65
1 Naca chiu' Lue', Dios, güe lá'anantu' Lue' lu xe̱zre Sión,
na' guntu' da guche̱be lázrentu' chiu'.
2 Lue' dxénqueznu' da dxuchálajle̱ntu' Lue',
na' xelelá' lau Lue' xúgute̱ bénneache.
3 Nabágale̱'a da zrinnaj da be̱na',
san Lue' dxunite lau' ca da gudábagantu' Lue'.
4 Ba neza zrente̱ naca na chee̱ bénnea' dxeca'u Lue',
ne dxenníu' le̱' gaque̱' chiu', chee̱ súaqueze̱' lataj lá'azxa chiu'.
Xélajquezentu' da xrlátaje da de̱ lizru', da ca' da zaj de̱
xudau' lá'azxa chiu'.
5 Lu da xrlátaje chiu' gunu' da zaj naca zrente̱ gate gunu'
ca da dxenábantu' Lue', Dios, Benne' dxuselé̱' netu'.
Xúgute̱ bénneache zaj zra' dute̱ xe̱zr la xu dxelebeza lazre̱' Lue',
ne cá'anqueze dxelebeza lazre' benne' dxeledée̱'
zítu'la lawe' nísadau'.
6 Lué'queze dxuzúa chuchu' xi'a zren ca' nen xel-la' waca chiu'.
Nácaquezu' Benne' wal-la.
7 Dxebeche zriu' nísadau' gate dxelucu na,
ne schaga da dxelún xeajxruza chee̱ na.
Dxebeche zriu' benne' xe̱zr la xu gate dxeledábague̱' Lue'.
8 Chee̱ le̱ na' benne' zaj zre̱'e̱ dute̱ xe̱zr la xu
xelezrebe̱' ca naca da zrente̱ da dxunu'.
Dxuzú' lu da ba neza bénneache zaj zra' du gabí'i xe̱zr la xu.
9 Dxenna'u xe̱zr la xu, ne dxesel-lu' nisa xiuj.
Dxunu' dxúnnale̱'e̱ na lina chee̱ na.
Nuzúaquezu' lu xe̱zr la xu xe̱gu ca' da zaj de̱le̱'e̱ na nisa.
Dxucuezu' zrua' za da xelagu bénneache,
ca ba núnquezu' gaca na.
10 Dxesel-lu' nisa xiuj naga ba zaj nune̱' na'.
Dxunu' dxexaca na xu xa'a.
Dxuculu na nen nisa xiuj na'.
Dxunu' dxelegula chawe' da du ca' ba zaj naxaza na.
11 Dxunu' dxelexezí' bénneache ba neza tu iza tu iza
ne̱ chee̱ da dxunézruju',
na' ca zaj naca beuj bza chiu' dxelunna na xiuj
da dxun na dxelegula chawe' da zaj naza bénneache.
12 Dxelunna na xiuj naga dxeledá be̱ xíxre'du ca' da dxeláguba',
na' dxelebé bénneache dxelelé'ene̱' ca bane zaj zua xí'adu ca'.
13 Lache' ca' zaj zra' zrila' ca',
na' dxu'a xé̱gudu ca' zaj naxaza zrua' xtila,
na' dxelebezre xa'a bénneache chiu' dute̱ xel-la' dxelebé,
ne dxelúl-laqueze̱' chiu'.