1 Iahova selus min Mosis ka Eron en out Isip vit, 2 “Avati koanik hemai hehi avati koa helamun avati sav keil en sua keil koa hemai. 3 Milhehit mesein selusien koanik min me-Isrel vasi keil: en avong koa hehi halualim (10) ten avati koanik, meatin vasi keil iling revi sipsip vuo nani tai koa avaani en teim se.✡ Lev 23:5; Nam 9:1-5; 28:16; Dut 16:1-2 4 Ka munak keil en teim tai asakras avaan vasin sipsip tai, akilea avatiti vuseri koanek vatal min teim tamun koa mul vesesal ven keil. Keil ititi hemal en meatin ehis koa avaani. 5 Mihekur sipsip vuo nani koa hemukok: sua onen hetas, hehi meahos enges, ka tounah hetovuol hekula. 6 Mihelei kati teim hetokol avong koa vi teindan ehat (14) ten avati koanik. Ka navong out vong, me-Isrel keil vasi u vinvini sipsip keil enek. 7  Navong meatin tai hou vini esen hevus, hesien lelat tei ara ka hekuri heha en out koa ian vuseri ien. Hevus, hekas pos ten metareh eni, en out nesa ka en usite keilu teni. 8 En vongien enek, meatin keil ikur vuseri enek ka ilengasi enges. Iani hetal ouai keil koa kon ka veret koa is tovuol eni.* Me-Isrel keil ian anien hemukonek hesuval amul amual en sise vatie lat demkatien one keke Ahi hetali lat keil ran out Isip. 9 Minaantei koa romastei vuo koa akukoni en oai. Ka mihelengas mouni enges, hetal vatin, alen keil ka tin vasi koa tahos taanien. 10 Minaan rantei natokol visokon. Munak hatte etai heles, mihenit lini. 11 Navong mihean anien koanek, mihoumoni hesuval mimual en sise mivaha: mihesin en eisin keil toualien, miheheas sandel onami, mihekur kat eisal onami, ka mihean kekerati. Anien ten Mul Laui koanik hehi sanien votut min Iahova.

12 “En vongien enek, nika vasi out Isip, nu vasi moeite keil koa avi meahos, onen meatin vasi keil ka onen buluk ka sipsip vasi keil emun. Inau, navi Iahova, ka nisan mahien heha kat ahi keil onen me-Isip keil. 13 Navong nimai ka niles ara mul en pos ten metareh keil, hetie lati minau keke miro ien ka nil laui teim sami. Hesakini mahien koa nisani min me-Isip keil hersuttei kami.

14 “Avong koanek, mihekur kati lises. Mihesakin avong enek hemai hehi avong votut tai. Mihoumon ale teni en sua vasi keil koa hemai, hesakin kami mihendem kat ris tounah koa inau, Iahova, namumoni.”✡ Eks 23:15; 34:18; Lev 23:6-8; Nam 28:17-25; Dut 16:3-8

15 Ahi viteni vit, “Avong heite oulu (7), miherkantei veret koa is mul ien. Mihean enges veret koa mahinhin. En avong koa mulamu en keil, mihelah lat vasi is keil ran teim sami. Mihetivini heha, veni en avong koa heite oulu (7) enek, meatin koa hean veret koa is mul ien, kei, mihesila lati heha ran kami, hervitei mun koan Isrel tai. 16 En avong oulu (7) enek, koan mulamu ka koan ekor en keil, mihelah ruai keke miheha netan minau. Umen hetovuol en avong keilu enek, ka mikileas mivasak mesein anien. 17 Mihehuli kat avong keil ten veret koa is tovuol ien enek en sua vasi keil koa hel hemai, ven koa en avong enek, inau nalah lat kami ran out Isip.”

29 Navong avong teni mai, en metavinavong ten vongien, Iahova mita ka mu vinvini moeite vasi keil ten out Isip koa avi meahos: koa vakur vulin asuv houlu hekatau, vita rokol moeite onen koakeil amul en eim takeih. Moeite vasi keil emun onen buluk ka sipsip keil umatmat.✡ Eks 4:22-23 30 En vongien enek, asuv houlu ral min hetetamen onen keil, ka meatin vasi keil ten out Isip amuli. Mari tangien karahit out Isip veni teim tovuol keke ehon etai varmattei ien. 31 En vongien enek, asuv houlu sisil en Mosis keilu Eron ka vit, “!Mihemea, miheha ran meatin keil onak ka miheha ran kantri onak, kamil hetal min me-Isrel vasi keil! Miheha netan min Iahova suval koa milvis inau eni. 32 Suval koa milviteni, mihekur kat sipsip, nani ka buluk keil esomi ka mihehaha. Ka navong mihoumoni, milhehisi li mun min Iahova keke hetokol kat inau mun.”

33 Me-Isip keil vasi emun apeah keil keke aloh konakon avamea lah ran out one veni avit, “Komai vasi mehematmat munak kami mihervatei.”

37 Me-Isrel keil amea ran taon ten out Rameses en out Isip, amuales arokol meteimal ten out Sakot. Keil avi houlu vis avi houlu mok: amo keil enges rokol handred taosen ahetai (600,000), ka atou keil ral min titiali keil one, arvulitei keil. 38 Meatin houlu mun koa arvitei tai en me-Isrel keil amusil keil. Ka meatin keil amulamun sipsip, nani ka buluk sav emun keil koa avi houlu. 39 Keil aran veret koa is tovuol ien koa asak mesein pulaoa teni tuai en out Isip. Ven me-Isip keil akeih kat keil, keil aro konakon avaha. Sakini avong rovinvintei keke avatosil is vasuv lat pulaoa, vuo avasak revi anien sav keil ten sise. 40 Avong koa me-Isrel keil umai rohtoh en out Isip rokol avong avaha rani, aro en out Isip sua handred ehat hanumau tai ka halualim emun (430).✡ Sen 15:13; Kal 3:17

43 Ahi viteni min Mosis keilu Eron vit, “Koanik vi mengkatien keil ten Anien ten Mul Laui: meatin keil ten kantri sav asakras avaani. 44 Ka slev keil koa mivuli ka mimumon vekahoi en keil, keil akilea avaani. 45 Meatin koa hemai ten avong havivis, vuo avuli ven umen ten avong havivis, kei sakras vani. 46 Anien vasi keil enek, iani en eim koa amumoni ien. Anakurtei naha hae ka anakur vul etai sin sipsip enek.✡ Nam 9:12; Sion 19:36 47 Me-Isrel vasi keil umon ale koanik.”