Susurak soa-neu hatahori
Ibranir
bei fo ramahere neu Yesus Karistus
ma laꞌo ela sira bei-baꞌin nara anggaman
1
Manetualain nadenu Ndia Anan ena fo ta neni babanggak lena heni Ndia mana toꞌu dedeꞌa raan nara
1 Lele uluk Manetualain pake Ndia mana toꞌu dedeꞌan nara fo kokolak ro ita bei-baꞌin hatahori Ibrani.* a: Dedeꞌa deꞌek Ibrani ia, nadek laen soa-neu hatahori nusa Yahudi. Hatahori Yahudi fo mana namahere neu Yesus Karistus, hatahorir roke sara rae, “hatahori Karisten Ibrani”, nahuu sira dadi laen numa toranoo Yahudin nara mai ena, fo bei mana toꞌu anggama Yahudi hohoro-lalane raan nara. Ana pake dalak mata-matak fo kokolak laꞌe noꞌuk ka no sara.† b: Manetualain nafada Ndia hara hehelun nara, pake dalak mata-matak. Haꞌi netuduk leo: Ana nafada Abraham pake hehelu-bartaak, neu Musa pake anggama hohoro-lalanen, neu Dauk pake sosoda kokoa-kikiok, ma neu Yeremia pake lololek. 2 Tehuu hatematak ia, Ana fee Ndia Anan mai ena fo kokolak aon no ita.
Numa makasososan mai, Manetualain here nala Ndia Anan ia ena,
fo parenda sama-sama no Ndia.
Neu Ana nakadadadik lalai no dae-inak, ma basa oe-isin lalaꞌen,
Ndia Anan ia oo nakadadadik sama-sama noon boe.
3 Manetualain Anan ia, natudu Ndia Aman ta neni babanggak,
sama leo ledo saꞌan nasararangga fali numa titiro mai.
Huu Ana dadi mata-aok esa matetuk no Aman.
Ma numa Ndia Dedeꞌa-kokolan fo ta neni babanggak mai,
Ana nakalalaꞌok basa hata marai lalai no dae-inak.
Ana oo nasosoi dalak boe,
fo koka heni hatahori sala-singgon nara,
mita fo ara dadi reu lolo-laok.
Boe ma Ana fali neni nusa tetuk do inggu temak neu,
fo nanggatuuk neu Manetualain boboa konan,
neu mamana hada-horomatak mateꞌen.
Manetualain Anan ta neni babanggak mateꞌen, lena heni atar marai nusa tetuk do inggu temak
4 Manetualain atan nara marai nusa tetuk do inggu temak, memak ta neni babanggak. Tehuu Ndia Anan ndia ta neni babanggak mateꞌen, lena heni basa sara. Manetualain panggan naa, demak mateꞌen. Ma Ana fee Ndia mesa kana panggan neu Anan ena. Huu naa de Ndia Anan lena heni numa basa Ndia atan nara marai nusa tetuk do inggu temak mai.
5 Manetualain kokolak nita no Anan nae,
“Faik ia, Au soꞌuk O fo toꞌu parenda.”✡ Sosoda Kokoa-kikiok kara 2:7
Manetualain oo kokolak boe nae,
“Au ia, O Amam.
Ma O ia, Au Anang.”✡ 2 Semuel 7:14; 1 Israꞌel no Yahuda Tutui Bakahulun 17:13
Manetualain kokolak memak talo naa laꞌe-neu Ndia Anan, tehuu Ana ta kokolak nita talo naa laꞌe-neu Ndia atan nara marai nusa tetuk do inggu temak.
6 Neu Manetualain nadenu Ndia Anan ta neni babanggak mateꞌen mai, Ana oo parenda atan nara marai nusa tetuk do inggu temak boe nae,
“Wee! Atar ein, ee!
Ei muste fee hada-horomatak,
ma makaluku-makatele neu Au Anang dei!”✡ Tui Seluk laꞌe-neu Dala Masodak 32:43; Lukas 2:13-14
7 Manetualain oo kokolak laꞌe-neu Ndia atan nara marai nusa tetuk do inggu temak boe nae,
“Au tao Au atang nggara marai nusa tetuk do inggu temak,
dadi rakarumbu sama leo anin.
Au tao Au atang nggara,
dadi sama leo aꞌi.”✡ Sosoda Kokoa-kikiok kara 104:4
Manetualain kokolak talo naa, nahuu sira iar, kada Ndia hatahori neondan a mesan.
8 Tehuu Ana kokolak laen bali neu Ndia Ana heli-helin nae,
“O ia, Manetualain.
Neu ko O manggatuuk muu kadera man-parenda losa doon naa neu.
Neu ko O toꞌu koasa fo parenda no dale ndoos.
9 O dalem namahoko mete-nita hatahorir leo-laꞌo no ndoos.
Tehuu O dalem sona mete-nita hatahorir leo-laꞌo no kada puta-paik.
Huu naa de O dalem namahoko,
de Au mboꞌa mina neu O langgam,
fo soꞌuk O dadi Manek lena heni basa laen nara.”✡ Sosoda Kokoa-kikiok kara 45:7-8
10 Manetualain oo kokolak laꞌe-neu Anan boe nae,
“Anang, nggee!
O ia, Lamatuak fo mana parenda memak numa lele uluk mai ena.
O ia, ndia madenu fo lalai dadi memak.
O ia, ndia parenda fo dae-inak dadi memak.
11-12 Neu ko lalai no dae-inak noe heni sara.
Neu ko lalai no dae-inak mopo heni sara.
Tehuu O mesa ngga masoda makandoo.
Neu ko O piru heni lalai no dae-inak,
sama leo hatahori piru heni bua-loꞌa sidak.
Neu ko O nggati lalai no dae-inak,
sama leo hatahori nggati bua-loꞌa beuk.
Tehuu O mesa ngga ta leo naak.
Huu O masoda losa doon naa neu.”✡ Sosoda Kokoa-kikiok kara 102:26-28
13 Manetualain oo kokolak neu Ndia Anan boe nae,
“Anang, nggee!
Mai manggatuuk muu ia, nai mamana hada-horomatak mateꞌen,
nai Au boboa konang ia.
Neu ko Au tao losa O musum mara,
losa ara holu ei neu O.”✡ Sosoda Kokoa-kikiok kara 110:1
Manetualain kokolak memak talo naa laꞌe-neu Ndia Anan, tehuu Ana ta kokolak nita talo naa laꞌe-neu Ndia atan nara marai nusa tetuk do inggu temak. 14 Ndia atan nara memak kanenenik kara, huu Ana nadenu sara fo reu faduli basa Ndia hatahorin nara lalaꞌen. Hatahori iar ndia neu ko Ana tao nasoi-nasoda sara ruma sira sala-singgon mai. Leo mae talo naa oo, tehuu Manetualain Anan bei lena heni basa Ndia atan nara lalaꞌen boe.
*1:1 a: Dedeꞌa deꞌek Ibrani ia, nadek laen soa-neu hatahori nusa Yahudi. Hatahori Yahudi fo mana namahere neu Yesus Karistus, hatahorir roke sara rae, “hatahori Karisten Ibrani”, nahuu sira dadi laen numa toranoo Yahudin nara mai ena, fo bei mana toꞌu anggama Yahudi hohoro-lalane raan nara.
†1:1 b: Manetualain nafada Ndia hara hehelun nara, pake dalak mata-matak. Haꞌi netuduk leo: Ana nafada Abraham pake hehelu-bartaak, neu Musa pake anggama hohoro-lalanen, neu Dauk pake sosoda kokoa-kikiok, ma neu Yeremia pake lololek.
✡1:5 Sosoda Kokoa-kikiok kara 2:7
✡1:5 2 Semuel 7:14; 1 Israꞌel no Yahuda Tutui Bakahulun 17:13
✡1:6 Tui Seluk laꞌe-neu Dala Masodak 32:43; Lukas 2:13-14
✡1:7 Sosoda Kokoa-kikiok kara 104:4
✡1:9 Sosoda Kokoa-kikiok kara 45:7-8
✡1:11-12 Sosoda Kokoa-kikiok kara 102:26-28
✡1:13 Sosoda Kokoa-kikiok kara 110:1