1 དེ་ལྟར་ཡིན་པས། ངེད་རྣམས་ཀྱིས་སེམས་ནས་མ་བཟོད༌དེ། ཡ་ཏེན་དུ་ངེད་རྣམས་གཅིག་པུར་སྡོད་པར་སེམས༌ཤིང༌། 2 ཁྱོད་རྣམས་དད་པའི་ཕྱོགས་ནས་བརྟན་པོར་གཏོང་བ་དང་དེ་ལ་བསྐུལ་སློང་བྱེད་པའི་ཕྱིར། ངེད་ཅག་གི་སྤུན་ཟླ་ཐི་མོ་ཐེ་ཁྱོད་ཅག་གི་གམ་དུ་མངགས༌ཤིང་། ཁོ་རང་ནི་སྐྱབས་མགོན་མཱ་ཤི་ཀའི་འཕྲིན་བཟང་གི་ཐད་དཀོན་མཆོག་གི་ཞབས་ཕྱི་པ་ཡིན་ནོ།། 3 དེ་ནི་སུ་ཞིག་གིས་དཀའ་སྡུག་མྱངས་ནའང་སེམས་མི་འཁྲུག་པའི་ཕྱིར༌ཏེ། བདག་ཅག་གིས་དཀའ་སྡུག་མྱོང་བ་ནི་དཀོན་མཆོག་གི་ཐུགས་དགོངས་བཞིན་ཡིན་པ་ཁྱོད་རྣམས་ཀྱིས་ཤེས་པའི་ཕྱིར༌རོ།། 4 དེ་སྔར་ངེད་རྣམས་ཁྱོད་ཅག་གི་གམ་དུ་ཡོད༌དུས། བདག་ཅག་གིས་དཀའ་སྡུག་མྱང་བར་ངེས་ཞེས་སྔ་མོ་ནས་ཁྱོད་ཅག་ལ་སྨྲས་མྱོང་བ༌དང༌། རྗེས་སུ་དངོས་གནས་དེ་བཞིན་དུ་བྱུང་བ་ཁྱོད་རྣམས་ཀྱིས་ཤེས་སོ།། 5 དེའི༌ཕྱིར། བདག་གིས་བཟོད་བསྲན་བྱེད་མ་ཐུབ་པ་དང་ཁྱོད་རྣམས་ཀྱི་དད་སེམས་ཅི་འདྲ་ཡིན་པ་ཤེས་པའི་ཕྱིར་ཁོ་རང་མངགས༌པ་དང་། དེ་ནི་བསླུ་བྲིད་བྱེད་མཁན་གྱིས་ཁྱོད་རྣམས་རྦད་དེ་བསླུས༌ནས། ངེད་ཅག་གིས་འབད་པའི་རྩོལ་བ་དེ་དོན་མེད་དུ་འགྲོ་བར་དོགས་པས༌སོ།།

6 འོན༌ཀྱང༌། ད་ལྟ་ཐི་མོ་ཐེ་ཁྱོད་རྣམས་ཀྱི་གམ་ནས་ཕྱིར་ངེད་ཅག་གི་མདུན་དུ་ལོག༌སྟེ། ཁྱོད་ཅག་གི་དད་པ་དང་བྱམས་པའི་སྐོར་གྱི་གཏམ་བཟང་སྨྲས༌ཤིང༌། ཡང་ཁྱོད་ཅག་གིས་རྟག་ཏུ་ངེད་རྣམས་སྙིང་ནས་དྲན་ཞིང་ངེད་ཅག་ནི་ཁྱོད་རྣམས་ལ་འཕྲད་འདོད་པ༌ལྟར། ཁྱོད་རྣམས་ཀྱང་ངེད་ཅག་དང་འཕྲད་འདོད་པའི་གཏམ་སྨྲས༌པས། 7 སྤུན་ཟླ༌རྣམས། ངེད་ཅག་ལ་རང་གི་སྡུག་བསྔལ་དང་དཀའ་སྡུག་སྣ་ཚོགས་ཁྲོད་ནས་ཁྱོད་ཅག་གི་དད་སེམས་ཀྱི་དབང་གིས་སེམས་གསོ་ཐོབ༌བྱུང་། 8 གལ༌ཏེ། ཁྱོད་རྣམས་གཙོ་བོ་ལ་བརྟེན་ནས་དད་པ་བརྟན་པོར་འདུག༌ན། ངེད་རྣམས་ཀྱང་དངོས་གནས་གསོན་པོ་ཡིན་ནོ།། 9 དཀོན་མཆོག་གི་སྤྱན་སྔར་ཁྱོད་ཅག་གི་རྐྱེན་གྱིས་ངེད་རྣམས་ཤིན་ཏུ་དགའ་སྤྲོ་སྐྱེས༌བྱུང་། དགའ་སྤྲོ་འདི་དག་གི༌ཕྱིར། ངེད་ཅག་གིས་ཁྱོད་རྣམས་ཀྱི་ཆེད་དུ་དཀོན་མཆོག་ལ་བཀའ་དྲིན་ཅི་ལྟ་བུ་ཞིག༌ཞུའམ། 10 ཁྱོད་ཅག་དང་ཕྲད་ནས་ཁྱོད་རྣམས་ཀྱི་དད་སེམས་ནང་མི་ཚང་བ་དེ་བསྐང་བའི་ཕྱིར། ངེད་རྣམས་ཀྱིས་ཉིན་མཚན་ཀུན་ཏུ་ནན་ཏན་སྒོས་གསོལ་བ་བཏབ་པ་ཡིན༌ནོ།།

11 བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུས་ངེད་རྣམས་ཁྱོད་ཅག་གི་གམ་དུ་འགྲོ་བར་ལམ་བུ་ཞིག་ཕྱེ་བར༌མཛོད། 12 ཡང་ངེད་ཅག་གིས་ཁྱོད་རྣམས་ལ་གཅེས་པ༌བཞིན། ཁྱོད་རྣམས་ཀྱི་ཁྲོད་དུ་ཕན་ཚུན་ལ་གཅེས་ཤིང་མི་ཐམས་ཅད་ཀྱང་གཅེས་པར་འཛིན་པའི་དོན་དེ་གཙོ་བོས་འཕེལ་ཞིང་རྒྱས་པར་མཛད་པར༌ཤོག 13 དེ་ནི་བདག་ཅག་གི་གཙོ་བོ་ཡེ་ཤུ་དང་ཁོང་གི་དད་ལྡན་དམ་པ་རྣམས་ཕེབས་ཡོང་བའི་དུས༌སུ། བདག་ཅག་གི་ཡབ་དཀོན་མཆོག་གི་སྤྱན་སྔར་ཁོང་གིས་ཁྱོད་རྣམས་ཀྱི་དད་སེམས་བརྟན་པོར་མཛད༌དེ། ཁྱོད་ཅག་ནི་དམ་པའི་ངང་ནས་སྐྱོན་མི་མངའ་བའི་མི་རུ་འགྱུར་བའི་ཕྱིར༌རོ།།