Dos Unnon Sulat ni
JUAN
Unna nod Bosan
Iddos mid sulat ka-ay, si Juan no sokkad taddot mgo tinodduwan ni Disas Krays. To kodsulat ni Juan ka-ay, buyyag don sikandin. Id sulat din ini, atag tod pompomakoy no id pon-ubpa riyot nokod-osso-osson bonuwa no sakup to Asia.
Dos unayan no id sulat din ini, oyyos duwon mgo minuvu no id pitas pomon diyon tod lolivuung nod pompomakoy, woy id nonaw sikandan to uhus moka-atag ki Disas Krays. Id nonaw ran no idda kun so ahad ondan no ka-ay to ampow't ingod, nosombutan en to kororattan. Idda en kos unayan no id nonaw ran, no dii en kun od kopakoy no nominuvu si Disas Krays no duwon lawa iling keta. Duwon mandad id nonaw moka-atag ki Disas Krays, no konna kun en sikandin iddos Mesiyas no Anak to Monama, ko konna, minuvu ra kun sikandin iling keta. Konna ra iddos id nonaw ran kos nokosuwoy to kovonnaan, ko konna, ahad mandad iddos mgo pinuungan dan, oyya su id ikahi ran no moppiya rad kun ahad dii od tanan iddos od pompomakoy to mgo saa ran.
Na pomon ka-ay, id posivonnalan ni Juan, no si Disas Krays kos bonnaan Anak to Monama woy nominuvu no duwon lawa iling keta. Id livodlivod din tid paabbotlabbot, no iddos id ginawa to Monama, ko-ilangan mandad nod pohinowannoy woy od tuman to suhu rin, su idda en kos kilaannan no mgo anak sikandan to Monama. Dos nokotanggap don to Monama, nosorollan dan no duwon umuu ran no waad tomanon pomon taddot Uhis no Ispiritu no riyon don to kandan no ginawa, woy pomon to duwon don ingowollon dan nod ikuu to botasanon ni Disas Krays. Ukit to kandan no kopomakoy, id talu ran si Moivuyan, woy dos langun no minuvu ka-ay to ampow't ingod no waa id pomakoy to Monama.
Dos mgo Nokota-aw:
Si Disas Krays kos Kahi no od pokovoggoy to umuu (1:1-4)
Dos Monama, ko-owangan, de-en diid oubpa riyot mosukirom iddos mgo anak din (1:5 taman to 2:27)
Dos Monama, mohingginawa, de-en od pohinowannoy iddos mgo anak din (2:28 taman to 4:21)
Dos Monama kos id pomonnan to umuu, de-en duwon koponoluwan ukit to kopomakoy ran ki Disas (5:1-21)
1
Si Disas Krays kos Kahi no od Pokovoggoy to Umuu
1 Id sulat ku ini, amoy od ponudtuu koniyu moka-atag kandin no id ngoranan no Kahi no od pokovoggoy to umuun waad tomanon. Duwon don sikandin pomon poron to tigkonayan. Na sikami no mgo tinodduwan, norinog doy ron en sikandin, matamata roy tid kita woy nosomaddan doy sikandin. 2 Id pokita sikandin ka-ay to ampow't ingod. Woy pomon to nokita roy en sikandin, id posivonnaa woy id ponudtuu roy koniyu iddos moka-atag kandin no id pomonnan to umuun waad tomanon. Duma sikandin to Monama pomon poron to tigkonayan, woy id pokita sikandin konami. 3 Na inis nokita woy norinog doy, id ponudtuu roy koniyu amoy od kosokkad kow konami riyot kodposokaddoy roy to Monamon Amoy woy ki Disas Krays no Anak din. 4 Id sulat doy ini, su amoy duwon mooggot no kahaan ta.
Dos Kod-oubpa riyot Ko-owangan
5 Na, iyon nonaw no norinog doy pomon diyot ki Disas no id ponudtuu roy koniyu, no iddos Monama, ko-owangan woy waa en mosukirom diyot kandin. 6 De-en otid ikahi ki no nosokkad kid diyot Monama, piru riyon ki poron to mosukirom, id ouhus ki, oyya su iddos ko-ubpa ta, waa id ikuu to kovonnaan. 7 Piru otik od ubpa ki riyot ko-owangan iling to Monama no riyot ko-owangan, na duwon kodposokaddoy ta. Woy dos longossa ni Disas no Anak din, od awa to langun no saa ta, de-en od kolinisan kid.
8 Otid ikahi ki no waa en saa ta, id uhusan ta kos keton ko-ugolingun woy waa rinit keta iddos kovonnaan. 9 Piru ko bonnaavonnaa ki nod ponudtuu to keton mgo saa riyot Monama, od posinsyan din idda woy od linisan ki nikandin to langun no morat no pinuungan ta. Oyya su od kosolihan sikandin nod puung tadda, woy ollog en kos langun nod puungan din. 10 Piru otid ikahi ki no waa ki nokosaa, iling to id polin-uhus ta iddos Monama.