Ojibiama8agani8i8ag ka teb8etamo8adj
Kolosi odenakag
Enadjimomagag oo mazinaigan
Mi oo8e ojibiigani kagi ojitodj kitcit8a Pon, e ojibiama8adjin ka teb8etamindjin 8edi Kolosi (Colosses) odenag. 8abanog inekena Epes (Ephèse) odenag iji tag8anogoban ii Kolosi odena, taji nogom e tag8ag Toki (Turquie) aki, 8edi Eja (Asie) akikag. Ka8in kanabadj 8ikad Pon odji ijasigoban iima. Mi ini pejig o8idji8aganibanin, Epapanas (Épaphras) ka ijinikazonipanin, Kolosi odenag ka odjinipanin, nitam kagi pi tibadjimondjin Kije Manidon omin8adjimo8ini iima. Apitc Pon kagi ojitodj oo8e ojibiigani, kibaodimigi8amikag meg8adj tegoban, egi paba tibadjimogobanen min8adjimo8ini 8edji ki takonagani8ipan.
Pon ki nodagegoban nandam a8iagon ega 8e8enda e tibadjimondjin min8adjimo8ini e paba kikinoamagendjin, acitc e 8agackibinandjin ka teb8etamindjin 8edi Kolosi odenag. Ikidobanig igi a8iagog panima ki pak8ej8agani8indjin, acitc panima ki nosoneamindjin inakonige8inan taji ka iji 8idamagani8anig 8egoneni ke midjigadenig acitc ke minik8ani8anig, acitc panima ki manadjiandjin ajenin, kidji gi odji kikenimandjin Kije Manidon acitc kidji gi odji ag8acimigondjin. Mi iidi ka iji paba kikinoamage8apan.
Pon dac ogi ojibiama8an Kolosi odenag ka teb8etamindjin kidji 8idama8adjin eta Jesosan e kackitondjin kidji ag8acimigondjin. Kicpin dac nosoneamo8adjin ini pakan kikinoamage8inan, odana8enima8an Jesosan. Pon ikido ma8adji Jesosan e kitci apitendagozindjin apitc8in kakina kegoni. O8idji8an mega Kije Manidon 8edi 8ak8ig, acitc kakina kegoni odogimakadan. Jesosan dac eta inendagozi8ag kidji manadjia8adjin. Inendagozi8ag Jesosikag kidji iji mama8ise8adj, e 8ebinamo8adj 8eckadj adi eji pimadizi8apan, aja nogom e aiamo8adj ii ocki pimadizi8ini kagi minigo8adjin Jesosan.
Nogom dac ogajigag, kiabadj tag8anon kikinoamage8inan ega ka teb8emagagin, acitc te8ag kikinoamage8innig ka paba tibadjimo8adj ini anodj kikinoamage8inan. Kiabadj dac ogajiganig, o8i 8agackibina8an ka teb8etamindjin, kidji ega teb8eta8andjin Jesos Christan egi todamindjin kakina kegoni kidji gi ag8acimigondjin. Kitci apitendag8ani dac nogom ka teb8etamo8adj kidji nisidotamo8adj adi ekidomaganig ii ojibiigani 8eckadj kagi ijinijaama8agani8inigobanen ka teb8etamindjin 8edi Kolosi odenag. Mamidonendamiagani8i8ag dac Jesos Christan ma8adji e kitci sogi apitendagozindjin apitc8in kakina kegoni, acitc 8in eta e kackitondjin kidji ag8acimi8endjin, acitc panima 8inikag kidji iji mama8ise8adj ka teb8etamo8adj.
1
1 Nin Pon kagi ojito8an oo8e ojibiigan. Kije Manido nigi onabamig Jesos Christ Odanodaganan kidji inagimigo8an. Kidjiki8enan Timote (Timothée) ni8idji8a.
2 Kidojibiamagom kina8a Kolosi (Colosses) odenag ka tajikeieg, Kije Manido odanicinabeman ka apitendagozieg, acitc nidjiki8enanag ka apitenimigo8eg, enigokodeeieg ka teb8eta8eg Jesos Christ.
Nipagosenimanan Kije Manido Kidadaminan kidji ca8enimigo8eg acitc kidji minigo8eg pekadendamo8ini!
Pon mig8etc odinan Kije Manidon
3 Tasin e aiamietamago8eg, mig8etc nidinanan Kije Manido, ka Tibeniminak Jesos Christ Odadaman. 4 Nigi nodagemin mega adi epitci teb8eta8eg Jesos Christ acitc adi epitci sagieg8a kakina Kije Manido odanicinabeman. 5 Mi iidi eji teb8etameg acitc iidi eji sagii8eieg, osa mega kikitci ketcinamendana8a kidji odisigo8eg nigodin ii mino kegon kagi kana8endamago8eg 8ak8ig. Apitc mega ka odisigo8eg min8adjimo8in, ii 8edjidagotc kikinoamage8in, kigi 8idamagom kidji apenimo8eg ketcinadj kidji odisigo8eg ii mino kegon. 6 Kakina mizi8ekamig mikodjigade ii min8adjimo8in, acitc mi maia tabickotc minatig ka madjigidj acitc ka mini8idj ejinag8ag. Mi iidi ejinag8ag min8adjimo8in kina8akag, ka ako mikodamago8eg nitam ii min8adjimo8in acitc ka ani nisidotameg Kije Manido okitci ca8endjige8in adi maia ejinag8anig. 7 Mi aa Epapanas (Épaphras) kagi pi kikinoamago8eg oo8e min8adjimo8ini, 8in ni8idji mikimomaganan ka kitci sagiagidj. Nikitci 8idokagonan, kitci 8e8enda e anokita8adjin Jesos Christan. 8 Mi aa8e kagi pi 8idamago8ag adi Mino Manido kagi iji 8idjiigo8eg kidji sagii8eieg.
9 Midac 8edji apanigotc aiamietamago8eg, ka ako nodageiag e mikomigo8eg. Nipagosenimanan Kije Manido kidji minigo8eg kakina kagita8endamo8ini acitc nisidotamo8ini Omino Manidoman ka migi8endjin, 8e8enda kidji gi kikendameg adi eji nda8enimigo8eg kidji todameg. 10 Midac iidi kigagi inadizim ka iji nda8endag ka Tibendjigedj acitc kakinagotc kigagi todana8a adi eji min8endag. Kakinagotc mino kegonan kiga todana8a acitc eckam eckam kiga ani kikenima8a Kije Manido. 11 Kije Manido mizi8e kiga macka8izickago8a, e minigo8eg omacka8izi8in ka kitci icpendag8anig, kidji gi kitci sogigaba8ieg apitc sanagendjigeieg, acitc kidji gi cacibendameg, e kitci modjigendameg. 12 Mig8etc ijik Kije Manido Kidadaminan, egi minigo8eg kidji kackito8eg nigodin kidji odisigo8egon ini kegonan kagi ikidopan kidji minadjin odanicinabeman, Ogima8i8inikag ka kitci 8aseanig ka tag8anigin. 13 Kigi 8ack8ebinigonan ka iji kitci kacki tibikanig ka kitci tibenimigo8akoban, acitc kigi minigonan Og8izisan ka kitci sagiadjin kidji odogimami8aiak. 14 Mi ini Og8izisan ka odji ag8acimigo8ak, acitc ka odji kasiamago8ak kipatado8ininanan.
Adi epitci apitendagozidj Jesos Christ
15 Tabickotc ka ijinagozidj Kije Manido ega ka nagozidj, mi maia ejinagozidj Jesos ka nagozidj. Mi ini nitam Kije Manido Og8izisan, na8adj ka kitci apitendagozindjin apitc8in kakina kegonan kagi kijendjigadenigin. 16 Kije Manido mega ogi abadjian kidji kijendagin kakina kegonan 8ak8ig acitc akikag ka tag8anigin, kegonan ka nag8anigin acitc ega ka nag8anigin. Ogi abadjian kidji kijenimadjin kakinagotc manidon ka macka8izindjin, ka tibenimi8endjin, ka ogima8indjin, acitc ka kacka8indjin. Jesos dac kakinagotc kegoni ogi kijendan, 8in dac kidji manadjiagani8idj kakina kegoni 8edji tag8anig. 17 8in ki tegoban ab8amaci ka kijendjigadenig kakina kegoni, acitc onagadjiton kakina kegoni kidji gi pimadjiomaganig. 18 8in nigani kakina Kije Manidon odanicinabeminikag, ka ma8adjiidindjin kidji aiamiendjin, tabickotc Jesos o8ia8 ka ijinagozindjin. 8inikag odjimagani pimadizi8ini, acitc 8in nitam ki abidjiba nibo8inikag, apanigotc 8in ma8adji kidji apitendagozidj. 19 Kije Manido mega ogi onendan mizi8e kidji pidigecka8adjin Jesosan, 8edjidagotc tabickotc 8in ka ijinagozidj kidji ijinagozindjin. 20 Acitc ogi onendan kidji abadjiadjin Jesosan kidji 8a8ejibidondjin kakina kegonan ooma akig acitc 8ak8ig ka tag8anigin, kidji gi koki min8endamiigodjin ini kakina kegonan. Jesosan dac omisk8ini kagi odjiga8inig apitc ka nibondjin tcibaiatigokag ogi abadjiton kidji ijitcigedj ii.
21 8eckadj ako kina8abama8aban Kije Manido. Kimadjenima8aban, osa mega kikitci mamidonendana8aban adi ke iji madji inakamigiziegoban, acitc kigi kitci madji ijitcigena8aban. 22 Nogom dac, osa Jesos egi pi anicinabe8iidizodj acitc egi nibodj, Kije Manido kigi minigo8a kidji koki mino 8idji8eg, kidji gi tajigaba8ieg nigan 8inikag e paiekideeieg, e k8aiakozieg, acitc ega odji pejig patado8in e kigickameg. 23 Panima dac ega 8ikad ki ponito8eg kidji teb8etameg min8adjimo8in, tiegodj panima ki sogigaba8ieg, e ketcinamendameg e teb8emagag, ega 8ikad kidji 8ebinameg ii apenimo8in kagi odisigo8eg apitc ka nodameg min8adjimo8in. Mizi8ekamig ki 8idamagani8an ii min8adjimo8in, kakina a8iagog odji. Nin dac, Pon, nidanokita8a Kije Manido e paba tibadjimo8an ii min8adjimo8in.
Pon kagi inanonigodjin Kije Manidon
24 Nogom dac nimin8endan e kodagito8an kina8a odji. Tabickotc pejig8an Jesos Christ kagi iji kodagitopan, mi eji kodagito8an nogom nia8ikag, kidji gi kijito8an ii mikimo8in kagi majikagiban Jesos Christ apitc ka kodagitodj, kidji gi 8idoka8ag8a igi a8iagog ka teb8etamo8adj ka ma8adjiidi8adj kidji aiamie8adj, tabickotc Jesos o8ia8 ka ijinagozi8adj. 25 Nidanokita8ag ka teb8etamo8adj, egi minijidj Kije Manido oo8e mikimo8ini, kidji gi 8idokaonagok. Nigi anonig dac 8e8enda kidji tibadjimo8an kakina odikido8in. 26 Ka ako kijendjigadenig akini, Kije Manido ogi kadama8an kakina a8iagon ka pi ani aianike nta8igindjin adi kagi iji onendag kidji todag. Nogom dac aja 8e8enda ogi 8idama8an odanicinabeman. 27 Kije Manido mega ogi nda8endan kidji kikendamonadjin adi epitci apitendag8anig acitc adi epitci icpendag8anig ii kagi iji onendagiban kidji 8idoka8adjin kakina ka inakanezindjin a8iagon. 8adan dac oo8eni ega kagi kikendjigadenigiban. Jesos Christ kikigickago8a, e minigo8eg kidji ketcinamendameg kidji aiameg kekina8a Kije Manido odicpendagozi8in.
28 Jesos Christ sa dac ka paba mikomagidj. E abadjito8ag kakina kagita8endamo8in ka aiamag, ni8idama8ananag kakina a8iagog adi enendagozi8adj kidji inakamigizi8adj acitc nikikinoama8ananag. Ninada8enimanan mega kakina pepejig a8iag kidji madjigidj teb8etamo8inikag, tabickotc kitci anicinabe kidji ijinagozidj, Jesos Christikag e iji mama8isedj. 29 Kidji kijito8an dac oo mikimo8in, nikitci nak8i adi epitcian, e abadjito8an kakina macka8izi8ini Jesos e minijidj, ka kitci paietenag8anig apitc mikimo8an.