55
Iahova rie lat enmahisien min meatin keil onen
Aesea 55:1-3,6-11
1 Iahova selus min meatin keil onen ka en provet Aesea vit,
“!Ei, kami vasi koa maroro kat kami,
oai keiek, mihemai mihemuni!✡ Rev 21:6; 22:17
Ka kami koa mani onami tovuol,
almai alhul anien ranau ka miheani.
Anatin, almai venau ka alhul uaen ka melik,
veni inau nisa maeni min kami suval sanien enges.
2 ?Vensa mivul tounah en mani onami
koa sakras vakataun moulien onami?
?Vensa mimum keih
keke mivahul anien koa sakras val vataveah?
Mihetaeng revi enau ka mihoumon asa koa mahiteni.
Hemukonek, en tinomi, mihesi kami ven anien koa tahos vis tahos imok koa nisani min kami.
3 Meatin keil onak, mihelong nau ka mihemai venau.
Mihemai venau, ka mihelei kat moulien koa vi anatin.
Inau numon hatkatien takeih hetal min kami koa hel lisenges,
ka nitie lat envatien onak min kami musil asa koa navat kati min asuv houlu Deved mulamu.”✡ Umen 13:34
6 Aesea viteni min meatin keil vit,
“Kosa, mihehiles mihelei kat Iahova navong maen kami mivahotini.
Mihehiso heha veni navong mul vesesal ven kami.
7 Kami, meatin tisa keil, mihelokovein sakien tatisa keil onami ka rendemien keil koa romaltei.
Anatin, kami mihehiles moulien onami ka mihemai vesesal ven Iahova.
Hemukonek, enmahisien onen hel en kami ka houmon ris methos hetal min kami.
Anatin, kei hermundemtei mun tisaen keil onami varei.”
8 Evus, Iahova viteni mun min meatin keil onen ka en provet Aesea vit,
“Rendemien onak rosuvaltei rendemien keil onami,
ka sakien onak teisav ran sakien keil onami.
9 Anatin, rendemien ka sakien keil onak
vina nesa mok mulin rendemien ka sakien keil onami.
Keil amul nesa mok suval koa teilang mul nesa mok mulin out keil vasi en out netan.
10 Navong ous motmot ran teilang vakas out netan,
mum vasi umen onen.
Mul sakin tounah vasi keil koa aluhi en atan moul
ka san heite ka aneite min meatin keil avaani.✡ 2Kor 9:10
11 En vati sakien enek, selusien onak koa va min meatin keil,
sakras vahi heisav enges.
Navong nasan selusien tai eva,
selusien koanek houm vasi tounah keil koa naling kati tuai voumoni.”