1 Hein ikewalu he vulan te ikezuwa he tuig te kedhadì ni Darius diyà te Persia, duen migkaǥi te Nengazen diyà te ebpeneuven he si Zacarias. Heini si Zacarias, anak ni Berekia wey apù ni Ido. 2-3 Is Nengazen he Mekeǥeǥehem, midsuǥù din si Zacarias he keǥiya zin heini ziyà te menge etew te Israel:

“Nepeukan ku utew is menge kepuun niw. Ne ǥuntaan likù kew kayi te kediey ne edlikù a ziyà te keniyu. 4 Kenè niw iringi is mibeelan te menge kepuun niw. Impekeǥiyan ku sikandan dengan te menge ebpeneuven he iniyuǥi zan en is mezaat he menge vaal zan, piru wazà sikandan medtuu. Wazà sikandan mebpezumazuma kedì. 5 Is menge kepuun niw wey sikan is menge ebpeneuven ne nemematey en. 6 Piru nehitavù diyà te menge kepuun niw is migkaǥi ku wey is menge petizaan he impekaǥi ku te menge suluǥuen ku he menge ebpemeneuven. Ne mid-iniyug te mezaat is menge kepuun niw he ke sikandan te, ‘Midsilutan kiw te Nengazen he Mekeǥeǥehem te ereg he vales te menge vaal tew, sumalà te pelanu zin.’ ”

7-8 Siak, si Zacarias, duen migkaǥi te Nengazen kayi te kedì pinaaǥi te mibpelewasan din. Nehitavù heini hein mezukilem te ike-24 he andew te vulan he Shebat (he iyan ike-11 he vulan), hein ikezuwa he tuig te kedhadì ni Darius. Ne iyan heini pahayag ni Zacarias:

Neehè ku is sevaha he etew he ed-untud te meriǥà he kudà. Mibpundu sikandin diyà te teliwazà te menge kayu he mirtu ziyà te suǥud. Diyà te egkehuziyanan din, duen menge etew he ebpemen-untud te meriǥà, iring te kaki, wey meputì he menge kudà. 9 Mid-insà a ziyà te velinsuǥuen he mibpekidlalag kedì te, “Datù, hengkey is ibpesavut kayi?” Midtavak sikandin te, “Egkeǥiyen ku kenikew ke hengkey is ibpesavut kayi.”

10 Ne sikan is etew he mibpundu ziyà te teliwazà te menge kayu he mirtu iyan midtavak kediey. Ke sikandin te, “Heeyan is menge pereuntud te kudà midsuǥù te Nengazen te ked-elingkus te tivuuk he kelibutan.”

11 Ne migkaǥi sikan is menge pereuntud te kudà diyà te velinsuǥuen te Nengazen he mibpundu ziyà te teliwazà te menge kayu he mirtu te, “Neelingkus dey en is tivuuk he kelibutan ne neehè dey he melinawen heini.”

12 Ne migkaǥi is belinsuǥuen te Nengazen te, “Nengazen he Mekeǥeǥehem, 70 en he tuig is kegkepeuki nu te menge tig-Jerusalem wey menge meǥinged diyà te zuma he menge inged diyà te Juda. Keenu nu pa edtepusa is kenè nu kegkehizuwi kandan?” 13 Ne midtavak te Nengazen sikan is belinsuǥuen he mibpekidlalag kedì te meupiya wey ebpekelipey he menge lalag.

14 Umbe, migkaǥi haazà is belinsuǥuen kayi te kedì te edtudtulen ku heini is migkaǥi te Nengazen he Mekeǥeǥehem: “Ingkeipeng ku is Jerusalem he migngezanan daan te Zion, 15 piru utew ku nepeuki is menge meǥinged diyà te menge nasyun he ebpeeyehey zà. Dengan kenè ded utew zekelà is pauk ku kandan, piru mid-unduran dan heini. 16 Umbe, edtevangan ku is menge tig-Jerusalem, ne ed-umanan ku ebenguna is Jerusalem ragkes en baley ku. Iyan a is Nengazen he Mekeǥeǥehem migkaǥi kayi.”

17 Migkaǥi sikan is belinsuǥuen he tudtula ku zaan heini is migkaǥi te Nengazen he Mekeǥeǥehem: “Ed-uman ed-uswag is menge inged ku ziyà te Juda. Ne ed-umanan ku edlipaya is menge tig-Zion, he iyan is menge tig-Jerusalem, ne ed-umanan ku egkilelaa heini he pinilì ku he inged.”

18 Ne neehè ku is heepat he sungey. 19 Ne mid-insà a zuen te velinsuǥuen he nekidlalag kedì te, “Hengkey is ibpesavut kayi te menge sungey?” Midtavak e zin te, “Heini is menge sungey iyan is menge nasyun he mibpeyapat te menge etew te Israel wey Juda, ragkes en he impeyapat dan is menge etew te Jerusalem.”

20 Ne zuen heepat he pandey he impaahà kedì te Nengazen. 21 Mid-insà a te, “Hengkey is ebeelan dan?” Midtavak sikandin te, “Ebpelihendeken dan wey ebengkaǥen dan is menge sungey, he iyan kehuluǥan dan is menge nasyun, su iyan heini he menge nasyun kes mibpurung medezaat te Juda wey mibpeyapat te menge meǥinged kayi.”