1 Yo sè tù yo, wàa yo ꞌví ꞌdi ta có tí nô, ndâ mbe kpo-kpò i. Yo wa tí yo, yo ꞌví tò ndòzì, tacó yo kèjì gí bà kònò séꞌi ta wotí tí . 2 Ndâ kpo-kpò i mì yo nò bà giì zii ꞌdáá gî, ndâ ki bà giì da ndâ bòngo mì yo nò ꞌdáá gî. 3 Ndâ gùrúsù mì yo nò bà giì gbì ngbàza. Ngbàza tí nò bà tùbà  máa, yo bàkà tó i ta gùrúsù mì yo lá. Ngbàza tí nò delè bà tùbà  máa, ꞌbí i bà giì zò dìì yo á go bà zò ndâ liì mì ngbàza. Ndâ i tí nò náa yo zèè ndú kácá-kácá nò bà giì dù tí tàcu wu tacó bà giì doo ta yo ta ndòngbú o.

4 Yo ŋò ŋa ndâ i tí nò náa yo kû bàkà nò gi. Yo ko mboo nèté mì ndâ mbe bàkà nèté gbí ndâ njí mì yo ji ndú lá. Yo sè tù yo, wàa yo ꞌví ꞌdi káa kòcò ndâ i tí nó náa yo biimo ndâ mbe bàkà nèté tacó tí ndú ꞌdo tí ndú gî nó kû ꞌdè kòlòwò gítí yo gi. Kòcò gbí mì ndâ ꞌduù tí nò mbe bàkà nèté gbí ndâ njí mì yo káa yo sì tàkò nèté mì ndú lá nó yee gbí tù Mbíṛì tí Mbe tí ndâ i ꞌdáá gî gî.

5 Yo kû ꞌvala á muu to tí nó gbí dà. Yo zò ŋó, wàa yo ꞌví yuku ta tí yo, káa yo ŋò ni lá máa, yo kû ꞌvii nò a ndi tí yo tacó bà waaka yo mì Mbíṛì go bà waa bee ta o bà waa có. 6 Yo ká kû waaka có ta ꞌvéṛè mítí ndâ ꞌduù ŋìnó ta vò i mì ndú wálá nó gbí ngbàngà; ndâ ꞌduù ŋìnó ta ꞌbí i mì ndú náa ndú ꞌví me ta yo tacó bà ꞌvala miṛi ndú ꞌdo mì yo wálá nó kû mìì ꞌdo gbí có mì yo.

7 Má énò, yo kpónó ꞌví zèè njembí yo di tí o bà gì Mbe tí ndoo, ndâ náꞌvindí ye. Yo ŋò káa ŋa bà zèè njembí ndâ mbe ji njí gi. Ndú zèè njembí ndú ꞌdo tí o bà yee njì ŋa mí tà to di tí o bà kili ndâ tó i ꞌdo gbí njí. 8 Má énò, yo zèè njembí yo, wàa yo ꞌví ꞌdò kò yo mí to tí kpoò, tacó o bà gì Mbe tí ndoo kpónó me jéꞌdéé gî.

9 Yo si bà ꞌdè víí có gbí òkò tí yo mí to, ndâ náꞌvindí. Yo má bàkà go énò, àá bà waa có mítí yo ta ndòngbú o. Yo zekeꞌo gi, kùṛo o bà gì mbe waa có kpónó dooko gî. Yí kpónó-kpónó bà yee tí yo.

10 Yo ꞌví koṛo muu yo delè gítí ŋa kpácà mì ndâ mbe ꞌdòkò có mì Mbíṛì gbí ndâ vò o gbí o mì ndâ ká gù ndoo dígísèé, wàa yo ꞌví mèlè ndi ndú. 11 Yo ŋò ŋa nambeè tí nó táánò náa Mbíṛì bàkà ji ndú tacó ndú táánò a ndâ mbe kpácà gbí ndâ vò o tí nò nò gi. Yo ꞌdi tàwo ŋa nambeè tí nó náa Mbíṛì táánò bàkà ji Jóbè á bìndi bà nanaka muu wó mítí bà ùnje gítí Mbíṛì si yí táánò ta séꞌi tí wó nó gî. Yo delè giì ŋò ni gî, máa, Mbíṛì táánò giì sì có ndâ i mì Jóbè mbe volo nó ta bà  me mbè. Mbíṛì bàkà ŋa gbolò nambeè tí nò ji Jóbè tacó yí kû zè ndoo ta pétékè njembí wó, yí delè kû ŋò yê ṛo ndoo.

12 ꞌBí kpóló-kpolo có gbaànjé náa ye bà ꞌdè ji yo a ŋìnô, ndâ náꞌvindí, máa, yo si bà see tí yo mí to. Yo see tí yo máa, «Go gbíṛì,» lá, yo delè ꞌví see tí yo máa, «Go to tí nó,» delè ta ṛè mì ꞌbí ŋa i là. Káa wò tí ꞌduù má ùnje gítí i gî, ꞌdè káa có máa, «Ye ùnje gî.» Káa wò má biya i gî, wò delè ꞌví ꞌdè káa có máa, «Ye biya gî.» Káa wò má me me énò lá, wò bà yuu miṛi lo mí gbí vò i ta ndòngbú o.

13 ꞌBí i má kû pèè mbí ꞌbí ꞌduù gbí òkò tí yo, si yí ꞌví ꞌdeke tí wó ji Mbíṛì. Káa delè ꞌbí ꞌduù gbí òkò tí yo má ta líkíꞌo tí wó, si yí ꞌví be ṛè Mbíṛì gbí cè. 14 ꞌBí ꞌduù gbí òkò tí yo má ta nòꞌo tí wó, si yí ꞌví tèꞌé tí ndâ ꞌbí tó kpo ꞌduù gbí òkò tí yo tí ndâ mbe kû kili ta ṛè mì Bìndi-Mbíṛì, wàa ndú ꞌví ꞌdeke tí ndú ji Mbíṛì tacó tí wó. Káa ta o tí nó náa ndú má kû ꞌdeke tí ndú ji Mbíṛì nó, ndú ꞌví toṛo bàà mítí wó ta ṛè mì Mbe tí ndoo Jézù tí Bìndi-Mbíṛì. 15 Ndú má ꞌdeke tí ndú ji Mbíṛì ta njembí ndú dú, Mbíṛì bà je à-cee-gî gítí ndâ vò i mì mbe nòꞌo tí nò gî, yí delè bà si yí ꞌví a gí yaà ꞌdo gbí nòꞌo mì wó nò gî. 16 Má énò, yo yù gbí ndâ vò i mì yo á gbí òkò tí yo. Yo delè ꞌví ꞌdeke tí yo ji Mbíṛì tacó tí yo gbí òkò tí yo, wàa yí ꞌví ꞌvala ta yo ꞌdo tí ndâ i ŋìnó mbe kû pèè mbí yo nô. Ye ꞌdè có tí nò ji yo, tacó tó ꞌduù má ꞌdeke tí wó ji Mbíṛì, à gbí kòcò wó a wotí tacó bà gì ta ndâ kpo-kpò i ꞌdo mì Mbíṛì.

17 Yo koṛo muu yo gítí Èlíjà tí mbe ꞌdòkò có mì Mbíṛì táánò gbí o mì ndâ ká gù ndoo gi. Yí táánò káa ꞌduù ta ndâ sìlì ꞌbì wó vô ká go ŋìndi ndoo. Káa ta ꞌbí o gbaànjé Èlíjà giì ꞌdeke tí wó ji Mbíṛì ta njembí wó gbaànjé, máa, mù ꞌví si bà nì mí to. À dú káa yúcó, ꞌdo tí o tí nò, mù giì nì gbí to tí nò lá ta ndoò taꞌô ta pì vô-nje gbaànjé pí . 18 Káa bà o tí nò mâ giì ndii gî, Èlíjà giì ꞌdeke ndi tí wó ji Mbíṛì kákáꞌi máa, yí si mù ꞌví nì . Mù dú giì nì go có mì wó nò gî. Bìndi  ndâ dó kú i giì ꞌbìtà bà kù ndi ndú kákáꞌi.

19 Ndâ náꞌvindí, yo konì ndâ ꞌduù ŋìnó mbe giṛiꞌo ꞌdo tí kpokèjì mì Mbíṛì gî nô. Yo gì ta ndú gítí tó kpokèjì kákáꞌi. 20 Yo ŋò ni gî máa, ꞌduù má ꞌvìsì muu ꞌbí mbe giṛiꞌo ꞌdo tí kpokèjì mì Mbíṛì gî gítí tó kpokèjì, gbí  máa, ꞌduù tí nò ꞌvala nò a ka wó ꞌdo gbí bà waa có mítí wó bìndi ku mì wó gî. Mbíṛì delè bà je à-cee-gî gítí ndâ ꞌbí ká vò i tí nó ꞌdáá gî náa ꞌduù tí nò mbe dele gítí tó kpokèjì nò bàkà ndú si yí táánò tí vò kpokèjì nó gî.