Moppiyon Dinoggan, Moka-atag ki Disas Krays 2 TIMOTEO 1

Dos Iko-oruwon Sulat ni Pablo Atag ki

TIMOTEO

Unna nod Bosan

Ini en kos iko-oruwon sulat ni Pablo atag ki Timoteo iddot noprisu sikandin to nouhoy'n timpu riyot Roma (1:8;16-18; 2:9). Woy ini en kos kotompusan to langun no sulat ni Pablo, oyyos waa nouhoy pomon tadda, od imotayan sikandin pomon to kodponudtuu rin moka-atag ki Disas Krays (4:6). De-en iling to ponaantaan din ini ki Timoteo. Inin timpu, diyon pa si Timoteo to Efeso amoy od nonaw to id lolivuung nod pompomakoy rutun. Sokkad no dontulon ni Pablo to kodsulat ka-ay, idda en so kodpo-undiyon din ki Timoteo to Roma.

Ka-ay'n sulat, mo-uraa kos pomandu ni Pablo ki Timoteo amoy'd ponokkaa to ginawa rin. Id pomandu rin no od ponayun sikandin nod nonaw ahad duwon od supak kandin. Woy ko-ilangan nod puungan din iddos id sanna to Monama ahad duwon od posuppit kandin.

Id paabbotlabbot din ki Timoteo iddos morat no kodbovotasan to mgo minuvu init morin mgo allow, woy id pomonduwan din sikandin no od poriyu pomon to mgo minuvu no iling tadda. Id pomonduwan din mandad si Timoteo no konnod lonug taddot waa koru-anon no mgo kodpo-opuloy, ko konna, ko-ilangan no od ooyyaran din tod ikuu woy'd nonaw iddos bonnaan nonaw no id pomon to Monama.

Dos mgo Nokota-aw:

Kodpokilaa (1:1-2)

Dos kodposolamat woy kod-inniyat ni Pablo ki Timoteo (1:3-18)

Dos pomandu ni Pablo to kodti-is to kosupittan (2:1-13)

Dos moppiyon uripon to Monama (2:14-26)

Dos kodbovotasan to minuvu init morin mgo allow (3:1-9)

Id loglohottan ni Pablo si Timoteo no od ponayun nod ponudtuu to kahit Monama (3:10 taman to 4:8)

Dos ponaannon ni Pablo ki Timoteo (4:9-22)

Kodpongumusta (4:19-22)

Kodpokilaa

1 Siyak si Pablo kos mid sulat ka-ay, woy apostoles a ni Disas Krays pomon to id kopi-it Monama. Id popiyod a nikandin amoy'd ponudtuu moka-atag to umuun waad tomanon no id tandu rin keta no nosokkad ki Disas Krays. 2 Id popiyod ku inin sulat duwot kikow, Timoteo no timbang anak ku no id dokollan ku to ginawa. Muopa nod kotanggap du kos kopiyannoy, eru woy kosunayan no id pomon diyot Monamon Amoy woy ki Disas Krays nod Longaggon ta.

Dos Kodposolamat woy Kod-inniyat ni Pablo ki Timoteo

3 Na Timoteo, id posolamat a to Monama nod simba-anon ku iling taddot id puungan to kovuyyahan ku, woy nosorollan ku no iddos kodpuung ku atag to Monama, waa lomig diyon. Allow bulli, waa ku sikkow lingawi riyot koddin dosalon. 4 Od pingpingawon a kikow to nosompottan ku iddos kikow'n dayas iddot kodlogkiyat ku dangan, woy id kopi-i ku en nod pokodkita ki mandon amoy'd kahaa kos ginawa ku. 5 Id posolamat a, su nosorollan ku iddos bonnaavonnaan kopomakoy ru, iling taddot kopomakoy to apu ru no si Loida woy taddot inoy ru no si Eunice no unna pa kikow nid pomakoy. Nokosaddoo a no ungketen dad en mandad kos kopomakoy ru. 6 Ini en kos unayan no id posampot ku kikow, no ko-ilangan nod poogloggon du kos kotuihan no id boggoy to Monama kikow iling to kod-uyag to baha. Notanggap du iddon kotuihan iddot id torungngan ku to koddin bollad kos uu ru. 7 Oyyos waa id boggoy to Monama iddos Ispiritu rin amoy'd taawon ki, ko konna, amoy od mosalig kos ginawa ta, od tavang keta nod mohingginawa ki riyot duma woy amoy od kotuig ki nod tohoo to keton ko-ugolingun.

8 De-en yo kod ko-ilow nod posivonnaa moka-atag tod Longaggon ta. Yo ru mandad id ko-ilow no noprisu a pomon to kodpuung atag kandin, ko konna, ti-is ka duma koddi riyon to mgo kosupittan no no-ukitan ta riyot kodponudtuu to Moppiyon Dinoggan. Ti-is ka, su iddos Monama kos od boggoy to konokkaan. 9 Sikandin kos id tobbus keta woy id aam ki nikandin, su amoy id po-ossa ki no mgo minuvu rin. Id puungan din ini, konna pomon to pinuungan ta, su iddot waa pa bovalli inis ingod, id puhawang din don tapoy no id pokita kos eru rin keta ukit ki Disas Krays. 10 Na ko-ungkay, id pokita rin don iddos eru rin keta ukit to kod-undini ni Disas Krays no Tohodtobbus ta. Id talu rin kos kotuusan to kopotayan, su amoy kod pomakoy ki to Moppiyon Dinoggan, od pokotanggap ki to umuun waad tomanon. 11 Woy id aam a no apostoles amoy od ponudtuu woy'd nonaw ka-ay'n Moppiyon Dinoggan. 12 Woy ini en kos unayan no id ti-is a to kosupittan dinit prisuwan. Piru konna ku ini id ko-ilow, oyyos nokilaa ku iddos id solihan ku, woy nokosaddoo a no od bontayan din en kos langun no id sanna rin koddi taman to allow to kodlivod ni Disas Krays.

13 Na Timoteo, ikulow iddos bonnaan nonaw no norinog du koddi. Ponayun ka riyot kopomakoy woy kodginawa ru pomon to nosokkad ki riyot ki Disas Krays. 14 Woy ukit to kotuusan to Uhis no Ispiritu no id ubpa rinit keta, bontayiu iddos bonnaan nonaw no id sanna to Monama kikow amoy diid kovovaawan.

15 Nosorollan du, no ko-urallan tod pompomakoy riyot prubinsya to Asia, mid tanan don koddi, apii ron en si Figelo woy si Hermogenes.

16 Piru si Onesiforo, waa mid tanan koddi. Muopa no id pokita to Monama kos eru rin diyot langun no sakup to pomilya rin, oyyos komo-uraa a nikandin id inniyat. Konna a mandad nikandin id ko-ilow ahad noprisu a, 17 ko konna, to id inguma sikandin ka-ay't Roma, id nangkap a nikandin taman to nokita a. 18 Nokosaddoo ka mandad taddot dakkoon tavang din to riyon a pa to Efeso. Muopa no iddos od Longaggon, od pokita kandin to eru init allow to kodhukum.