1 En avong keil enek, avong koa Samuel mul mum min Iahova en hen pris Ilae, Ahi roselus ramattei min meatin keil ka rosantei leisanien keil vahi houlu.

2 Ka en vongien tai, pris Ilae mul matil en out tamatilien onen, ka vesesal meten vavar. 3 Ka Samuel, kei mul matil neim en Eim Tavolin onen Iahova, vesesal en out koa Bokis ten Hatkatien Takeih onen Ahi mul ien. Ka laet onen Ahi koa mul en eim enek mules mukan veni out romulantei veah. 4 En vongien enek, Iahova vise Samuel vit, “!Samuel, Samuel!”

Ka kei vit risi mini vit, “!O-o!” 5 Evus, muloh va ven pris Ilae ka visi vit, “?Mukave? ?Keik keke kovise nau? Inau eke.”

Ka pris Ilae viteni mini vit, “Vuo. Inau narvisoktei. Kiha ris kimatil.” Sakini, Samuel va ris ka matil.

6 Evus, Iahova vise Samuel hatte tamun, ka kei mea ka va ris ven Ilae ka visi vit, “?Keik keke kovise nau? Inau eke.”

Ka pris Ilae vit risi mini vit, “Natkuli, inau narvisoktei. Kiha ris kimatil.” 7 Samuel reingeingeni keke Iahova mul vise veni roselustei veah mini.

8 Ka, hatte etel eni, Iahova vise ris Samuel. Sakini, Samuel mea, va ris ven Ilae ka visi vit, “?Keik keke kovise nau? Inau eke.”

Ka pris Ilae mundem kilea keke Iahova varei keke mul vise ehon koanek. 9 Sakini, kei viteni mini vit, “Kiha ris kimatil. Ka munak kilong rea koanek koa mul visok, kihiteni kihit, ‘Iahova, kiselus minau. Inau, meatin toumien onom, namul naraengonuk.’ ” Sakini, Samuel va ris en out tamatilien onen.

10 Evus, Iahova mai ris veni ka mulomal vesesal veni ka vise suval koa mumoni tuai vit, “Samuel, Samuel.”

Ka Samuel vit, “O-o. Kiselus veni inau, meatin toumien onom, namul naraengonuk.”

11 Sakini, Iahova viteni mini vit, “Kilonge. Hervitei tuetin, inau numon tounah tai en meten me-Isrel keil koa hetisa revi mok. Hesakin meatin vasi keil koa ilonglong eni, e hehon. 12 En avong enek, num vasi tounah koa navat kati keke numoni heha kat pris Ilae ka meatin vasi keil ten vatiamal onen. Anatin, nasakras malokovein tai vales. 13 Inau naviteni tuai min pris Ilae keke nisan mahien enek min vatiamal keil onen koa keite teni hetovuol veni natnali keilu lumum tisa va kat nau en selusien ka sakien keil onealu. Pris Ilae kilea en tounah vasi koa lumumoni, ka roring koetei keilu. 14 Sakini, navat kati keih min Ilae ka koakeil akistal en vatiamal onen keke nasakras moumon methos onak vatal min keil, avaseini munak asan buluk vuo sipsip keil avahi sanien votut one minau, vuo etai mun tounah.”

15 Navong Iahova selus mini evus, Samuel mules en out tamatilien onen rokol visokon. Evus, mea seh voiteh ten Eim Tavolin onen Iahova. Kei en rovattei vaha ven Ilae veni metau vatun usil leisanien onen mini. 16 Ka Ilae vise vit, “Natkuli Samuel, amai ekok.”

Emai veni ka viteni vit, “?O-o, kovise nau?”

17 Ka Ilae visi vit, “?Iahova viten sa minuk? Konaling suaintei tounah ranau. Hemukonek, Ahi hesan mahien heha katuk hekeih munak kirvit vasitei tounah koa kei viteni minuk minau.” 18 Sakini, Samuel vit vasin tounah mini, roling suain etai tounah rani. Ka navong longe, Ilae viteni vit, “Kei vi Iahova. Tahosis keke houm housil asa koa kei lesi vit mal.”

19 Navong Samuel mul moul, Iahova ro veni ka mumon tounah vasi koa kei viteni ka en Samuel mai vi anatin. 20 Sakini, me-Isrel keil vasi, koakeil ten out Dan, koa mul en usite tai ten kantri one, va rokol taon ten out Bersiba en usite sav, keil akilea keke Samuel vi provet anatin onen Iahova. 21 Sakini, en taon ten out Saeloh, Iahova mules kistal ven Samuel ka mul selus ral mini. Ka kei vit meseini min me-Isrel vasi keil.