7
Sa Hahanana Kaleana te Izireli
1 Kei, na tinalotaṉa nomana si taqarau!
arau si guana tie oviana sapu pudiki vuvua pa mudi totoso pakepakete
sapu pudiki sapu ta veko holadi pa inuma vaeni;
meke loke kata qurepi si koa hola pude boka hena ia,
lopu keke piqi sapu saganana gua sapu okoroni rau.
2 Sari tie madidi pu vahesia sa Tamasa si ele ta vagi taloa koasa popoa;
lopu keke tie toṉotona si koa hola.
Doduru tie si aqa seke va mate tie mo;
hopeke hukue vagi mo rini sari tasidia.
3 Karua lima beto si bokabokadi pude tavete va kaleana;
sa baṉara si tepa vinariponi,
sa tie varipitui si va tabe tinabara golomo,
sari tie nomadi si tozia mo gua sapu hivani rini,
doduru arini si ele variva egoi beto koari na tinavete kaleana.
4 Sa tie sapu leana hite koa rini si guana hilibubuku,
sa tie sapu toṉotona vasinahite si guana barabara rakihi.
Sa rane sapu korokorotae nia ri na mia poropita si ele kamo,
sa rane sapu kote mae va kilasa gamu sa Tamasa.
Kamahire sa totoso pude vari nunali sari tie.
5 Lopu raṉe ia si keke turaṉamu;
lopu ronu ia si keke mua baere.
Koasa loamu sapu eko turaṉia goi
ba va balau koari mua zinama.
6 Ura sa tuna koreo si lopu pamaṉa nia sa tamana,
sa tuna vineki si kana ia sa tinana,
sa barikaleqe vaqura si toke ia sa sa tinana sa nana palabatu,
sari kana tanisa tie si arini pa nana tatamana soti mo.* Mt 10:35-36; Lk 12:53
7 Ba sapu arau, arau si va hakehakei va ṉoṉo nia se Zihova,
aqa va ṉoṉo nia arau sa Tamasa, sa qua Hinarupu;
na kote va avoso au sa qua Tamasa si arau.
Na Hinarupu si Paleke Mae nia e Zihova
8 Agoi na qua kana, mu lopu hegere nia sa qua tinahuara!
Ele hoqa tugo si arau, ba kote gasa turu pule qua.
Habotu tugo pa hupohuporona si arau,
ba e Zihova si kote na qua kalalasa.
9 Sina ele tavete va sea la si arau koa Sa,
ke kote va kamoa mo rau sa tinaṉaziri te Zihova,
osolae toketoke nau Sa si arau
meke va kilasi Sa sari kana pu tavete va kaleana mae koa rau.
Kote turaṉa vura la ni au Sa pa kalalasa;
meke kote dogoria arau sa Nana tinoṉoto.
10 Meke kote dogoria sa qua kana
meke kote kurekure toa nana,
asa sapu zama guahe koa rau,
“Avei se Zihova sa mua Tamasa?” gua.
Pa mataqu soti kote dogoria rau sa nana hinoqa;
sapu kamahire mo ba kote ta neti gore si asa
guana kosiri pa sisiraṉa.
11 Sa rane pude kuri pule i sari mia goba si kote kamo,
sa rane pude hoda i sari mia voloso.
12 Koasa rane asa si kote kamo pule mae sari tie koa goi
mae gua pa Asiria meke sari vasileana lavata pa Izipi,
podalae pa Izipi meke kamo la pa Ovuku Iuparetisi
kote mae gua pa seu koari na kolo lamana meke koari na toqere.
13 Sa popoa pepeso si kote guana qega koa gua koari na kinaleana tadi na tie pu koa vasina.
Sa Tataru te Zihova pa Izireli
14 Kei Zihova, Mu kopu ni sari Mua tinoni koasa Mua kolu hodu,
sari sipi sapu tago i Agoi,
sapu koa teledia pa soloso,
koari na inuma duduli masurudi.
Vekoi madi hena va deṉa dia pa Basani meke Qileadi
gugua koari na totoso pukerane.
15 Olaṉi e Zihova si arini, “Gugua koari na rane totoso vura gamu pa Izipi,
si kote va dogoroni Arau sari Qua tinavete variva magasadi.”
16 Kote dogori ri na butubutu meke kurekure,
na doduru dia ṉiniraṉira si kote ta vagi palae.
Kote tuku ni limadi rini sari ṉuzudia
meke kote nuli sari taliṉadia.
17 Kote mea kavuru si arini guana noki,
guana kurukuru sapu ṉame pa pepeso.
Kote neneqaradi meke vura koari dia bae;
kote matagutu meke taliri la koe Zihova nada Tamasa,
meke kote matagutu nigo rini si Agoi.
18 Esei si na Tamasa gugua Agoi,
sapu taleoso ni sari sinea meke vulasa pani sari kinaleana
koari ka visavisa tinoni koa holadi pu na Mua tinagotago?
Lopu koa bugoro eko lamo si Agoi
ba qetu nia Goi pude vata dogoro nia sa tataru variva tukana.
19 Kote tataru puleni gami Goi si gami;
kote neti goreni Agoi sari mami sinea
meke buli lani pa lamana peava sari mami kinaleana.
20 Kote vata dogoro nia Agoi koe Zekopi sa Mua tataru nabuna sapu loke kokoina,
meke vata dogoro nia sa Mua tataru variva taleosae koe Ebarahami,
gua sapu zama tokotokoro nia Agoi koari tamamami
koari na rane pukerane la.