1 Yesuye see dio masi takolone tei moso wiligi tebisa odoo sabolo, tei eligili odoo sabolo, Yu odoowo wiligi tebisa odoo dimapoo takaso, “Beeame hee mapoo odoo heeso geleipi ko sogoloso pee maga beeleeso. Osoloso geleipi ko i debisilame yo ou poogooso. Osoloso yo bi egee balame moso egi dogo yo ou poogoo mapoo tobuduga tegeiso. Osoloso yo eli sage peegoo dilame, geleipi ko segei ee balame odoo abo gilimadoloso dimapoo egeesee takaso, “Niba geleipi ko segei hagee niyo medee balaga melee. Osoloso geleipi ko peleso, ko poga, ko hodio abo niyo gooloogolone, ko hodio abo mo gooloogaloso, magoo dee melee,” diso. Osoloso geleipi ko segeli odoo yo mi hee mapoo diso. 2 Osoloso yo omapoo dileso badoboome, geleipi ko oso peleso palagaloso bi moodoogaloso gooloogalai beeame oso simiso. Eseme yayo o tou teli odoo hee diye dolone geleipi ko abo gooloogaloso tosibe diso. Eseme o tou teli odoo oso geleipi ko segei ee bali odoo dimapoo o wiligi odoo toba eyo geleipi ko abo gologaloso tosibilame diso. 3 Esino yo omapoo dileso peledobome bali odoo oso yo woomele pogoloso geleipi ko telega mosoowe see wedi diye diso. 4 Eseme egeesee si ogoloso, geleipi ko segeli odoo yayo see o tou teli odoo hee diye diso. Esino odoo hee yibolo see geleipi ko segei bali odoo oso wiligi mapoo woloso, ebia goo teneloso diso. 5 Eseme geleipi ko segeli odoo yayo o tou teli odoo hee diye diso. Esino geleipi ko segei ee bali odoo oso yo wolomaso. Eseme geleipi ko segeli odoo yayo o tou teli odoo abo susuga diye diso. Esino geleipi ko segei ee bali odoo oso abo wulo wooloso poogooso, esino abo diayo piluguso.

6 Esino yayo gooma owolo hedepe diye dolone egeesee gooleeso, “Geleipi ko segei ee bali odoo oso mo holowo to duloso, yimapoo mesileiso,” diso.

7 Esino geleipi ko segei ee bali odoo diayo geleipi ko segeli odoo eyo owoloye simi ogoloso diso nediliyo egeesee takaso, ‘Holo hagoso amaye geleipi ko segei hagee oma toga yayo talaiso. Esiaga geleipi ko segei hagee see iyo talame yo wolomamo,’ diso. 8 Eseme diayo geleipi ko segeli odoowo owolo toloso wolomaso. Osoloso o su geleipi ko sogoloso beelee peegoo tokopuguso.”

9 Yesuye dio masi hagee takoloso badolone egeesee takaso, “Esiga geleipi ko segeli odoo yayo see kaseelaisomo? Yayo sibileso geleipi ko segei bali odoo piliguloso, see geleipi ko segei bali odoo abo mapoo ‘gibe’, dee takalaiso. 10 Esiga niba Godeeyo to booka ma kulodu hogugu to hagee see niyo hesigaso,

13 Osoloso hamamee Yu odoowo wiligi tebisa oso Yesuye Loum gamalee mapoo goo tokenee abo takalame gooleeso. Eseme diayo Pelisi odoo abo sabolo Helodeeyo mooloogoodoo odoo abo sabolo Yesu mapoo gamenee takalame diye diso. 14 Diayo yimapoo sibileso egeesee takaso, “Eligili odoo, iba gooleedooso, no tei goo takeli odoo. Osoloso no odoo bolo koo ebili, osoloso nayo odoo kolo mapoo koo egeli. Osoloso nayo Godeeyo eli odoo susuga mapoo tei eligi moloso. Esiga Loum gamalee wiligi odoo Sisa mapoo tekisi molee tenelai tekepowo o tokeneeyo? 15 Iyo tenelaisomo o tenelaimeyo?” diayo Yesu mapoo woosaso.

Eseme Yesu yo diayo gamenee takalame si gooleedoloso dimapoo egeesee takaso, “Bei kasimaga niyo a ka kukulo ogoowala? Niba molee ko hedepe a agalaiya tosibe,” diso.

16 Eseme diayo Yesu mapoo molee ko hedepe tosibileso teneme, yayo dimapoo takaso, “Hagee odoo agamo mudu do osoloso agamo hu do?”

Eseme diayo yimapoo nei takaso, “Sisayo mudu sabolo hu sabolo molo,” diso.

17 Eseme Yesuye dimapoo takaso, “Sisayo bi Sisa mapoo tenee. Osoloso Godeeyo bi Godee mapoo tenee,” diso.

Eseme diayo Yesuye taka dume dia howoogaso.

18 Osoloso midoo ma kuloduga hogoogabili goo mauwe dee takeli, Sedisi odoo, diayo Yesu ma sibileso gamenee takalame egeesee woosaso, 19 “Eligili odoo, Moseseeye imapoo tei eligilone egeesee eligiso, gisoso sobo huloso holo soomagelega toga, see omoloye emei ta eyo osobo bau huloso emeiyo hu maga holo sologamagalaiso. 20 Omolo dio 7 debeiso. Esino daga emeiye sobo huloso holo soomagelega taso. 21 Osoloso omoloye emei ta eyo osobo bau huso, esino holo soomagelega taso. Osoloso omolo hee domo oso bau see huloso, holo soomagelega taso. 22 Egeesee seemeleso omolo dio susuga 7 holo soolooga magelega weidaso, osoloso sobo bau sabolo taso. 23 Bei sobo yo giso 7 oso huyaga, toloso hogabilei beeame omapoo, yo agamo sobo dalaisomo?”

24 Yesuye dimapoo nei takaso, “Niba goo doopoo gweli odoo, bei niba Godeeyo to oso booka maga taka sabolo Godeeyo kitulugu sabolo niba gooleedele. 25 Bei toloso hogabilei beeame omapoo giso sabolo sobo sabolo huleime. Esino diba keimi ma dokodoo Godeeyo momaiye masi dabalaiso. 26 Toloso hogabilei goo, niba Moseseeye booka mapoo hogugu niyo hesigileyo? Ebelehem, Aisek, osoloso Yekob olo taso. Esino homo douso nademe, paiya beeame omapoo Godeeye Mosesee mapoo egeesee takaso, ‘Epedee hamapoo a Ebelehemyo Godee, osoloso a Aisekeeyo Godee, osoloso a Yekobyo Godee,’ diso. Odoo hagee weidaso, esino dibada dio oso epedee hamapoo gie doso. 27 Esiga yo odoo weida eyo Godeenee, odoo gie hagee do eyo Godee. Esino niyo odoo toloso see gie badeli talaime dee gooleega, niba goo doopoo gweli odooso.”

28 Tei eligili odoo hee diayo toso agadigamelee omapoo sibileso badolone dumeleeso. Osoloso Yesuye Sedisi odoo mapoo to nei tekepo taka dume, yayo Yesu mapoo egeesee woosaso, “Tei magoo kaso toowa ka molosomo?” diso.

29 Eseme Yesuye nei takaso, “Tei magoo toowa hagoso, ‘Isalael (Yu) odoo niba dui! Ibada Lodee Godee hedepe. 30 Esiga nee Lodee nee Godee nee sooloo ma kulodu googoolee sabolo, nee su susuga sabolo, osoloso nee kitulugu sabolo oso dia sooloo dele.’ 31 Osoloso tei magoo toowa hee hagoso: ‘Nee su no nediliyo egee sooloo dolo egeesee masi, nemegei nayo dia sooloo dele.’ Tei magoo toowa aboso, tei bakadio hagee dagadile,” diso.

32 Osoloso tei eligili odoo yayo see Yesu mapoo nei takaso, “Eligili odoo, nayo tei goo olo takaso. Esiga Godee hedepe badoso, Godee hee mauwe. 33 Esiga gala hu woloso siloso Godee mapoo teneli sabolo, bi abo teneli sabolo, tei oso taka hagee haga goo toowanee. Esino tei magoo bakadio hagoso goo toowa ka moloso: Nee sooloo ma kulodu googoolee sabolo, nee su susuga sabolo, osoloso nee kitulugu sabolo oso, dia sooloo dele. Osoloso nee su no nediliyo egee sooloo dolo egeesee masi nemegei nayo dia sooloo dele,” diso.

34 Eseme Yesu odoo yayo to nei tekepo taka dume yimapoo egeesee takaso, “No Godeeye wiligi doloso badeli mapoo gasibilei koola bado,” diso. Eseme odoo aboso goo abo yimapoo woosalai obume poogooso.

35 Hamamee Yesuye Yu odoowo tei moso tegei kulodu odoo susuga mapoo eligilone yayo woosaso, “Bei kasimaga tei eligili odoo diayo Keliso Debidiyo amawe dee ka takeliyo? 36 Debidiye to kitulugu sabolo Dio Tei maga takaso,

37 Debidiye Keliso mapoo ‘Mo Lodee’ diso. Esino bei kasimaga tei eligili odoo diayo ‘Keliso Debidiyo amawe dee ka takeliyo? Kelisoye Lodee osoloso Debidiyo amawe dalai tebiayo? O, Keliso yo Lodee osoloso yo Debidiyo amawe oso.”

Odoo susuga goomogolone o to mapoo medee duso.

38 Yesuye odoo susuga mapoo eligilone egeesee takaso, “Niba tei eligili odoo mapoo medee ege. Diba dugo dia tekepo mekikaloso silesibiliso, osoloso bi neiso teli mi mapoo debeli odoo oso diba ogoloso homo beiyopoo gasuwuloso goomoga to takalame goomogeliso. 39 Diba howo gisili moso ma kulodu wiligi odoo toba eyo debi mapoo bulumulame, osoloso wo toowa nologolone debei mi mapoo wiligi odoo toowa toba eyo debi mapoo bulumulame goomogeliso. 40 Esino diayo sobo bauwe ebilame kukunoloso dia moso sabolo bi sabolo dibada doloso toloso omapoo dopolone, dia goo gagaloso howo dia sage gisiliso, odoo aboso diba tekepo odoo dee gooleedalame. Esino bei egeesee maga diba dala toowa talaiso.

41 Yesu tei moso tegei kulodu edebeeyo molee ko bokosi mapoo sooloogamelee koola mapoo badolone odoo susuga bameleeso. Bi bei odoo molee ko toowa masi sooso. 42 Osoloso sobo bau bi mauwe oso sibileso molee ko ta bakadio toosooso.

43 Eseme Yesu o hamamee dili odoo gilimadoloso dimapoo egeesee takaso, “Ayo nimapoo goo hee toowa taka, odoo susuga molee ko sooso, esino sobo bau bi mauwe hagoso molee ko bakadio toosoo oso dagadiso. 44 Bei odoo diba bi bei, esino dia bi abo pepoko ka toosoo. Esino sobo bau yo bi mauwe yayo sibileso, o wo talame magoo melee molee ko pepoko olo susuga toosooso.