Moppiyon Dinoggan, Moka-atag ki Disas Krays PINUUNGAN 1

PINUUNGAN

to mgo Apostoles ni Disas Krays

Unna nod Bosan

Inin libru, id sulat ni Lucas no sokkad no doktor woy mooggot kos kandin no kopomakoy. Id ponudtuu rin ka-ay iddos langun no mokososoobbun pinuungan to mgo apostoles nid puungan dan ukit to kotuusan to Uhis no Ispiritu no id popiyod ni Disas, nopongnga sikandin novatun diyot datas to langit. Inin libru, suppay taddot unnon libru no id ngoranan to ‘Lucas’ no idda en so Moppiyon Dinoggan moka-atag ki Disas Krays.

Duwon timpu no id dumoruma si Lucas to mgo apostoles ahad ingkon sikandan od undiyon, de-en nosodsorollan din iddos id sulat din ka-ay. Idda mandad so dumon notomanan no id ituu rin ka-ay, waa rin nokita, piru id posivonnalan idda to mgo apostoles.

Id ponudtuu rin ka-ay iddos moka-atag to kodposo-ob to Moppiyon Dinoggan pomon diyot Jerusalem, po-undiyon to Judea woy Samaria taman tid inguma riyot moriyun mgo lugaa. Na ka-ay ta en pantok od kosorollan no inin nonaw, ko-ilangan nod tonggapon to langun no nokod-osso-osson minuvu ka-ay to ampow't ingod, konna ra iddos mgo Judio.

Iyon dakkoon koru-anon no id sulat ni Lucas ka-ay, idda en so pinuungan to Ispiritu to Monama no id po-ubpa rin diyon tod pompomakoy. Idda ra en so Ispiritu to Monama kos od poko-inahak tod pompomakoy woy id pomon mandad diyot Ispiritu to Monama iddos kotuihan to kodpuung to id popuungan kandan to Monama. Od kovasa ta mandad ka-ay'n libru iddos moka-atag to kodtigkanoy ni Pablo to kodpomakoy ki Disas woy dos mgo kod-ipanow rin amoy od poso-ob to Moppiyon Dinoggan. Sokkad no duma rin, ini en si Lucas. Waa rin tonani si Pablo ahad pa noprisu sikandin diyon to Roma.

Dos mgo Nokota-aw:

Dos tigkonayan to id lolivuung nod pompomakoy riyot Jerusalem (1:1 taman to 7:60)

Dos kodso-ob to Moppiyon Dinoggan diyot mgo prubinsya to Samaria woy Judea (8:1 taman to 12:25)

Dos unnon iponawon ni Pablo (13:1 taman to 14:28)

Dos kolivuungan diyon to Jerusalem (15:1-35)

Dos iko-oruwon iponawon ni Pablo (15:36 taman to 18:22)

Dos iko-otollun iponawon ni Pablo (18:23 taman to 21:16)

Dos kodprisu ki Pablo riyot Jerusalem woy riyot Cesarea (21:17 taman to 26:32)

Dos kod-undiyon ni Pablo to Roma (27:1 taman to 28:31)

1 Diyon to kikow, Teofilo.

Iddot unnon sulat ku kikow, id ponudtuu ku iddos langun no pinuungan ni Disas woy dos kodnonaw rin pomon taddot kodtigkanoy to kandin no pinuungan, 2-3 taman taddot allow no novatun sikandin diyot datas to langit. Iling ka-ay kos notomanan. Nopongnga iddos kopotayan ni Disas diyon to krus woy dos kodbadnow kandin, komo-uraa sikandin id pokita riyot mgo apostoles daom to oppat-no-puun allow amoy id posivonnaa rin no no-uyag en sikandin. Woy id nonaw mandad sikandin diyot mgo apostoles moka-atag to kodharit Monama. To waa pa sikandin id batun, duwon mgo ponaannon din diyot id pon-aam din no mgo apostoles ukit to kotuusan to Uhis no Ispiritu. 4 Sokkad no ponaannon din kandan laggun tid porumannoy ran nid ka-an, mid ikahi sikandin to, “Yo kow'd awa riyot bonuwa to Jerusalem.* Ongati row iddos kod-inguma to Uhis no Ispiritu no id tandu to Amoy ku, no idda en so id ikahi kud dangan koniyu. 5 Oyyos si Juan, oweg kos id boutismu rin to mgo minuvu, piru pilon allow pomon ko-ungkay, Uhis no Ispiritu kos id boutismu koniyu.”

Dos Kodbatun ki Disas diyot Datas to Langit

(Lucas 24:44-53)

6 Na sokkad no timpu, id lolivuung kos mgo apostoles duma ki Disas woy mid intud sikandan, kahi ran to, “Longaggon, od po-owan du vo ko-ungkay no timpu iddos mgo minuvu no id hari* keta amoy'd poohinaton mandon iddos kohoriyan to Israel?”

7 Mid tavak si Disas to, “Idda ra en so Amoy ku kos nokosaddoo to timpu nod puungan din iddos id kopi-i rin ka-ay to ampow't ingod. Piru sikiyu, konna atag koniyu inin sinorollan ko kannu ini od kopuungan. 8 Piru otik od ko-iroomman kowd to Uhis no Ispiritu, od pokotanggap kowd to kotuusan. Woy od pokoposivonnaa kowd moka-atag koddi riyon to Jerusalem woy riyot langun no lugaa no sakup to Judea, ahad diyot bonuwa to Samaria woy ahad ingkon ka-ay to intirut ingod.” 9 Nopongnga mid ooseng si Disas tadda, id batun don sikandin diyot datas to langit laggun tid pon-ontong kandin iddos mgo apostoles taman to worad od kokita ran su nosoungan don man sikandin to souhapun.

10 Laggun tod totongtong dan diyot datas to langit, tigkow ron duwon oruwon mama no moputi kos umpak no id lohinat diyot morani ran. 11 Na mid ikahi iddos oruwon mama to, “Sikiyu no mgo toho Galilea, mambot od loohinat kow nod langngag diyot datas to langit? Si Disas no id batun don, od livod dad sikandin ka-ay to ampow't ingod iling taddot kodbatun kandin.”

Dos Kodsuvaa ki Judas

12 Na, id tanan don iddos mgo apostoles diyot Buvungan to mgo Olibo woy mid livod sikandan diyot Jerusalem. Iddon buvungan, mgo sokkad no kilometro kos koriyuwoy pomon diyot Jerusalem. 13 To noko-inguma ran don dutun, id penek dan diyot kwartu nid oubpan dan. Sikandan onsi Pedro, si Juan, si Santiago, si Andres, si Felipe, si Tomas, si Bartolome, si Mateo, si Santiago no anak ni Alfeo, si Simon no mohingginawa to ingod din woy si Judas no anak ni Santiago.* 14 Langun dan, inaayun od posokaddoy to koddasaa riyot Monama, woy mid lonug kandan si Maria no inoy ni Disas woy dos duma pon mgo molitan woy mgo suwod ni Disas.

15 Sokkad no allow, id lolivuung dan. (Iddos ko-uralloy tod pompomakoy rutun, mgo sokkad no gatus woy oruwompuu.) Na id lohinat si Pedro woy id osengan din sikandan, kahi rin to, 16 “Mgo suwod, ko-ilangan nod kotuman iddos id posulat dangan to Monama ki David ukit to Uhis no Ispiritu moka-atag ki Judas no id piyod taddot mgo minuvu nid ammot ki Disas. 17 Si Judas, sokkad sikandin dangan no duma ta no apostoles woy id aam tod Longaggon amoy'd lonug to pinuungan din.”

18 (Na, iddos soopi no id bayad ki Judas taddot morat nid puungan din ki Disas, id bolli idda to livuta. Diyon en mandad no livuta, no-uug sikandin no noko-unna kos uu woy id bossot kos gottok din woy novukayat pe-en kos bituka rin.* 19 De-en to norinog inin notomanan taddot langun no toho Jerusalem, id ngoranan dan iddon livuta no, ‘Akeldama’ riyot kinohiyan dan no Aramaic, no iddos kohulugan, Livuta no id Boyaran to Longossa.)

20 Na ponayun mid ikahi si Pedro to, “Oyya su no-ikahi riyot libru to Salmo no,

“ ‘Ko-ilangan en nod tonanan dos ubpan din woy

worad od poko-oubpa tadda.’*

Woy duwon mandad nosulat dutun no mid ungketen to,

‘Ko-ilangan no duwon sokkad nod suvaa to kotundanan din.’*

21-22 “Purisu ko-ilangan nod aam ki to sokkad no minuvu nod suvaa ki Judas amoy od lonug keta to kodposivonnaa taddot kodbadnow ki Disas. Iddos minuvu nod aamon ta, ko-ilangan no id dumoruma keta daom to timpu no ka-ay pa si Disas nod Longaggon, pomon taddot timpu nid boutismu si Juan taman tid batun don sikandin diyot datas to langit.”

23 De-en duwon oruwon ngaran no id boggoy ran amoy'd aaman taddot od pokosuvaa ki Judas. Iddos sokkad, si Jose no id ngoranan ki Barsabas (no id ngoranan mandad ki Justo) woy dos sokkad, si Matias. 24 Nopongnga idda, id dasaa sikandan no mid ungketen to, “Longaggon, nosorollan du iddos diyot pusung to langun no minuvu. Pokita ru konami ko ondoy musing ka-ay to oruwa kos id aam du 25 no id suvaa ki Judas taddot id tonanan din no kotundanan no apostoles, su id undiyon sikandin to lugaa no ollog kandin.” 26 To nopongnga ran id dasaa, id bunutbunut sikandan woy dos na-aam, si Matias. Na pomon tadda, sokkad don sikandin taddot sopuu-oruwon apostoles.

*1:4 Od kovasa ini riyot Lucas 24:49.

*1:6 Dos mgo minuvu no id hari to mgo Judio dangan, iddos toho Roma.

*1:13 Ini si Judas no anak ni Santiago, konna iddos Judas no Iscariote. Id ngoranan mandad sikandin ki Tadeo. Od kovasa ini riyot Mateo 10:3; Marcos 3:18. Idda mandad so amoy rin no si Santiago, waa ta nosorolli ko ondoy sikandin.

*1:18 Od kovasa ini riyot Mateo 27:3-8.

*1:20 Od kovasa ini riyot Salmo 69:25.

*1:20 Od kovasa ini riyot Salmo 109:8.