1 Xrana' Dios, dxebéaj lazru' bénneache.

Lue', Bénnea' dxebéaj lazre̱' bénneache, ble'e cuinu'.

2 Dxuchi'u Lue' chee̱ da dxelún xúgute̱ bénneache.

Guxasa, bexizruj da dxal-la' xelezí' benne'

3 Xrana' Dios, ¿Bátadxaqueze xelún benne' we̱n da cale̱la caní?

¿Bátadxaqueze xelebé benne' ca' dxelebéaj xíchaje̱' Dios?

4 ¿Bátadxaqueze xulucá'ana szren cuine̱', ne xelenné̱' dizra' zi'?

¿Bátadxaqueze xulucá'ana szren cuina benne' ca'

5 Benne' caní dxuluxrínnaje̱' bénneache chiu' Lue', Xran,

ne dxulusaca zi'e̱ bénneache guca'u Lue'.

6 Dxelútie̱' nu'ula tuze ca', ne benne' zitu' ca',

ne dxelune̱' xelátebe' bidau' we̱ze̱be ca'.

7 Dxelenné̱': “Quebe bi dxelé'e Dios, Xrana benne' ca'.

Dios chee̱ benne' Israel ca' quebe dxue lazre̱' chee̱ da na'.”

8 Le chéajni'i, le'e, benne' lázxdau zide'.

Le'e, benne' xala, ¿bátadxaqueze quebe chéajni'ile?

9 Dios be̱ne̱' nágadxu.

¿Québequeze dxénne̱' da dxennale?

Dios be̱ne̱' xiaj laudxu.

¿Québequeze dxelé'ene̱' da dxunle?

10 Diósqueze dxuzúe̱' lu da ba xa' benne' xe̱zr la xu ca'.

¿Québequeze til-le̱' le'e?

Diósqueze dxune̱' dxeléajni'i bénneache.

¿Québequeze gueque be'ene̱' da xu'u xichaj lázrdaule?

11 Xránadxu Dios nézquezne̱' da xu'u xichaj lázxdau

Nézene̱' zaj naca na da dácheze.

12 Ba neza zrente̱ naca na chee̱ bénnea' dxuzéajni'inu', Xran,

ne dxusé̱denu' le̱' ca naca da nadxixruj be'u,

13 chee̱ cueza zri lazre' gate za zra dxaca da cale̱la,

ca zrin zra xelexú'u xe̱dxu ba benne' dxelune̱' da zrinnaj.

14 Québequeze cueaj xichaj Xránadxu Dios bénneache chee̱',

ne quebe gusán lazre̱' benne' ca' ba gucá'a Le̱'.

15 Naca xrlátaje ca xuluchí'e̱ chee̱ bénneache,

na' xelúnqueze da xrlátaje xúgute̱ benne' zaj naque̱' li lazre'.

16 ¿Núzraqueze gácale̱ neda' tíl-lale̱dxu benne'

¿Núzraqueze súale̱ neda' tíl-lale̱dxu benne'

17 Chela ca gúcale̱ Xránadxu neda', báchelja xu'a xe̱dxu ba.

18 Gate gunnía': Xran, ba zua cheajcházia',

na' Lue', dute̱ xel-la' zri'i lazre' chiu' gúcale̱nu' neda'.

19 Gate dxe'a gunne xue, ne zua' lu da ste̱be,

Lué'queze dxexúe zrenu' neda', na' dxebéle̱'e̱da'.

20 Québequeze nacu' tuze benne' ca' dxuluchi'e̱ chee̱

benne' ca' dxulucá'ane̱' ca xrlátaje da quebe naca na xrlátaje.

21 Benne' caní dxelune̱' tuze dizra' da xelune̱' chee̱

na' dxelechugue̱' chee̱ gate bénnea' quebe bi zria nabague̱'.

22 Xránadxu Dios naque̱' ca tu xu'u naga zua chawa'.

Dios chia' naque̱' ca tu xiaj xre da dxuzé̱ chacha na neda'.

23 Le̱' xexízruje̱' benne' ca' dxelune̱' da cale̱la cáte̱ze naca

Guzría xi'e̱ benne' ca' lu da cale̱la da dxelune̱'.

Xránadxu Dios guzría xi'e̱ benne' ca' dxelune̱' da cale̱la.