1 Avong vahis muli, Iesu muris va en taon ten out Kapaniam, ka keil ten out enek alonge keke ro teim tai. 2 Keil houlu umai asien teim enek, sakini out mutikoe neim ka meatin houlu mun amules arapehai en voiteh, ka Iesu mul visein keil en selusien onen Ahi. 3  Navong Iesu mul semau vihisei, meatin ehat telmai telvou kakan tueatel koa mules en vulin veni hati usiven mat. 4 Ka veni meatin keil avi houlu, telsakras telvakur tueatel vaha min Iesu. Sakini, telvousi vina en hoi eim ka aleng ahho tai, mal en out koa Iesu ro ien. Evus, telrutun tueatel vita ka vas meatin keil koa amul en out enek. 5 Ka navong Iesu les asa telmumoni, lei kilea demkatien oneatel ka viteni min meatin enek vit, “Tuak, kosa, Ahi rolestei mun vatisa enuk ven tisaen keil onom.”✡ Luk 7:48

6 Ka navong tiser keil ten mengkatien onen Mosis koa amul arondan en out enek along selusien koa Iesu viteni, asel kutut kati en rendemien one avit, 7 “?Vensa kei run mukok? ?Kei mundemi kei vinvin suval Ahi? !Ahi tas kilea valah lat tisaen!”✡ Sam 103:3; Aes 43:25; 1Sion 1:9

8 Navong amundemi mukok, Iesu kilea ka viteni min keil vit, “?Vensa mimul mirendem en tounah enek?✡ Mat 16:8 9 Maes imok minau keke nihiteni min meatin ekek koa sakras vakaka nihit, ‘Nikulat tisaen onom,’ veni kami misakras mivalesi munak nakur keihoen keke moumoni. Ka keih keke nihiteni nihit, ‘!Mea! Lum lat vulum ka ha teim,’ veni milei kilea munak nakur keihoen keke moumoni vuo narkurtei. 10 Ka veni ek vat kami mivalei kilea keke Natin Meatin kur keihoen keke vakulat tisaen ran meatin keil ten out netan, miheles koanik …” Ka Iesu viles, les meatin koa sakras vakaka vit, 11 “!Mea! Lum lat vulum ka kiha teim.”

12  Hatte tas, meatin enek ravul mea, lum lat vulin ka mea sital ran keil. Ka navong meatin keil koa amul en out enek alesi, amutimanin ka amasmas Ahi veni. Amul arun eni avit, “!Ekovei! !Rorles etai li tounah vamukok!”✡ Mat 9:9-13; Luk 5:27-32

13 Navong tamun, Iesu va ut en Mari Oai ten out Kaleli. Tali meatin keil umai akarahiti, ka kei mul visein keil. 14 Ka navong mul mual va, visu min meatin tai koa mul kur takis ran meatin keil en titi eim mon, isen Livae, natin Alveas. Ka Iesu vise vit, “!Amai! !Usil inau!” Ka kei lokovein umen onen mules ka musil Iesu.✡ Mat 8:22; 19:21; Mak 10:21; Luk 9:59; 18:22; Sion 1:43; 21:19,22; Mat 4:20,22

15 Evus, en mendilah, Iesu ral meatin keil onen amul akanian en teim sen Livae. Meatin houlu ten takis ka meatin tisa keil, amul akanian ral min keil veni houlu en keil emun amusil kat Iesu. 16 Ka navong tei en Farasi keil koa avi tiser keil ten mengkatien onen Mosis emun ales Iesu mul kanian ral min meatin keil ten takis ka meatin sav keil koa arendem tisa en keil, amutimanin. Avis meatin keil onen Iesu avit, “?Vensa kei mul kanian ral min vati meatin tisa keil koa amukok?”✡ Mat 11:19; Luk 7:34; 15:1-2

17 Ka Iesu raengon selusien one ka vit kesi min keil vit, “Meatin keil koa ave tahos e rovattei avaha avales dokta. Ka koakeil akilea amesai, keil e vati avaha avalesi. Narmaitei mahise meatin keil koa amundemi avit moulien one mal tuai keke avamai avousil inau. Vuo, numai mahise meatin keil koa akilea mesaien ten tisaen mul en keil keke ihiles moulien one ka usil inau.”

18 En avong tai, meatin keil onen Sion Baptis ka Farasi keil amul uval ran anien. Meatin keil umai ka avis Iesu avit, “Meatin onen Sion ka Farasi keil uval ran anien, ka meatin onom keil armumontei. ?Vensa?”

19 Iesu vit kesi min keil en tatavolien tai vit, “Navong meatin tai vatetalihe, meatin keil koa umai ven mari ale enek, asi keil veni. Sakini, asakras avahal ran anien navong kei ro veah ral min keil. 20 Ka avong mul mai keke kei hevuol ran keil. En avong enek, keil ihal ran anien ven ilonge hetisa.”* Meatin tai kilea vahal ran anien keke vasakin hisien keil onen vakeih tamun navong (1) mul masmas Ahi; (2) mundemko ven tisaen keil onen; (3) murang ven meatin tai koa mat; (4) vouhou ven mari avong votut tai; vuo (5) mul vis Ahi keke voumon tounah en usite onen meatin tai.

21 Ka Iesu vit risi min keil en tatavolien tamun vit, “Meatin etai sakras vatili koe eisin matu en soke eisin hau. Veni navong akasi, hatte koa heite hau mai sim kati ka hetali vas koa heite matu, hesakini hemahoi hemariso suk. 22 En vati sakien enek, meatin etai sakras vatah uaen koa heite hau vaha en veite matu koa amumoni en hiliven sipsip veni keih tuai. Uaen enek hetatahou ka hesipas veite enek, hesakin uaen enek houele. Hesakini, uaen enek koa heite hau heha mok en veite koa heite hau veni kei memerau, kilea vatatahou.”† En tatavolien koanik, Iesu vit hihiseien hau keil onen mul musil sakien koa teisav en sakien ten hihiseien matu keil onen Siu keil.

23 En Sabat tai, Iesu ral meatin onen keil amual uva aka vas ah tai ten uit ka amul alah utite, akokoa, ka amul akani. 24 Ka Farasi oteta keil alesi ka avis Iesu avit, “?Vensa varei meatin onom keil amum en Sabat? Umen enek rali koteh mengkatien onen Mosis.”✡ Dut 23:25

25 Ka Iesu vit kesi min keil vit, “?Kami mirkileatei asa koa Deved ral min meatin onen keil amumoni navong amai kat keil, ka anien ae tovuol?✡ 1Saml 21:1-6; 2Saml 15:35; Lev 24:5-9 26 En avong enek, Abiatar vi asuv houlu onen pris keil, ka Deved va neim en Eim Votut ka visi ven veret koa vi votut, koa pris keil enges ten Eim Votut akilea avaani. Abiatar maeni, ka Deved kani ka riti mun min meatin onen keil akani.”

27 Iesu vit kilea min keil vit, “!Ahi mumon Sabat keke vakataun meatin keil! Kei romumontei meatin keil keke avakataun Sabat.✡ Eks 20:8-10; Dut 5:12-14 28 Sakini, Natin Meatin vi hetetamen imok mulin Sabat.”