1 Veni kami mivi titiali keil anatin onen Ahi koa envatien onen mul en kami, sakien onami heleisungein revi mok more sakien keil onen. ✡ Mat 5:48 2 Mihetie lat envatien onami min mesav keil heka en sakien vasi keil onami. Anatin, mihoumoni hetal min envatien hesuval koa Kristo mumoni navong maen moulien onen min Ahi keke vamat vahinat ir. Ka Ahi si kei ven matien onen suval koa, mulamu, si kei navong amu vini sipsip tai vahi sanien votut en usite onen meatin keil. ✡ Rom 14:15; Kal 2:20; Sam 40:6; Hib 10:10; Eks 29:18; Esek 20:41

3 Ka veni kami mivi meatin votut keil onen Ahi, sakien tatisa keil ekek hetovuol varei en kami: minamatiltei natal min etai meatin koa mirtetalihetei vatal mini, minoumontei sakien tisa keil ten sise, ka minalah ruaintei tounah keil onami namai nahi houlu. ✡ Kol 3:5 4 Minasisiltei, minaselus vautei, ka minasontei selusien tatisa sav keil. Veni romaltei keke meatin keil onen Ahi avaselus vamukok. Hetahos imok keke kami mihesan selusien keil ten masmasien heha min Ahi ven tounah keil koa kei mumoni en usite onami. ✡ Efes 4:29; Kol 3:8 5 Hetahos keke kami miheilea revi keke koakeil amumon sakien keil tatisa ekek irvatei en out koa Ahi keilu Iesu Kristo luvi Asuv Houlu ien ka irkur etai tounah tetahos eni. Anatin, koakeil amatil ral min meatin tai koa artetalihetei vatali, ka koakeil amumon sakien tisa keil ten sise, keil irvatei en out enek. Ka koakeil emun amul alah ruain tounah keil one vamai vahi houlu irvatei ien veni sakien one rie lati keke amul uva netan min tounah keil one suval koa avi ahi keil one. ✡ 1Kor 6:9-10; Kol 3:5

6 Minamaentei meatin keil anamai analuvos kami anahit Ahi hersantei mahien min koakeil amumon vati tisaen keil enek, veni vi anatin keke Ahi hevuroh kat koakeil amul along sesein ren ka hesan mahien min keil. ✡ Kol 2:4,8; Rom 1:18; Kol 3:6 7 Sakini, minapiltei natal min vati meatin keil koa amumon tounah keil ekek. 8 Veni, mulamu, navong kami mireingeingen Ahi veah, kami mun mimul en mankoli. Ka kosa, mikapil vituai ral min Asuv Iesu ka mimul en meneai onen Ahi. Sakini, sakien keil ten moulien onami hetie lati keke mivi titiali keil onen. ✡ Efes 2:11,13; Kol 1:13; 1Pit 2:9; Luk 16:8; Sion 13:36 9 Veni koakeil amul en meneai, sakien keil ten moulien one hetie lat tahosien, maluen, ka anatinien. 10 Sakini, mihesak visi keke miheilea sakien sa koa Ahi hesi kei veni, ka mihoumoni. ✡ Rom 12:2

11 Navong meatin sav keil amumon sakien tatisaso keil ten mankoli, usite onami hetovuol eni, veni tounah tahos hetovuol hekistal ien. Hetahos imok mihehit kilea min meatin keil keke vati sakien keil ekek artahostei. ✡ Rom 16:17; 2Tes 3:6; 2Sion 1:10-11 12 Veni vati sakien keil tatisa ekek koa koakeil arlong kattei Ahi amul amum suai eni, rehermumontei ka rehememou emun keke rovaselus usili. 13 Ka navong meneai onen Ahi hetitin eni, hehothot eni keke meatin vasi keil ilei kilea eni. ✡ Sion 3:20-21 14 Anatin, meneai mul sakin meatin keil alei kilea anatinien ten tounah vasi. Koanik suval souen tai orer koa vit,

15 Sakini, mihelei kat revi en ualien ten moulien onami. Minoumontei sakien keil nasuval koa mivi unu keil, ka mihehi meteisau. 16 Anatin, mihoum hetahos en avong vasi koa miles ahho keke mivoumoni. Veni romul en avong keil koa meatin keil amul amumon tisaen lisenges. ✡ Kol 4:5; Amos 5:13 17 Minahitei unu keil, ka miheilea asa koa Ahi en vati mivoumoni, ka mihoumoni suk. ✡ Rom 12:2; Kol 1:9 18 Minahi vautei en uaen, veni navong mivilelau en uaen, misakras mivahuli kat sakien keil onami. Ka mihilelau en Ninin Votut. ✡ Pro 23:31 19 Veni navong mivilelau en Ninin Votut mikilea mivahati lat isen Asuv Iesu navong mimusau vituai en sam keil, souen sav keil ten demkatien, ka souen keil emun koa Ninin Votut mul sani min kami keke mivamasmasi en tinomi. ✡ Kol 3:16; Sam 33:2,3 20 Mikilea mivamasmas Ahi, Tata orer, lisenges ven tounah vasi keil koa kei mumoni en usite orer ka en Iesu Kristo, Asuv orer. ✡ Kol 3:17 21 Ka mikilea mivaling rendemien onami vaha netan keke mivoum vousil rendemien onen Kristin sav keil. Munak mihoumon hemukonek, mihetie lati keke mivouhou min Kristo. ✡ 1Pit 5:5

22 Ahin keil, kami mihoumon rendemien onami heha netan keke mihoum housil rendemien onen meahos keil onami. Mihousil rendemien one hesuval koa mimul mimumoni ven Asuv Iesu Kristo. ✡ Sen 3:16; Kol 3:18; 1Pit 3:1 23 Veni meahos keil onami avi avat keil onami suval koa Kristo vi avat ten Sios onen. Sios koanik vi aven, ka meatin vasi keil koa avi onen anatin amul ien, kei mutut moulien one. ✡ 1Kor 11:3 24 En vati sakien koa Kristin keil ten Sios amul aling rendemien one va netan keke um housil rendemien onen Kristo, mal keke ahin keil emun iling rendemien one heha netan keke um housil rendemien onen meahos keil one.

25 Amo keil, envatien onami hel en ahin keil onami. Envatien onami hesuval envatien koa Kristo rie lati min Sios onen navong san moulien onen vinati. ✡ Kol 3:19; 1Pit 3:7; Efes 1:22; Kol 1:18 26 Iesu mat ven meatin keil ten Sios onen keke voumon keil avato vasi.✡ Taet 3:5; Hib 10:10,14; 13:12 Kei mu motein keil ka en oai ten baptaes ka ka en selusien keil onen. 27 Mu moteini vasakin Sios onen vato vasi ka vahilahil, ka vasakin tisaen ka tounah keil koa avi amus hetovuol ien. En vati voumoni vamukonek vasakini vato vasi en meten. ✡ 2Kor 11:2; Kol 1:22 28 En vati sakien ekek, meahos tai hetie lat envatien min ahin onen ka helei kat revi hesuval koa mul rie lat envatien en aven ka mul lei kat revi. Veni, meatin koa en vat ahin onen, suval koa en vat kei sasen. 29 Meatin tovuol en varvattei aven kati, veni mul san anien mini ka ring koe revi. Ka Kristo emun mul mumon vati sakien enek en Sios onen 30 veni ir rovi hati aven keil. ✡ Rom 12:5; 1Kor 6:15; 12:27; Efes 1:22-23; Kol 1:18 31 Tus Votut onen Ahi selus usili navong viteni vit, “Ven koanek, meahos tai hemea ran tata ka mama onen, ka heapil hetal min ahin onen, ka keilu luhetas.” Senesis 2:24✡ Mat 19:5 32 Mari rendemien mul suai en selusien koanek, veni mul selus emun usil apiluen onen Kristo ka Sios onen. ✡ Rev 19:7 33 Ka, en usite onami amo keil, emi hehat ahin keil onami hesuval koa kami mirie lati emi vat avemi. Ka kami, ahin keil, miheling rendemien onami heha netan ka mihoum housil rendemien onen meahos keil onami.