Su Ketelu nek Sulat ni
San Juan
Pesi'una
Su Ketelu nek Sulat ni Juan sinulat ne “Geseg” sek simbaan para sek sala ne geseg sek simbaan ne su ngalanen si Gayo. Sinaya' nung menenulat si Gayo tendeng sek pegabang tu sed duma ne ngang mektetu'u riin ni Christ bu' minegul giin kuntra ri sek sala ne getaw ne si Diotrefes.
Ngang Misulat ri sek Sulat keni
I. Pesi'una 1-4
II. Sinaya' si Gayo 5-8
III. Si Diotrefes bu' si Demetrio 9-10
IV. Pisiddegegan si Demetrio 11-12
V. Su Ketapusan ne ngak Pengumusta 13-15
1
1 ✡ 1: Su Ngak Pimbaal 19.29; Roma 16.23; 1 Corinto 1.14. Seni'a Gayo nek pinetail'u gupiya,
Gaku' su geseg se ngang mektetu'u.
2 Pinetail'u nek sambat, gangut'u ne su kada ne ngag betang mekegbegay siya riin seni'a ne kepiyanan bu' melengas ne dlawas—sumala' seng misuunan'u neng melengas su gispirituhanen mu ne kebetang. 3 Pidleliyagu gaid sek peddateng sed duma ne nga kepeteran riin ni Christ bu' miktabal ri senaan gendun'a kemetinumanen ri se kemetuuran bu' midleketubu'a kanunay riin se kemetuuran. 4 Nda'irun naing mekepedleliyag gupiya ri senaan gawas bu' merengegan'u ne su nga gembata'u midleketubu' riin se kemetuuran.
Sinaya' si Gayo
5 Pinetail'u nek sambat, metinumanen'a gupiya kanunay sek pegabang para sed duma ne nga kepeteran riin ni Christ, isan ne ngak tuwa' ilan. 6 Migasuy ilan tu se ngang mektetu'u rini sek simbaan metendeng sek petail mu. Melengas pa siya para seniyu nek pelaangen niyu ilan sek pebiyan neng mekepedleliyag ri sed Diwata. 7 Ay minlaang ilan sek pegasuy tu se nga getaw metendeng riin ni Christ, bu' ri sek pedlaang nilan, ndi' ilan dumawat ne gabang buwat se nga gena' mektetu'u. 8 Gita ne ngang mektetu'u riin ni Christ, kina'enlan megabang ri se nga getaw keni, arun kebahin ita riin sek terbahu nilan para se kemetuuran.
Si Diotrefes bu' si Demetrio
9 Miksulatu ne gempelek tu se ngang mektetu'u riin sek simbaan; ma'ad si Diotrefes, liyagaan medlegeseg ri senilan, nda' pengimbaan ri sek tinalu'u. 10 Aas bu' matengu riin, asuy'u rayun su dlaun neg betang neg binaalen: melaat gupiya ne ngag betang suk pimentalu'en metendeng ri senita bu' ngag balus suk tinalu'en! Ma'ad gena' pa itu gigu' para seniin; ndi'en duwaten sud duma ne nga kepeteran riin ni Christ bu' mateng, bu' belebagaan su nga getaw neng meddawat ri senilan bu' pepe'awa'enen riin sek simbaan!
11 Pinetail'u nek sambat, ndi' mu uwatay landuning melaat, ma'ad awat mu landuning melengas. Isan ta' sung megbaal neng melengas misakup ri sed Diwata; ma'ad sung megbaal seng melaaten nda' mekiita' ri sed Diwata. 12 Su kada sala miktalu' neng melengas si Demetrio; su kemetuuran na mismu sung migasuy neng melengas giin. Bu' dugangan sek pekpemetuud ta, miktalu' ami rema neng melengas giin.
Su Ketapusan ne ngak Pengumusta
13 Melaun pa siyaing metalu'u ri seniyu, ma'ad ndi'u ini pebiyanen riin sek sulat. 14 Midderamau neng me'ita'u amu se gendi' mpayat, bu' rayun meketuntul ita. 15 Su kelinaw mperiin siya seniyu.
Su dlaun ne ngak sambat mu rini mingumusta ri seni'a. Pengumusta mau tu se dlaun ne ngak sambat ta riin.
Daal da ini.