1 Wü di enga wüna, ma wu eyi, gü ba, yi wu Rïrï, ta te Me to fü *Müse ne, eyi reke areke. Amba tïtïne yi ngbü tïne esa *Rïrï ka Müse la nda-yi de, angü yi kpi eyi tundu de wü Yesu. Wayi, ah le ta de yi di emere Rïrï la, o yi di la ezükü. Amba baka te yi kpi eyi tundu de wü Yesu ne, yi tï adu angbü esa wazi ka Rïrï la tïne de. 2-3 Yi fï la ngü ka würüse, te di esaka watï ye. Rïrï mala, gü ba, ah le de engu o jia ye nzö eküte watï ye. Te würüse la ngbü ake gara komoko, o watï ye na di la ladü de jia ye la, wü kpara ena amala, gü ba, würüse la mere *siti ngü eyi. Amba, te watï ye na kpi eyi la, rïrï te ena adu atïrï engu tïne ma. Engu tï eyi adu aza gara komoko ka-ye. Te ah bala la, wüh ena adu amala, gü ba, engu mere kpah siti ngü eyi? Ah bala de. 4 Wü di enga wüna, ngü ka-nih ka-ye kpah bala. Nih de wü kpara, te nih ngbü esa Rïrï ka Müse, nda-nih tïne de, angü nih kpi eyi tundu de wü Yesu. Nih ka-nih tïne eyi de wü *kpara ka Yesu *Kurisito. Angü Yesu Kurisito fa nih eyi gbü ngü ka Rïrï la, gbü sïkpï ta te engu kpi tete füh *rü gbegbete, fü Me azükü engu gbü kpi la. Baka te nih di eyi wü kpara ka Yesu ne, ah le de nih di emere wü züka ngü, te ngbü ereke gbü jia Me, te nga wü sïkpï ꞌburu. 5 Ta gügü, o nih to maguma nih fü Yesu la de ne, nih ngbü emere siti ngü, baka e te nih ngbü ele. Angü gümü wü siti ngü, ta te Rïrï ka Müse ngbü etïrï te nih ne, du ngbü emere nih efa sü. Te di bala, nih ngbü dela ta egïrï nga kpi. 6 Angü ta gügü Rïrï ka Müse i nih gbü ku ka siti ngü. Nih gïrï kaje teka aje Rïrï ka Müse la tete ma, nih maka nda-nih de. Amba tïtïne, nih tï agïrï kaje tïne de, angü *Nzïla Wazi Me ngbü eyi emaguma nih, da eto wazi fü nih, teka fü nih adi eje ngü ka Me di mbi mbi mbi. Angü nih ngbü ta esa wazi Rïrï ka Müse. Amba tïtïne, nih ngbü esa wazi ka Rïrï la tïne de. Me küwa nih gbü siti ngü la eyi, teka ngü ka kpi ka Yesu, angü nih kpi eyi tundu de wü Yesu.

7 Wü gara kpara tï eyi afï ngü, gü ba, te Rïrï ka Müse ngbü eto gümü siti ngü emaguma kpara la, te ah bala, Rïrï ka Müse ka-ye nda esiti. Yi mere e afï nga ngü bala de! Angü Rïrï ka Müse to siti ngü emaguma kpara nda de. Ah ka-ye de gümü siti ngü, te di emaguma nih, te ngbü efiti nih me-ye. Amba Rïrï ka Müse ngbü esere fü nih, gü ba, ngü la de siti ngü. Angü ta te ma ngbü ekpi gümü e ka wü bu ra ne, ma wu ta, gü ba, ngü la de siti ngü ne, nda-ra de. Kpah bala, fü ra adu atanga ngü la gbü Rïrï ka Müse, gü ba, “Mü mere e ao gümü e ka kiri mü de.”* 7:7 Mü ena amaka ngü la gbü buku ka Gogo ka wü Yïsarayele 20:17, bete Manda nga Rïrï 5:21. Fü ra adu awu, gü ba, ma mere siti ngü eyi. 8 Amba, baka te ma tanga ngü la, ma ce da eo gümü e ka wü bu ra eyi? Ma ce nda-ra de! Gümü e ka wü bu ra la du ngbü eke ra tïne efa sü. Amba, teka te yi wu Rïrï ka Me, ta te engu to fü Müse, de ne, yi tï kpah awu, gü ba, ani ngbü emere siti ngü ne, nda-yi de. 9 Ta gügü, te ma wu Rïrï ka Müse nda-ra de ne, ma ngbü ta efï nda-ra, gü ba, ma ka-ra de züka kpara. Amba, baka te ma du tanga ngü, te gü ba, “Mü mere e ao gümü e ka kiri mü de,” ne, fü ra adu awu, gü ba, amba ma ngbü ta neh emere siti ngü. Angü ma du wu eyi, gü ba, Me ena ato kuru te ra, fü ngü ka-ra anza! 10 Ma fï nda-ra ta, gü ba, ma ena aküwa teka Rïrï ka Müse la, angü ma ngbü ta emere Rïrï la ereke areke. Tïne sidi sidi, fü ra adu awu, gü ba, ma tï aküwa teka Rïrï la nda-ra de. Angü ma mere wü ngü, de te Rïrï la ngbü ele ne kpini kpini, nda-ra de. 11 Ta te ma ngbü efï nga Rïrï la, fü gümü siti ngü de emaguma ra la akpo da efiti ra, fü ra akpo da emere siti ngü. Te di bala, dela eyi si-ngü ta te Me ena ato kuru te ra tete na ne.

12 Dela ngü te ma le amala fü yi kpekpeke, gü ba, angü Rïrï ta te Me to fü Müse ne, ah ka-ye de züka Rïrï! Siti ngü gbügbü na nda ma! Rïrï la ngbü esere wü züka ngü, de te ngbü ereke gbü jia Me!

13 Gara kpara tï eyi ayi-ta ra, gü ba, te Rïrï ka Müse ka-ye ꞌburu mbi la, kpara ena amaka kpi gbügbü na, neh baye baye? Ngü la bala nda de. Ngü te ena ato kpi fü nih, ah de ngü ka Rïrï ka Müse nda de. Ah ka-ye de gümü siti ngü, te di emaguma nih. Angü wü Rïrï la ka-wü ꞌburu mbi, amba wü Rïrï la ngbü esere fü nih, gü ba, wü ngü de te nih ngbü emere la, wüh ꞌburu de siti ngü. Te di bala, nih tï eyi awu, gü ba, wü siti ngü ka-nih la, siti nih eyi gbü jia Me ꞌburu ꞌburu.

14 Wü di enga wüna, nih wu eyi, gü ba, Me to ta Rïrï la gömö *Müse, teka de ah to wü züka ngü emaguma nih. Amba teka ngü ka-nih, nih ka-nih de kpara ka küte. Fü wü *siti ngü de emaguma nih la angbü efiti nih, adu ao nih labï ka-ye. Angü wazi nih, te nih ena afa ngü la di ne, nda ma. 15 Nih wu zu ngü, de te nih ngbü emere ne, nda-nih de. Nih le ta eyi adi emere wü ngü, te ena adi ereke gbü jia Me, amba wazi nih, te nih ena angbü emere ngü la di ne, nda ma. Nih le ta kpah eyi ace wü siti ngü, de te nih ngbü emere ne, amba gümü wü siti ngü, de emaguma nih ne, ngbü fï bü efiti nih, fü nih angbü fï bü emere wü siti ngü la. 16 Te di bala, wü siti ngü, de te nih ngbü emere ne, nih le ta adi emere bala nda-nih kü de, angü *Rïrï ka Me gü tamu züka kaje eyi fü nih. 17 Fïngangü ka-nih, nih le ta ace da emere wü siti ngü. Amba nih du ngbü emere wü siti ngü la, neh teka ne? Nih ngbü emere wü siti ngü la, kükürü de, angü gümü siti ngü la ladü emaguma nih, te ngbü efiti nih. 18 Nih wu kpo, gü ba, wazi nih, te nih ena amere züka ngü di de tete-nih ne nda ma, angü nih de kpara ka küte. Te di bala, nih le ta amere züka ngü, te nga to rïrï te nih maka ne, amba wazi nih nda ma. 19 Wü züka ngü, de te nih ngbü ele amere ne, nih tï amere de. Amba nih du ngbü emere ka-nih fï bü wü siti ngü, de te nih le de ne. 20 Te nih ngbü eyi emere wü siti ngü, de te nih le de ne la, ah ta de ngü te nih le bala ne de. Amba maguma nih ka-ye ꞌbasu ꞌbasu. Ah ka-ye de gümü siti ngü de emaguma nih ne, te ngbü emere nih, fü nih angbü emere wü siti ngü la.

21 Ngü te nih wu kpo, ah dene. Te nih le amere wü züka ngü, de te Me ngbü ele ne la, da nih te nih ena amere nda ma. Angü gümü siti ngü de emaguma nih ne, ngbü fï bü eza nih, eto gbü siti ngü la. 22 Maguma nih ngbü ele Rïrï ka Me cu efa sü. 23 Amba wazi gümü siti ngü de emaguma nih ne, du ngbü vügü ka züka ngü ka Me de emaguma nih ne. Angü gümü siti ngü de emaguma nih la ngbü eo nih labï ka-ye. Fü nih angbü emere wü siti ngü teka ngü la.

24 Wü gara yi ngbü efï, gü ba, “Ngü la ngbü eto mere cïnga fü ani efa sü. Kpara te ena ato wazi fü ani, teka fü ani adi efa wü siti ngü de emaguma ani ne di, neh da? Angü ani ena akpi gbü wü ngü de bala.” 25 Amba ah le de nih gbo nga ïrï Me, angü Miri Yesu *Kurisito ena ato wazi la fü nih me-ye.

Wü di enga wüna, dela ngü te ma le amala fü yi, angü maguma nih ka-ye ꞌbasu ꞌbasu. Teka ngü la, nih le ta eyi amere Rïrï ka Me areke areke, amba gümü siti ngü du ngbü efiti nih me-ye, fü nih angbü emere wü siti ngü la.