Ⅰ A-bʋ ꞌma-a -Lagɔꞌɔ nyʋ, -ʋ -nɩꞌa ꞌbhlɩkpɩꞌa -dadudu ꞌꞌkpi, ꞌɩnmɔ Zaakɩ ꞌma-a ɔ-bɔ -Lagɔ ꞌmnɔ -ke -aꞌba -Kɔyi *Zezii *Kliisɩꞌa lbhʋnʋyi, ꞌɩnmɔ poꞌo amʋ ꞌꞌbɔgʋ -nɛɛ -jeyi. ꞌƖnmɔ ꞌyeꞌe amʋ -yeye!

Ⅱ ꞌAn ꞌlotʋꞌa ꞌꞌnynuu-a, lɛꞌꞌo lɛ-ɛ yaꞌa nyɔ ꞌkleyeɛɛ -bodɩ, -bho ɛ bhla amʋ ꞌꞌkpi a, a li ꞌbʋbʋa! Ⅲ -Ɛkedɩmaa, -bho a de -Lagɔ -ke *Zezii ꞌꞌgwli ꞌꞌkɔmʋ, ꞌle a ꞌke lɛ ꞌmnɛ wɔn ꞌmʋ cɛ, ꞌɛ lɛtu-u nʋ -ɛꞌo ꞌle aꞌba ꞌꞌgwlikuɛ-ɛ ꞌkpaꞌa ꞌꞌkpi. Ⅳ ꞌBho ꞌɛ lemʋ, a ꞌꞌdu aꞌba ꞌꞌbhi ꞌꞌyrili ꞌle aꞌba ꞌꞌgwlikuɛ ꞌmnɛ ꞌke ꞌmʋku -ka -zɛgɛka, ꞌle, -ka -Lagɔ ꞌbɔꞌɔ ti a ꞌke -nɩ, a ꞌke -kaa -nɩ -lrɛɛ, ꞌle ꞌꞌnyinynidɩ -kaa amʋ -kɔ! -Bho ɛ -nɩ -kaa a, ꞌꞌlemnɩɩ a -see ꞌbɩ liꞌbhle yi, a -see lɛ ꞌmʋ-bɔ yi.

Ⅴ ꞌLe a ꞌke -kaa -nɩ a, -bho nyɔ se ꞌle aꞌba ꞌꞌklumʋ -naagɩ ꞌbhle ꞌbho lɛꞌɛ ꞌꞌkpi, ɔ ꞌybhaa nɛ -Lagɔ! ꞌƖnnɔ ꞌye ɛ ɔ ꞌꞌnyɩ mʋ. -Ɛkedɩmaa, ɔ-ɔ ꞌꞌnyɩ-e nyɔꞌꞌo nyɔ lɛ ꞌɔ -pɔlʋꞌa klɛ ti, ꞌle, -bho ɔ -ka -kaa nyɔ-ɔ ꞌꞌnyɩ a, ɔ-ɔ ꞌꞌnyɩ -ɔꞌo -yoboo. Ⅵ Ɛ -nɩꞌa -kaa ꞌmʋ a, -bho aꞌba ꞌꞌklumʋꞌa nyɔ ꞌybhaa -Lagɔ lɛ, ɔ de ꞌꞌgwli na ɔ-ɔ ꞌye -ɔ ɛ ꞌꞌnyɩ -mʋ! ꞌƆ ꞌkɔlʋ -le! A yibo ꞌꞌniꞌa ꞌꞌtarili ꞌnɩ? -Bho -bibie -ka yi, -bho ɛ cɛ ꞌya ꞌplan, ꞌnɔɔ ɛ ꞌybhaꞌa ꞌtɩn, ꞌle-e ɛ-ɛ ꞌꞌvuto nɩꞌo. Nyɔ -ke -pɔlʋ ꞌkɔlʋꞌa a, -ka -lue ꞌmnɔ, ꞌka-a ꞌɔ dɩ -nɩꞌo -lrɛɛ. Ⅶ-Ⅷ Nyɔ-ɔ -nɩꞌa -kaa a, ꞌɔ nyɔtu -see ꞌle ꞌɔ -pɔlʋꞌa klɛ -za ꞌle ɔ ꞌke ɛ -Lagɔ -jeyi ꞌꞌnyɩ. ꞌƆ -pɔlʋ ꞌmnɛ ꞌgble-ɛꞌɛ ꞌmʋ-ɛꞌɛ dɩ, ꞌɔ popo ꞌgwlʋti -le na -Lagɔ-ɔ ꞌye -ɔ -zɛgɛ ꞌꞌlruli-nʋ -mʋ!

Ⅸ A -gblee, nyɔ-ɔ ꞌma-a *Zeziiꞌa nyɔ, -ɔ ꞌꞌlrɛꞌɛ ꞌbho ɔ -bonyunyuꞌa ꞌꞌyigbeyi, ɔ li ꞌbʋbʋa, -ɛkedɩmaa, nyʋ -lrʋʋ -Lagɔ -kɔꞌɔ ɔ, ɔ ꞌꞌnyɩ -ɔ ꞌbɩ ꞌle ꞌwa ꞌꞌklumʋ! Ⅹ Nyɔ-ɔ ꞌma-a Zeziiꞌa nyɔ, -ɔ ꞌbhleꞌa ꞌnynɩ tenyɩ, ɔ li ꞌbʋbʋa -lrɛɛ, -ɛkedɩmaa, -Lagɔ -yɔ ꞌɔ-ɔ ꞌzɔ ꞌle ɔ ꞌke ɔ -kɔ! -Ka -sukuiꞌa ꞌꞌbowleꞌa -gwleꞌa ꞌmʋ ꞌle ɩ-ɩ sɔꞌɔ ti, ꞌɔ ꞌꞌbhuo yiboꞌo-o ꞌka-a ꞌɔ tinɩɛ -nɩꞌo. Ⅺ A -gblee, -bho ꞌyrʋ fan tenyɩ, -sukui-i ꞌꞌzrɛ-ɛ li, ꞌya ꞌꞌbowle-e yɛ-oꞌo ꞌle ɩ-ɩ cɛꞌɛ tawɔn, ɩ-ɩ ꞌgaꞌa ti, ꞌle ɩ -ke ꞌya ꞌꞌyrilinmɔɛ-ɛ sɔꞌɔ ti. -Ka -lue ꞌmnɔ, ꞌka-a ꞌꞌwlilɛbhleyi-i sieꞌe ꞌɔ -kɔkɔlɩ ti.

Ⅻ A -gblee, nyɔ ꞌkleyelɩ bhlaꞌa ꞌꞌkpi, -ɔ -kuꞌa ꞌliti, -ɔ cɩ ꞌɩ wɔn ꞌmʋ a, ɔ ꞌwa-a ti, -ɛkedɩmaa, ɔ ꞌbhle-e -Lagɔ -ke *Zeziiꞌa ꞌꞌgwlideɛ ꞌmʋ. ꞌBho ꞌɛ lemʋ, -Lagɔ-ɔ ꞌnʋ -ɔ -zɛgɛ ꞌꞌlruli. Ɔ-ɔ ꞌꞌnyɩ -ɔ ꞌꞌkɔgwlɛtinɩɛzɛgɛ ꞌle ɛ-ɛ ꞌꞌyi ꞌɔ ꞌmʋ, ɛ-ɛ ꞌpɩpleꞌe ti ꞌbho ꞌɔ ꞌꞌtroli. Nyʋ-ʋ -kmaꞌa -Lagɔꞌɔ dɩ, ꞌɩnnʋ ɔ ꞌꞌdu ꞌɛ wɔn ꞌmʋti see. ⅩⅢ Lɛ-ɛ ꞌka nyɔ ꞌꞌnyinynidɩ wɔnpo ꞌbho -Lagɔꞌɔ ꞌꞌyigbeyi, -bho ɛ bhla aꞌba ꞌꞌklumʋꞌa nyɔ ꞌꞌkpi, ꞌɔ nʋ na: -Lagɔ -nɩꞌe ꞌɩnmʋ tidɩnnamʋ, -le! -Ɛkedɩmaa, lɛꞌꞌo lɛ se ꞌbhɛɛ ɛ ꞌke ɔ ꞌle ꞌꞌnyinynidɩꞌa nʋnʋa ꞌmʋ po ꞌle ɔ se ꞌbhɛɛ ɔ ꞌke nyɔ tiꞌdɩn ɔ ꞌke ɩ nʋ -lrɛɛ. ⅩⅣ A ꞌye li-ɔ, nyunyɔꞌɔ ꞌꞌnyinyninaagɩ ɔ ꞌbhleꞌa ꞌmʋ, ꞌɩnnɩ jri ꞌɔ ꞌle, ꞌle ɩ-ɩ ꞌꞌtuu nɔꞌo, ɔ-ɔ nʋꞌo ꞌꞌnyinynidɩ ꞌbho -Lagɔꞌɔ ꞌꞌyigbeyi. ⅩⅤ Kɩn, ɩ-bɩ ꞌꞌnyinyninaagɩ ꞌmnɩ, -bho nyɔ kpɩ ɩ, ꞌle ɔ-ɔ ꞌgaꞌa ꞌle ꞌꞌnyinynidɩ ꞌmʋ ti. A -gblee, ɩ-bɩ ꞌꞌnyinynidɩ ꞌmnɩ, ꞌmɛmɛɛ ɩ poꞌo ꞌꞌlru ꞌꞌkpi ti ꞌbho -Lagɔꞌɔ ꞌꞌyigbeyi.

ⅩⅥ ꞌAn dɩkmalotʋꞌa ꞌꞌnynuu-a, aꞌba ꞌꞌmaa aꞌba ꞌꞌbhi dɩ ꞌꞌyrili -le! ⅩⅦ Lɛꞌꞌo lɛ-ɛ ꞌma-a -zɛgɛ, nyɔ-ɔ ꞌyeꞌa a, -Lagɔ -yaꞌa ꞌyrʋ-e, ꞌcʋ -ke ꞌcʋdrɩ ti, ꞌle ɔ ꞌmʋ ɛ-ɛ ꞌwlʋꞌo. ꞌƆ zizia ꞌꞌyi. -Bho ɩ -nɩ tan -ka fan, -ka ɩ-ɩ yaꞌa -zuzu ꞌle ꞌfɔtɩ -lrɩɩ gbo ꞌle ɛ ꞌbhɛɛꞌo ɛ ꞌke ꞌꞌyizizia a, ɔ se -kaa -nɩ. ⅩⅧ ꞌƆ wlu-u ꞌma-a -ziadɩ, a ꞌwɔnꞌɔ ꞌbɔ, ꞌle ɛ ꞌmʋ a ꞌye -nɩꞌe ꞌꞌkɔgwlɛtinɩɛzɛgɛ. ꞌLe ꞌɔ ꞌgwlʋdɩ ꞌmʋ ɔ nʋꞌo -kaa, ꞌle, ꞌbho lɛꞌꞌo lɛ ɔ -yaꞌa tiꞌa damʋ, -abʋ ꞌke kpɔ cɛ ꞌɔ dɩ, -ka lɩꞌa ꞌꞌyizabhi nyɔ-ɔ ꞌꞌnyɩꞌa -Lagɔ, ꞌya ka.

ⅩⅨ ꞌAn dɩkmalotʋꞌa ꞌꞌnynuu-a, wlu-u nʋꞌa: -Bho ɛ ꞌꞌdu dɩꞌa -lokuiponamʋ, a ꞌꞌtɩtra li! -Bho ɛ ꞌꞌdu -wlunamʋ, aꞌba wɔnꞌɔ ꞌfɩɩn ti -le! Dɩ-ɩ ꞌka amʋ ꞌcɛ ꞌꞌyi ꞌlbhaa, -bho ɩ -yɛ amʋ, aꞌba ꞌꞌbɔ -le!, ɛ-bɛ wlu ꞌmnɛ, a popo ꞌɛ dɩ ꞌgwlʋti! ⅩⅩ A -gblee, -bho nyɔ po ꞌcɛ, lɛꞌꞌo lɛ ɔ-ɔ nʋꞌa a, ɛ se ꞌꞌyiꞌsrɛɛ ꞌbho -Lagɔꞌɔ ꞌꞌyigbeyi. ⅩⅪ ꞌƐ dɩ, lɛꞌꞌo lɛ-ɛ ꞌma-a ꞌꞌnyinynidɩ ꞌbho -Lagɔꞌɔ ꞌꞌyigbeyi, a ple ɛ li! A -nmɔ kpli ꞌmʋ, ꞌle, -Lagɔꞌɔ wlu a ꞌwɔnꞌɔ ꞌbɔ, -ɛ poꞌa ꞌkpʋ glu ꞌle amʋ ꞌmʋ, a ꞌꞌdu ɛ ꞌbho! Ɛ-bɛ wlu ꞌmnɛ ꞌbhle-e wɔnkuɛ ꞌmʋ, aꞌba ꞌpʋnpʋan a ꞌyeꞌa ꞌbho -Lagɔꞌɔ ꞌꞌyigbeyi, ꞌle ɛ ꞌke ɛ nʋ a ꞌke ɛ ꞌli ti-de ꞌꞌkɔmʋ.

ⅩⅫ A -gblee, -bho a -ka ꞌɔ wlu -lokui-ipo, -ka ɔ ꞌlɛꞌɛ ꞌtɩn, -bho aꞌba nʋ -kaa a, a-a ꞌꞌmaa-a aꞌba ꞌꞌbhi dɩ ꞌꞌyrili. ꞌƐ dɩ a ꞌꞌdu ꞌbho ꞌɔ wlu! ⅩⅩⅢ A ꞌye li-ɔ, nyɔ-ɔ po ꞌɔ -lokui, -ɔꞌɔ ꞌꞌduꞌa ꞌbho ꞌɔ wlu a, ɔ kɔɔꞌɔ-ɔ -ka nyɔ -lue-e ꞌꞌluoꞌa ka ꞌꞌyena ꞌmʋ, ɔ ꞌye ꞌɛ ꞌli popo ꞌle ɔ ꞌyeꞌa lɛ -lue liꞌye ꞌle ꞌɔ ꞌꞌyigbeyi. Ɔ nʋꞌa -kaa, ɔ ꞌꞌtayi ꞌnɛ-ɛ ꞌꞌyiti. ⅩⅩⅣ -Nɔɔ gbɛ ziꞌa a, -ka ꞌɔ ꞌꞌyigba -nɩꞌa, ɔ ꞌmateꞌe-e -kaa. Ɔ -see ɛ nmaze. ⅩⅩⅤ Ɛ -nɩꞌa -kaa ꞌmʋ, -Lagɔwlu ꞌꞌnyɩꞌa nyɔ ꞌꞌyiflɔɛ, nyɔ-ɔ ꞌcrɛ ꞌɛ ꞌmʋti, ꞌle, -ka ɛ ꞌlɛꞌɛ ꞌtɩn, -ɔ -naꞌa -kaa, -Lagɔ-ɔ ꞌnʋ -ɔ ꞌɛ dɩ -zɛgɛ ꞌꞌlruli. ꞌƆ nyɔtuꞌa po -lokui bhubhuyiti. Ɔ-ɔ ꞌꞌdu -ɛ ꞌbho. -Bho ɔ nʋ -kaa, ꞌꞌlemnɩɩ ɔ-ɔ wʋnna ꞌnɔ-ɔ ꞌꞌniti, -ɛkedɩmaa, ꞌɛ lɛtu-u ꞌmo-o wluzɛgɛ.

ⅩⅩⅥ -Bho nyɔ nʋ Zeziiꞌa nyɔ ɔ ꞌꞌduꞌo, -bho ɔ -ka dɩ ꞌmʋ-ʋza -flafla a, ɔ-ɔ ꞌꞌmaa-a ꞌɔ ꞌꞌbhuo. Bhʋ ɔ-ɔ naꞌa ꞌbho -aꞌba -tɩta -Lagɔꞌɔ -jeyi, ɛ-ɛ ꞌmo-o bhubhulɛ. ⅩⅩⅦ -Dɩgbanynʋkpakpɩ -ke ꞌꞌkuenynuu -nɩꞌa sɩanamʋ, nyɔ-ɔ ziꞌa ꞌwa dɩ ꞌle ɔ ꞌꞌsiꞌa ꞌbho, -ɔ pleꞌa ꞌꞌnyinynidɩ li, ꞌɔ nyɔtuꞌa -nanabhʋ nʋ ꞌɔ ꞌtʋ ꞌbho ꞌɔ -jeyi.