1 Quebe su' ste̱be ne̱ chee̱ da dxelún benne' ca'

ne quebe se̱ lazru' da zaj nápale̱'e̱ benne' dxelune̱' da zrinnaj,

2 lawe' da xeledé chee̱ benne' ca' ca dxaca chee̱ xíxre'du ca',

na' gaca chee̱ benne' ca' ca dxaca chee̱ xixre' da nadxugu,

3 Bxren lazre' Xránadxu Dios, ne be̱n da xrlátaje,

na' súaquezu' lu xe̱zr la xu, ne sí'quezu' ba neza da li.

4 Bezaca ba lazre' nen Xránadxu,

na' Le̱' gúnnaqueze̱' chiu' da dxezá lazru'.

5 Bzua cuinu' lu na' Xránadxu,

ne bxren lazre' Le̱', na' Le̱' gune̱' ca da dxenabu'.

6 Gulé'ene̱' da xrlátaje chiu' ca tu xel-la' naxaní',

ne da li lazre' chiu' ca lawe' zra.

7 Guzúa zrize lau Xránadxu, ne guleza lazre Le̱'.

Quebe su' ste̱be ne̱ chee̱ benne' dxezi'e̱ ba neza,

8 Bsan xel-la' xichaj zra'a, ne quebe cuídenu'.

Quebe sa lazru' bi xusacu' benne' ca' dxelune̱' da cale̱la,

9 lawe' da guzría xi' Dios benne' ca' dxelune̱' da cale̱la.

Benne' ca' dxelebeza lazre̱' Xránadxu, gaca chee̱' xe̱zr la xu.

10 Chadite te chee̱ benne' ca' dxelune̱' da cale̱la.

Le'enu' lizre lataj benne' ca', san québedxa zaj zre̱'e̱ na'.

11 Benne' dxexruj lazre' ca' gaca chee̱' xe̱zr la xu,

na' xelexezaca ba lazre̱' lu xel-la' dxebeza zri lazre' zrente̱.

12 Benne' dxelún da cale̱la dxelilaj lazre̱' bi xelune̱'

ne lu xel-la' dxelezrá'a chee̱' xelagu lazxa benne' ca'.

13 Xránadxu Dios guzrízrequeze̱' chee̱ benne' ca' dxelune̱'

lawe' da nézene̱' ba za zra cheajsé̱ chee̱ benne' ca'.

14 Benne' dxelune̱' da zrinnaj dxelebéaje̱' xia chee̱',

ne dxuluzé̱' xaga nalá xéche'ze chee̱',

chee̱ xuluzría xi'e̱ benne' xache' ca', ne benne' dxelexazrje̱',

chee̱ xelútie̱' benne' ca' dxelune̱' da li lazre'.

15 Xia nalá chee̱ benne' ca' chaze na lu lazrdáuqueze̱',

na' gáchajqueze xaga nalá xéche'ze chee̱'.

16 Cháwedxa naca da du da de̱ chee̱ benne' xrlátaje

ca da gunní'a da zaj napa zánete̱ benne' dul-la ca',

17 lawe' da welátequeze ni'a na' benne' dxelúne̱' da zrinnaj.

Xránadxu ná'queze dxuxúe̱' benne' xrlátaje ca'.

18 Nunbea Xránadxu ca zaj naca zra xelezúa benne'

na' da zaj napa benne' ca' xelezúa na chadía chacanna.

19 Quebe xelexedué'ene̱' gate quebe dxaca chawe' chee̱

na' lu zra chee̱ gubina' gata' da xelawe̱'.

20 Xelebía xi' benne' dxelúne̱' da zrinnaj,

na' benne' ca' dxeledábaga' Xránadxu,

Xeledé chee̱', ne xelexenitie̱' ca zren chee̱ xi'.

21 Benne' ca' dxelún da cale̱la tu da dxelenabe̱' tu chí'idauze,

na' benne' xrlátaje dxexache lazre̱' le̱', ne dxunézruje̱' chee̱'.

22 Benne' ca' dxelé'e Xránadxu le̱' chawe', gaca chee̱

na' benne' ca' quebe dxelé'ene̱' chawe', xelebía xí'queze̱'.

23 Da dxelún benne' xrlátaje ca' zaj naca na da ble'e

Xránadxu le̱', na' dxelé'ene̱' cháwedau' ca da dxelune̱'.

24 Gate dxeleajchaze benne' xrlátaje ca' quebe cheajlechaze̱'

tu chi'ize lawe' da nuxru Xránadxu na' benne' ca'.

25 Benne' cuide' guca', ne na'a ba gúxrua',

ne cabata' ble'eda' tu benne' xrlátaje gusán Dios le̱',

na' quebe xeledá zri'ine zre sue̱' xelebéaje̱' guna'.

26 Benne' xrlátaje nigá tu dxexache lázrezqueze̱',

na' zri'ine zre sue̱' zaj naque̱' da ba neza chee̱ bénneache.

27 Québedxa gunu' da cale̱la, san be̱n da xrlátaje,

na' gaca bánquezu' chadía chacanna,

28 lawe' da nazrí'i Xránadxu da naca li lazre',

ne quebe dxusane̱' benne' zaj de̱'e̱ Le̱'.

Chadía chacanna tu guxúezqueze̱' benne' ca',

san guzría xi'e̱ xrtia ljwezre benne' ca' dxelune̱' da cale̱la.

29 Benne' xrlátaje ca' gaca chee̱' xe̱zr la xu nigá,

na' xelezrá'queze̱' chadía chacanna lu xe̱zr la xu.

30 Benne' xrlátaje dxuchálajqueze̱' da naca sina,

na' ca dxuchi'e̱ naca na xrlátaje.

31 Da nadxixruj bea Dios tu xú'uzqueze na xichaj lázrdawe̱'.

Chee̱ le̱ na' quebe cheajchaze bénnea'.

32 Benne' we̱n da zrinnaj dxenné̱'e̱ benne' xrlátaje,

ne dxune̱' ba xuzre gutie̱' le̱'.

33 Quebe gusán Xránadxu le̱' lu na' benne' we̱n da cale̱la na',

ne quebe guzría xi'e̱ le̱' gate dxuchi'e̱ chee̱'.

34 Guleza lazre' Xránadxu, ne be̱n ca da ba gunné̱',

na' Le̱' chísaqueze̱' Lue' chee̱ gaca chiu' xe̱zr la xu nigá.

Gate xelebía xi' benne' dul-la ca', na' lé'enu' na.

35 Ble'eda' tu benne' we̱n da zrinnaj, nagá'ane̱' szrente̱,

na' guxánle̱'e̱ da de̱ chee̱' ca dxegula tu xaga zrente̱.

36 Na' gudé chee̱', na' québedxa zue̱' na'a.

Bexílaja' le̱', san quebe nu bezrelda'.

37 Blaba lazre' ca naca chee̱ benne' li lazre',

lawe' da naga cheajsé̱ gaca tu da ba neza chee̱ benne'

38 Benne' dxelune̱' da cale̱la xelebía xí'queze̱'.

Quebe nu cha' xrtia ljwezre benne' dxelune̱' da zrinnaj.

39 Xránadxu Dios guseláquezé̱' benne' xrlátaje ca',

na' Le̱' gutipe̱' lazre' benne' ca' lu zra chee̱ da ste̱be.

40 Xránadxu Dios gácale̱ne̱' le̱', ne guselé̱' le̱'.

Guselé̱' le̱' lu na' benne' ca' dxelune̱' da cale̱la,

na' gune̱' gaca chawe' chee̱' lawe' da buluxrén lazre̱' Le̱'.