45
1 Xu'u lázrdawa' tu dizra' xrtante̱,
na' gúl-laqueza' tu da naca chee̱ Wenná Bea.
Gúl-laqueza' tu da bzuaj tu benne' dxuchálajle̱'e̱ cháwedau'.
2 Nacu' xrtánle̱'e̱dxa ca xúgute̱ bénneache.
Dxezíle̱'e̱ntu' ba neza chee̱ dizra' dxuchálaju',
lawe' da nucá'anaqueze Dios Lue' cháwedau' tu chí'izqueze.
3 Bda' xia chiu' dxu'a le̱'u, Lue', benne' wal-la,
lu dute̱ xel-la' szren chiu', ne xel-la' dxenná bea chiu'.
4 Lu xel-la' szren chiu' chepe bánquezu'.
Bchine dizra' li, ne xel-la' dxexruj lazre', ne da xrlátaje,
na' guzéajni'i Cuinu' da zri'a ca'.
5 Zaj nalále̱'e̱ xaga nalá xéche'ze chiu' ca',
da xelute na benne' xe̱zr la xu ca' lau Lue',
ne cheajlechaze na lu lázrdau benne' ca' dxeledábague̱' Lue'.
6 Lataj blau naga dxe'u, Dios, naca na da chadía chacanna,
ne súatequeze na.
¡Xrlátaje naca ca dxenná be'u!
7 Nazri'inu' da naca xrlátaje, ne dxecuídenu' da cale̱la.
Chee̱ le̱ na' ba nuzúa Dios chiu' Lue' xlátaju',
naga dxebéle̱'e̱dxenu' ca le sa' ljwezru' ca'.
8 Dxelá zixre zra lanu' nen xala da naca na nizre xaga,
ne xiaj, da ca' dxelelá na zixre.
Lu xu'u lizru' da zácale̱'e̱ na dxuluzúe̱' Lue' lu da ba neza.
9 Bi nu'ula chee̱ wenná bea ca' zaj zúabe' ládujla nu'ula
chiu' ca' zaj naque̱' blaudxa.
Chalá'a xabe̱la chiu' dxe' nu'ula gácabe' zru'ulu' nácube' oro
da za na xe̱zre Ofir.
10 Bene, nú'uladau', ne gunná' xque, ne bze̱ naga da nnia':
Bzala lazru' lazriu' ne lizre xrau',
11 na' benne' wenná bea sa lazre̱' xel-la' xrtan chiu'.
Bzexruj lazru' lau le̱' lawe' da naca le̱' xranu'.
12 Xelelá' nu'ula xe̱zre Tiro lau lue', zaj nu'e̱ da xelunne̱' chiu',
na' xelenaba benne' gunní'a ca' gunu' tu culuén chee̱'.
13 Xrtanle̱'e̱ naca bi nu'ula chee̱ wenná bea lu xu'u naga zue̱'.
Zra lánabe' nazí' lechítaje̱ na oro.
14 Xeleché̱'e̱-be' lau wenná bea, nácube' zra lánabe'
da núale̱'e̱ lechítaje̱ na.
Nu'ula wégu'du ca' chjácabe' cuzru le̱be'.
Nu'ula caní, nu'ula ljwézrebe' xuluzúabe' lawe' lue'.
15 Lu dute̱ xel-la' dxebé, ne lu da ba neza xeleché̱'e̱-be',
na' xelú'ube' lu xu'u lizru', wenná bea.
16 Waláz chee̱ xra xrna'u xelexezúa zri'inu',
bi ca' gunu' xelenná beabe' du gabí'i xe̱zr la xu.
17 Guna' cheajlesá lazre' xúgute̱ bénneache lau' lue'.
Chee̱ le̱ na' xelúe lá'ana bénneache lue' chadía chacanna,
ne gaxuane iza.