1 དེ་ཡང་ཡ་ཧུ་དཱ་བདག་ནི་ཡེ་ཤུ་མཱ་ཤི་ཀའི་ཞབས་ཕྱི་པ་དང་ཡ་ཀོབ་ཀྱི་སྤུན་ཡིན་ལ། ཞལ་འབོད་ཐོབ་པ་དང་། ཡབ་དཀོན་མཆོག་ནང་དུ་གཅེས་སུ་འཛིན་ཞིང་ཡེ་ཤུ་མཱ་ཤི་ཀའི་ཆེད་དུ་སྲུང་བར་མཛད་པ་རྣམས་ལ་འཕྲིན་ཡིག་འདི་སྤྲིངས་པའོ༎ 2 ཐུགས་རྗེ་དང་། ཞི་བདེ། བྱམས་པ་བཅས་ཁྱོད་ཅག་ལ་མང་དུ་འཐོབ་པར་ཤོག།

3 སྙིང་ནས་བརྩེ་བའི་སྤུན་ཟླ་རྣམས། ངས་རང་རེའི་ཐུན་མོང་གི་ཐར་པ་སྐོར་གྱི་གཏམ་ཁྱོད་ཅག་ལ་འབྲི་བར་ནན་གྱིས་བརྩོན་ཅིང་། སྔར་ལན་གཅིག་དད་ལྡན་དམ་པ་རྣམས་ལ་གཏད་པའི་དད་པའི་ཕྱིར་བརྩོན་པ་ལྷོད་མེད་བྱེད་ཆེད། ད་ལྟ་ཅི་ནས་ཀྱང་ཁྱོད་ཅག་ལ་འཕྲིན་ཡིག་བྲིས་ནས་སྐུལ་མ་གཏོང་དགོས་བྱུང་ངོ་།། 4 རྒྱུ་མཚན་ནི་སྔར་ནས་ཉེས་ཆད་ཕོགས་པར་ཐག་གིས་བཅད་པའི་དད་གུས་མེད་པ་རྣམས་ལྐོག་ནས་ཁྱོད་ཅག་གི་ཁྲོད་དུ་ཞུགས་ཡོད་ཅིང་། ཁོ་རྣམས་ཀྱིས་རང་རེའི་དཀོན་མཆོག་གི་ཐུགས་རྗེ་དེ་འདོད་གཡེམ་བག་ཡངས་སུ་གཏོང་བའི་གོ་སྐབས་སུ་བསྒྱུར་བར་མ་ཟད། རང་རེའི་བདག་པོ་དང་གཙོ་བོ་གཅིག་པུ་སྟེ་ཡེ་ཤུ་མཱ་ཤི་ཀའང་སྤང་བར་བྱེད་པའོ།།

5 དེ་སྔར་གཙོ་བོས་རང་གི་འབངས་མི་ཨེ་ཅིབ་ཡུལ་ནས་བསྐྱབས་ཤིང་། ཕྱིས་སུ་དད་པ་མེད་པའི་མི་དེ་རྣམས་མེད་པར་མཛད་དོ།། དོན་དེ་ཐམས་ཅད་ཁྱོད་ཅག་གིས་ཤེས་ནའང་། ངས་ད་དུང་ཁྱོད་རྣམས་ལ་དྲན་སྐུལ་བྱ་འདོད། 6 ཡང་རང་གི་འགན་གནས་མ་བསྲུངས་པར་རང་གནས་བསྐྱུར་བའི་ཕོ་ཉ་རྣམས་ནི། ལེགས་ཉེས་ཀྱི་ཁྲིམས་ཐག་གཅོད་པའི་ཉིན་ཆེན་པོ་དེའི་བར་དུ། དཀོན་མཆོག་གིས་ལྕགས་སྒྲོག་བརྒྱབ་སྟེ་ཇི་སྲིད་བར་དུ་མུན་ནག་ལ་བཅུག་གོ། 7 ཡང་སཱ་དོམ༌དང༌གཱ་མོ༌ར་དང་མཐའ་འཁོར་གྲོང་ཁྱེར་གྱི་མི་རྣམས་ཀྱིས་ཀྱང་དེ་དག་དང་འདྲ་བར་ལོག་གཡེམ་རྐྱང་རྐྱང་བྱེད་ཅིང་འདོད་ཆགས་ཕྱིན་ཅི་ལོག་པ་ལ་བསྟུན་པས། ནམ་ཡང་ཞི་བ་མེད་པའི་མེའི་ཆད་པ་ཕོག་སྟེ་མི་རྣམས་ལ་ཉེན་བརྡ་བཏང་འདུག་གོ།

8 རྨི་ལམ་ལ་མགོ་འཐོམ་པའི་མི་འདི་དག་གིས་ཀྱང་དེ་རྣམས་དང་འདྲ་བར་ལུས་པོ་བཙོག་པར་བྱེད་ཅིང་། དབང་འཛིན་མཁན་རྒྱབ་ཏུ་འདོར་བ་དང་། གཟི་བརྗིད་ཅན་ལ་འཕྱ་སྨོད་བྱེད་པའོ།། 9 ཕོ་ཉའི་མཆོག་མེའ་ཀཱ་ཨེལ་གྱིས་མོ་ཤེའི་སྐུ་གདུང་གི་སྐོར་ནས་བདུད་ལ་རྩོད་པའི་དུས་སུ། སྨོད་ཚིག་གསུང་མ་ཕོད་པར། གཙོ་བོས་ཁྱོད་ལ་བཀའ་བཀྱོན་མཛད་པར་གྱུར་ཅིག་ཅེས་སྨྲས་པ་ཡིན། 10 འོན་ཀྱང་མི་འདི་རྣམས་ཀྱིས་རང་གིས་མི་ཤེས་པ་ལ་འཕྱ་སྨོད་བྱེད་པ་དང་། དེ་རྣམས་ནི་ཤེས་རྒྱ་མེད་པའི་དུད་འགྲོ་དང་མཚུངས་ལ། རང་རྒྱུད་ནས་ཤེས་པའི་དོན་ཁོ་ན་བསྒྲུབས་ནས་རང་ཉིད་འཕུང་བའོ།།

11 དེ་དག་ལ་ཆག་སྒོ་འབྱུང་ངོ་།། ཅིའི་ཕྱིར་ཞེ་ན། དེ་རྣམས་ཀཱ་ཡན་གྱི་ལམ་ལ་ཞུགས་ཤིང་། ཡང་རྒྱུ་ནོམ་པའི་ཆེད་དུ་པེལ་ཨམ་གྱི་ནོར་འཁྲུལ་ནང་དུ་བརྒྱུགས་ཏེ། ཀོ་རཱ་ཡི་རྒྱབ་འགལ་ཁྲོད་དུ་མེད་པར་གྱུར་པའི་ཕྱིར་ཡིན། 12 མི་དེ་རྣམས་ནི་ཁྱོད་ཅག་གི་མཛའ་བརྩེའི་གསོལ་སྟོན་སྟེང་དུ་ནག་ཐིག་ཡིན། དེ་རྣམས་ནི་ཁྱོད་ཅག་དང་མཉམ་དུ་ཟས་ལ་རོལ་བའི་དུས་སུ་འཇིགས་སྣང་མེད་ཅིང་། རྫི་བོས་རང་གི་ལྟོ་བ་ཁོ་ན་འགྲང་བར་བྱེད་པ་དང་མཚུངས། དེ་རྣམས་ནི་ཆར་ཆུ་མེད་པའི་སྤྲིན་ལྟར་རླུང་གིས་འཁྱེར་བ་དང་འདྲ་ལ། སྟོན་ཁའི་ཤིང་འབྲས་མེད་པའི་ལྗོན་ཤིང་དང་མཚུངས་པར་ལན་གཉིས་ཤི་ནས་རྩ་བ་བལ་པ་དང་འདྲ། 13 ཡང་རྒྱ་མཚོའི་རྦ་རླབས་དྲག་པོ་དང་མཚུངས་པར་རང་ཉིད་ཀྱི་ངོ་གནོང་བའི་ལྦུ་བ་འཕྱུར་བ་དང་འདྲ། དེ་རྣམས་རྒྱུ་སྐར་དང་མཚུངས་ཤིང་མུན་པའི་སྨག་རུམ་ནི་རྒྱུན་ནས་རྒྱུན་དུ་ཁོ་ཚོའི་དོན་དུ་བསྐྱུར་ཡོད་པའོ། །

14 ཨ་དམ་གྱི་མི་རབས་བདུན་པ་ཧ་ནོག་གིས་ཀྱང་དེ་དག་ལ་ལུང་བསྟན་གནང་སྟེ། ལྟོས་དང་། གཙོ་བོ་རང་ཉིད་ཀྱི་འཁོར་དམ་པ་ཁྲི་སྟོང་ཁྲིད་ནས་ཕེབས་ཏེ། 15 མི་ཐམས་ཅད་ཀྱི་སྟེང་དུ་ཁྲིམས་ཐག་གཅོད་ཅིང་། དད་གུས་མེད་པའི་མི་རྣམས་ཀྱིས་བྱས་པའི་དད་གུས་མེད་པའི་ལས་རྣམས་ལ་ར་སྤྲོད་མཛད་པ་དང་། དད་གུས་མེད་པའི་མི་སྡིག་ཅན་རྣམས་ཀྱིས་ཁོང་ལ་ཚིག་རྩུབ་སློག་པ་ཐམས་ཅད་ལ་ར་སྤྲོད་མཛད་ཅེས་གསུངས་སོ།། 16 མི་དེ་དག་གིས་སྡུག་སྐད་འདོན་པ་དང་། གཞན་ལ་སྐྱོན་འཛུགས་པ། རང་འདོད་བཞིན་སྤྱོད་པ། ངག་ནས་ཚིག་སྦོམ་སྨྲ་བ། རང་ལ་ཕན་ཐོགས་པའི་ཕྱིར་མི་ལ་ངོ་སོ་བྱེད་པའོ།།

17 སྙིང་ནས་བརྩེ་བའི་སྤུན་ཟླ་རྣམས། བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་སྐུ་ཚབ་པ་རྣམས་ཀྱིས་སྔོན་ཆད་ཅི་གསུངས་པ་ཁྱོད་ཅག་གིས་དྲན་པར་གྱིས། 18 དེ་རྣམས་ཀྱིས་སྔོན་ཆད་ཁྱོད་ཅག་ལ་འདི་སྐད་དུ། མཐའ་མའི་དུས་སུ་འཕྱ་སྨོད་བྱེད་མཁན་འབྱུང་བར་ངེས་ལ། དེ་དག་གིས་རང་གི་དད་གུས་མེད་པའི་རང་འདོད་བཞིན་སྤྱོད་པར་འགྱུར་ཞེས་གསུངས་མྱོང་ངོ་།། 19 མི་དེ་དག་ནི་ཕྱོགས་ཁག་སྒྲིག་པར་མོས་པ་དང་། འཇིག་རྟེན་པའི་སེམས་དང་ལྡན་པ། དམ་པའི་ཐུགས་ཉིད་དང་མི་ལྡན་པ་བཅས་ཡིན། 20 སྙིང་ནས་བརྩེ་བའི་སྤུན་ཟླ་རྣམས། ཁྱོད་ཅག་གིས་མཆོག་ཏུ་དམ་པའི་དད་པ་ཡི་ནང་རང་ཉིད་བརྟན་པོ་བྱེད་དགོས་ཤིང་། དམ་པའི་ཐུགས་ཉིད་ཀྱི་ངང་ནས་གསོལ་འདེབས་ཞུ་བ་དང་། 21 གཞན་ཡང་མཐའ་མེད་པའི་ཚེ་སྲོག་ཏུ་དྲངས་པའི་བདག་ཅག་གི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ལ་རེ་སྒུག་བྱེད་པའི་ཚེ། རང་ཉིད་ནི་དཀོན་མཆོག་གི་བྱམས་བརྩེའི་ནང་དུ་གནས་པར་གྱིས་ཤིག 22 མི་ལ་ལའི་སེམས་སུ་ཐེ་ཚོམ་སྐྱེས་ན། ཁྱོད་ཅག་གིས་དེ་དག་ལ་སྙིང་རྗེ་བསྐྱེད་པར་གྱིས། 23 ཡང་ལ་ལ་ནི་ཁྱོད་ཅག་གིས་མེ་ལས་བླངས་ཏེ་བསྐྱབ་པར་བྱའོ།། ཡང་ཁ་ཤས་ལ་ཁྱོད་ཅག་གིས་མཚེར་སྣང་གི་སེམས་དང་བཅས་སྙིང་རྗེ་བསྐྱེད་པ་དང་། ཐ་ན་འདོད་ཆགས་ཀྱི་དབང་གིས་མི་གཙང་བར་བྱས་པའི་གྱོན་གོས་དེ་ལའང་ཞེན་པ་ལོག་དགོས་སོ།།

24 ཁྱོད་རྣམས་ས་ལ་མི་འགྱེལ་བ་དང་སྐྱོན་གྱི་དྲི་མས་མི་གོས་པར་བསྲུངས་ནས། ཁོང་གི་གཟི་བརྗིད་ཀྱི་དྲུང་དུ་དགའ་མགུ་ཡི་རང་ངང་ཚུགས་སུ་འཇུག་པར་མཛད་ནུས་པ་སྟེ། 25 བདག་ཅག་གི་སྐྱབས་མགོན་དཀོན་མཆོག་གཅིག་པུ་དེ་ཉིད་ལ། བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས། བསྐལ་པ་ཐམས་ཅད་ཀྱི་ཡར་སྔོན་དང་དུས་ད་ལྟ་དང་། ཇི་སྲིད་བར་དུ་གཟི་བརྗིད་དང་། སྙན་གྲགས། ནུས་མཐུ། དབང་ཐང་བཅས་འབུལ་བར་བྱའོ། །ཨ་མེན།། །།