Elihu si Gegesi sari ka Ṉeta Baere te Zobi
32
Zobi 32:1 kamo hinia 37:24
1 Ke sari ka ṉeta hire, Elipazi, Bilidadi, meke Zopara, si noso; lopu olaṉa pule la koe Zobi, sina toṉoto nana si asa pa nana binalabala soti. 2 Ba se Elihu, sa tuna Barakele na tie pa tuti te Buzi pa tatamana te Rami, si bugoro sisigiti nia sa se Zobi, sina toṉoto nana si asa gua, meke zutua sa sa Tamasa. 3 Bugoro ni tugo e Elihu sari ka ṉeta baere te Zobi, sina zutu ia rini ba lopu boka va sosodea rini sapu sea se Zobi, ke guana somana zutua rini sapu sea sa Tamasa. 4 Sipu korapa zama si arini si aqa se Elihu, sina na tie vaqura si asa. 5 Ba totoso dogoria sa sapu hokoto ni zinama si arini si bugoro mo si asa.
Elihu
6 Ke olaṉa se Elihu sa tuna Barakele na tie pa tuti te Buzi,
“Arau si na tie vaqura meke gamu si na barogoso mia,
ke matagutu si rau pude tozini gamu gua sapu gilania rau.
7 Balabala si rau, ‘Ari kasa tie koadi si pada zama,
sina sa ginilagilana lohina si luli gua pa vuaheni.’
8 Ba sa hinokarana si sa Maqomaqona tu Tamasa pa tie,
meke sa siniṉo tanisa Tamasa pu tagoi sari doduru ṉiniraṉira
sapu ponia ginilagilana lohina si asa.
9 Lopu ari na barogoso mo si gilagilana,
lopu arini pu kokoadi mo gilania na sa si toṉoto.
10 Gua asa ke zama si arau: ‘Mi avoso mae;
arau ba hiva tozini gamu sapu balabala ia rau.’
11 Aqa si rau totoso zama si gamu,
avosi rau sari mia zinama tumatumae;
totoso hatai gamu sari na zinama pu gotogoto.
12 Va avoso atu si arau,
ba loke tie boka va dogoro nia koe Zobi sapu sea si asa,
lopu keke gamu olaṉi sari nana vina vura binalabala.
13 Mi lopu zama, ‘Gami ele dogoria sa ginilagilana hinokara;
Tamasa mani tozi nia sapu sea si asa, ba lopu gami na tie,’ gua.
14 Lopu koa rau gonagona mae ni Zobi sari nana zinama,
meke lopu kaqu olaṉia rau koa rina mia zinama.
15 Zobi, ele nunala sari ka ṉeta, loke dia inolaṉa,
meke loke zinama pule si koa.
16 Ba vea, na lopu kulu si arini ke kaqu aqa tu si rau,
sipu korapa loke dia inolaṉa?
17 Lokari, sari qua inolaṉa si kote zama ni rau;
arau ba kote tozi vura ni sapu gilani rau.
18 Ura siṉi au na zinama si arau,
meke sa maqomaqo pa korapaqu si lopu boka tuqe pule.
19 Guana siṉi au na vaeni sapu hata siraṉa pude vura,
guana vovoina vaeni vaqura sapu ona hiva puzaka.
20 Kaqu zama si rau na lopu boka tuqe pule ia rau,
uve, kaqu zama vura si rau.
21 Lopu kote va kalekale si rau,
babe va lomolomoso ia si keke tie.
22 Sina be bokabokaqu pa va lomolomoso tie,
si kote la sa Tamasa meke va kilasa au.