1 Nbɩɩnbɩɩ lɩɩ afulee mʋ nɩɩ fɛn tʋʋ fan naa sa Krisito abi mʋ nɩɩ ba bʋ Gyerusalem mʋ, fan waa fɛɛ kanan mʋ nɩɩ n tɔwɛ Krisito kʋbʋ‐kʋbʋ mʋ nɩɩ ɩ bʋ Galati ɔsʋwʋlɛ sʋ mʋ. 2 Ɩmʋ ɩ gyɛ yɛ, Gyiwu abi kakɛ gyankpaasa* 16:2 Gyiwu abi kakɛ gyankpaasa ɩ gyɛ Kwasida. kʋmaa mʋ, fanɛ ɔkʋmaa nɩmʋ ɔ lɛɛ mu afulee mʋ nɩɩ ɔ nyɛ mʋ tɔ ɩkʋ yɩla, fan man gyoo naa fʋʋ kakɛ mʋ nɩɩ n biti n ba pɔyɩ kɛ fan lan lɛɛ. 3 Nɩɩ n ba mʋ, kɛ fan taa tʋʋtʋʋ mʋ sa asa mʋ nɩɩ fan lɛɛ mʋ, kɛ n kyʋrɔɔ ɔwʋlɛ mʋ nɩɩ ɩ kaapʋ asa mʋ nɩɩ ba gyɛ, kɛ n sun bamʋ, kɛ ba taa fanɛ tʋʋtʋʋ mʋ kpee Gyerusalem kadɛ tɔ. 4 Amaa nɩɩ ɩ kan ba fɛɛ ngbaa mɛ n kpee mʋ, kɛ ba buu mɛ kɛ a kpee.

5 N kan lɩɩ Masedoniya ɔsʋwʋlɛ sʋ mʋ, kɛ n ba fanɛ asɛ. Lɩɩ fɛɛ n waa nfɛɛrɛ fɛɛ n biti n bɔla tʋtɔ pɔyɩ kɛ n ba fanɛ asɛ. 6 Akʋtɔ n biti n kyɩna fanɛ asɛ gbɛrɛɛ, abɛɛ gbangban ii biti o tu mɛ fanɛ asɛ, kɛ fɛn taalɛ sun mɛ ɔkpa kpee katɩn kʋmaa mʋ nɩɩ n biti n kpee. 7 Ɩnɩmʋ bɩrɛ, n mee biti fɛɛ n dan wu fanɛ kɛ n ŋmayɩ sʋ kyʋn. Nɩɩ Ɔnyɩrɩpɛ Ɩbwaarɛ kan kyula mʋ, n biti fɛɛ n gyii nkɛ gbɛrɛɛ kʋ fanɛ asɛ. 8 Amaa n san n biti n baa n bʋ Efeso kadɛ nfɩɩ, naa fʋʋ Pentekosi kesu kɔnɔ ngyaŋɛ mʋ saŋa. 9 Lɩɩ fɛɛ Ɩbwaarɛ bugi ɔkpa lala kʋ sa mɛ, kɛ n nyɛ waa kusun mʋ, amaa bamʋ nɩɩ bee kisi mɛ mʋ ba kyɔ nfɩɩ.

10 Nɩɩ Timoti kan ba fanɛ asɛ mʋ, fan kɩtaa mʋ danbɩrasa kɛ mu ansi i gyii. Lɩɩ fɛɛ ee sun Ɔnyɩrɩpɛ Yesu kusun mʋ nɩn, fɛɛ kanan mʋ nɩɩ ngbaa mɛ n sun falɛ. 11 Ɩmʋ sʋ fanɛ tɔ ɔkʋ ɔ man kan ŋmanyan mʋ, amaa fan sun mʋ ɔkpa kayɩɩ yuuli tɔ, kɛ o bwii ba tu mɛ nfɩɩ. N kɩɩ mʋ yɛ anɛ bɩrɩsa ana Krisito abuupu mʋ ɔkpa.

12 Nbɩɩnbɩɩ lɩɩ anɛ bɩrɩsa Apolosi sʋ mʋ, n payɩ ansi waa mʋ aniya tɔ fɛɛ, o tii anɛ bɩrɩsa ana Krisito abuupu mʋ sʋ, kɛ ba ba bɔɔ fanɛ sʋ. Ɔ man pɩɩ yɩlɛ kyula yɛ ee biti ɔ ba nbɩɩnbɩɩ, amaa nɩɩ ɔ kan nyɛ ɔkpa mʋ, ee biti ɔ ba.

13 Fan baa fan da sʋ, kɛ fan yɩlɛ fanɛ kɩkɔɔlɛ‐gyii mʋ tɔ kenken, kɛ fan yɩlɛ kɩnyɩn tɔ, kɛ fan nyɛ ɔlʋn. 14 Fan taa kebiti sun fanɛ kusun kʋmaa nɩmʋ.

15 Fen nyi fɛɛ Sitefana maa mʋ kɩkpaara sʋ abi, ɩ gyɛ asa mʋ nɩɩ ba gyankpaa kɔɔlɛ Krisito gyii Akiya ɔsʋwʋlɛ sʋ, nɩɩ ba taa bamʋ n‐yɩɩ sa bɛɛ kyɛ abuupu mʋ tɔ. 16 Mɛ‐daa ana yɛ mi‐supu ana, n kʋlɛ fanɛ nɩn fɛɛ fan bɩya fanɛ n‐yɩɩ kasɛ sa kanɩn asa maŋa, yɛ ɔsa kʋmaa mʋ nɩɩ ɛɛ waa kanɩn kusun maŋa mʋ. 17 Saŋa mʋ nɩɩ Sitefana maa Fotunatu yɛ Akayiku ba ba mɛ asɛ mʋ, mi ansi i gyii. Lɩɩ fɛɛ fan maa man bʋ mi asɛ mʋ, bamʋ ɩ gyɛ bamʋ nɩɩ ba be yii fanɛ ayaa tɔ waa ɩmʋ nɩɩ fan daa yɛ fan waa mʋ. 18 Ba yɛgɛ nɩɩ mɛ kɔkɔlɔ ki yuuli mɛ, fɛɛ kanan mʋ nɩɩ ba waa sa fanɛ gbaa fanɛ mʋ. Falɛ asa ɩ dagaa fan maa lɛɛ bamʋ kɩtɩɩ.

19 Krisito kʋbʋ‐kʋbʋ mʋ nɩɩ ɩ bʋ Asiya ɔsʋwʋlɛ sʋ mʋ kpini bɛɛ fwaala fanɛ. Akwila maa Prisila yɛ Krisito kʋbʋ mʋ nɩɩ bɛɛ gyaŋɛ bamʋ kɩkpaara sʋ mʋ, bɛɛ fwaala fanɛ gaa lɩɩ Ɔnyɩrɩpɛ kɩtɩɩ tɔ sʋ. 20 Anɛ bɩrɩsa ana akɔɔlɛ‐gyipu mʋ nɩɩ ba bʋ nfɩɩ mʋ kpini, bɛɛ fwaala fanɛ. Fan taa kibiri abaa tɔ fwaala abaa lɩɩ fanɛ nkɔlɔ tɔ.

21 Mɛ Pɔɔlɩ gbaa‐gbaa ɩ taa mɛ kɩbaa kyʋrɔɔ afwaala ɩnɩmʋ n sa fanɛ.

22 Ɔkʋmaa mʋ nɩɩ o mee biti anɛ‐Nyɩrɩpɛ Yesu Krisito mʋ, Ɩbwaarɛ ɔ tɔwɛ mʋ kɔnɔ. “Maranata” kɩmʋ kasɛ ɩ gyɛ yɛ, “Anɛ‐Nyɩrɩpɛ, ba!”

23 Anɛ‐Nyɩrɩpɛ Yesu Krisito ɔ bwaala fanɛ. 24 Lɩɩ Yesu Krisito kɩtɩɩ tɔ sʋ mʋ, mi kebiti kɩ baa kɩ bʋ fanɛ kpini asɛ. Amen!