua sa ba bokaboka nana.
9 Asa pu taleoso nia sa sinea si tozi vura nia sa tataru,
ba asa pu tavete pulea sa sinea si vari paqaha ni sari na baere soti.
10 Na ginegese si leana la koasa tie pu balabala valeana,
hola nia sa sineke keke gogoto totoso pa mudina sa tie pekipeki.
11 Sa tie va gugue si hata ia pude va gore ia sa binaṉara;
ba na tie variva mate si kote ta garunu la pude va kilasia.
12 Leana hola si pude tutuvia sa tinadia rina tuna bea,
hola nia sa tie duviduvili totoso ilipuṉana sa.
13 Be lipu nia kinaleana sa tie sa lineana,
si sa kinaleana si lopu kaqu taluarae pa nana vetu.
14 Pude podalae varitokei si guana pinodalaena sa naqe,
ke va nosoa sa vivinei sipu lopu ele kamo sa vinari velavelai.
15 Pude rupahia sa tie sea meke pusia sa tie toṉoto
si lopu leana beto mo koe Zihova.
16 Nasa sa laena sa poata pa limana sa tie pupuhu,
sipu loke nana hiniva pude tava tumatumae.
17 Na baere si koa ia tataru doduru totoso,
meke sa tasimu si podo pude toka nigo pa totoso tasuna.
18 Na tie lopu tumae balabala mo si va egoa pude tabaria sa gale pana lopu boka si keke,
meke vekoa sa si keke nana tinago pude zuka ia sa gale tanisa turaṉana.
19 Asa pu qetu nia sa vinari tokei si qetu nia sa sinea;
asa pu zama ni sari nana tinago doduru totoso si tepa tinasuna.
20 Sa tie pu boni bulona si lopu koa va leana;
asa pu sekesekei meana si hoqa pa tinasuna.
21 Pude na tie pekipeki sa tumu si variva talotaṉa;
loke nana qinetuqetu sa tamana sa koburu duviduvilina.
22 Na bulo qetuqetu si na meresena leana,
ba sa maqomaqo talotaṉana si va popa i sari susuri.
23 Na tie kaleana si ade vagi tinabara golomo,
pude va sea ia sa hahanana sapu toṉoto.
24 Sa tie bakabakala si kopu nia sa ginilagilana pa kenuna,
ba sari matana sa tie pekipeki si ene betoa sa kasia popoa pa ninunala.
25 Na koburu pekipekina si va kamo tinalotaṉa koasa tamana,
meke tinasigiti koasa pu podona.
26 Lopu leana si pude va kilasia sa tie toṉoto,
babe sekei sari koimata koari na dia tinoṉoto.
27 Na tie gilagilana si hoke visavisa nana zinama,
meke sa tie gilae si kopu pule nia.
28 Ura na tie pekipeki si guana tie gilaena pana noso si asa,
meke guana tie balabala va leanana pana lopu kulu si asa.