3
Amam mandaꞌ maol siosi amamba mandaꞌ maol Godii
1 Alipipai, fowaꞌ aeꞌ ina aꞌipipa basef siꞌi agasoꞌasef epes isimba sagaila okom Ambal buꞌunai Godii, owaꞌ. Aꞌipipaef siꞌi agasoꞌasef epes isimba ukup pagasoꞌasa basef kofagefa Godii, siꞌi awasi ataꞌ sagaꞌ nomagof atogufi.* Jo 16:12; Hi 5:12-13; 1 Pi 2:2 2 Ataꞌ aseꞌepa nomagof atogof. Ina deiꞌ aseꞌepa gwaꞌaisi banagasi, ataꞌ owaꞌ. Deiꞌ main, ipaꞌ ina laꞌifipa, ataꞌ owaꞌ. Aeꞌ aꞌias endilisi atis, ipaꞌ deiꞌ wapani ataꞌ owaꞌ.* 1 Ko 1:10-11; 1 Ko 11:18 3 Deiꞌ main, ipaꞌ ataꞌ pagape atapipa ma waf opaf apinaii. Endilisi, waf anamba nawalapai waf kowagalasafi faloma ukup awepa sahin owani ma basef fitapaifi ataꞌ fape atapifa ipaꞌ. Isimba sihimbaꞌma apaꞌ hiapai ipaꞌ ataꞌ paila waf anamba nembel apinai. Waf anamba epes itapasi atona.* 1 Ko 1:12 4 Anin epen naꞌi, “Aeꞌ miniꞌap Poli.” Anin naꞌi, “Aeꞌ miniꞌap Apolosi.” Waf afambai ipaꞌ ataꞌ pape siꞌi epes itapasi atapipa.* Ap 18:4,11; Ap 19:1
5 Ipaꞌ ataꞌ nomonas sondandaꞌmas andeandeꞌ. Apolos anen aman mamahonama? A aeꞌ Pol aman mamahowema? Afaꞌ biafa wandaꞌ maoli atofa. Dembinai nasoꞌafa maol nandandafa. Eaꞌ maol inimba afaꞌ biafa wandaꞌani, ufiaꞌw akwamba atoꞌw deiꞌ ipaꞌ pahapifa Krais. 6 Aeꞌ aliꞌ ewaha olemb gwaꞌaimbi, Apolos nagiꞌ nakoloꞌ embelas. Apaꞌ God atotona nandaꞌam mataga. 7 Eaꞌ deiꞌ epen inimba negewaha olemb gwaꞌaimbii, anin agol akan. Eaꞌ epen nagakoloꞌ embelasi wapani anin agol akan, apaꞌ God nandaꞌ gwaꞌaisi isimba sagatagai, anen atona agol luꞌwagili gatomana. 8 Eaꞌ epen inimba negewaha olemb gwaꞌaimbii naloma epen inimba nagasoꞌ embelembii, esis bias sandaꞌ maol inimba atini. Eaꞌ esis bias atona atin anaf sofaꞌ hiahawes sondahama maol sandaꞌani.* Mt 13:3-9; Ef 2:20-22 9 Deiꞌ main, afaꞌ biafa wandaꞌ maol atitin Godi. Eaꞌ ipaꞌ siꞌi aof ananifi.
Amom mandaꞌ maola siosi mandahama mandaꞌ ifagwi
Ipaꞌ siꞌi ipat Godi.* 1 Ko 15:10; 2 Pi 3:15 10 Ama okom ananimi magamagailapai nagatopalopapa dowafi nandaꞌe ataga ape aliꞌ siꞌi epen gawainai nandaꞌ ifagwi, eaꞌ awa olaf fape faliꞌ anis solaꞌ ipat totomaf. Apaꞌ epes hiasi atona atin solawais andeandeꞌ asolaꞌ ipat totoma olaf afamba.* Ais 28:16; 1 Pi 2:4-6 11 Ipaꞌ pegawa God nandaꞌ Jisas Krais nape naliꞌ siꞌi olaf fotawa fagaliꞌi. Isimba atis ina ataꞌ anin epen laꞌifina nogawa anof olaf daiaf wapani, owaꞌatin. 12 Iꞌi epen ami niꞌi nelaꞌ ipat togatoma olaf afamba ilifi, anin nendaꞌ gol nelaꞌata o nendaꞌ silva mogogalaꞌ gambigambisi nelaꞌata, o nendaꞌ anemba otamba sagalotamamba aꞌowaꞌi, o nendaꞌ lawah o nendaꞌ walol o otalef alilifi, nelaꞌata.* 1 Ko 4:5; 2 Te 1:7-10 13 Nemaf afamba Krais nogafiꞌafii, maol inimba hiasi sondaꞌani netaga nondawalap alihin nepe boꞌwen aꞌa awen. Nemaf afamba fetaga feloma nif luꞌwafi. Eaꞌ nif ifimba fendo maol inimba hiani epes hiasi atona atini hiꞌilana sogogawa maol asasini boꞌwen aꞌa awen. 14 Iꞌi anin epen nelaꞌ ipat togatoma olaf afamba ilifi ma nif owaꞌ fendetaea, anaf nefaꞌ anom hiahaom fasimi. 15 Apaꞌ iꞌi ipat epen nandaꞌ maoli fendota hiꞌigalata, anaf ina nefaꞌ amamba fasimi, owaꞌatin. Endilisi, God nofaꞌan nogotanimai, apaꞌ hiahawes akan nepe dowaf siꞌi mutanima magaluꞌwani nifi.* 1 Ko 6:19; 2 Ko 6:16
Sios amam nematawa Kristen siꞌi ipat luꞌunai Godi
16 Ipaꞌ pegawa aꞌa owaꞌ? Ipaꞌ atipa siꞌi ipat luꞌunai Godi, eaꞌ Ambal buꞌunai ananinai nape nomona opalef ipeꞌilifi. 17 Iꞌi anin epen nehambombaga ipat anamba, anaf God nohambombaga epen inimba. Deiꞌ main, ipat anamba ananinai boꞌona hililiꞌi. Anamba eaꞌ ipaꞌ atipa.
Apaꞌ ina mosaꞌma agof epesi, naꞌamba owaꞌi
18 Naꞌamba anin epen nembasoꞌma anin atin. Iꞌi epen ipeꞌini okom mondandaꞌ niꞌi anin gawaini siꞌi epes itapasi sogofalasi, epen inimba andeandeꞌma nendambema ataꞌ netaga okom mosoꞌan niliꞌ ma atiasi negataga epen gawaini endilisi.* Jop 5:13 19 Deiꞌ main, gawa itapani inimba falafalafini siꞌi basef epes sahaga sagagauli sagaꞌiani ma naep Godi. Siꞌi Baibel naꞌias nagaꞌi, “God nofaꞌ epes gawaisi ma waf gawaifi fafifafi asasifi atef basoꞌafi siꞌi epes sagaha mafis isalef.”* Sam 94:11
20 Eaꞌ Baibel naꞌias wapani naꞌamba naꞌi, “Dembinai nogawa nomonas epes sogogawai falafisi atis.”
21 Eaꞌ anin epen ina nefela agof apaꞌ epesi, owaꞌi. Hiahaom hiami ipeꞌimi atom. 22 Poli Apolos, Pita maloma itap apaꞌe saloma ambal namili a gaꞌ wapani saloma hiahawes deiꞌ sagapani, anaf sigiꞌ sogatagai, amamba hiami ipeꞌimi atom. 23 Eaꞌ ipaꞌ epes Krais Jisasi, eaꞌ anen Godi.