1 Maduna metauna herevana Iehova ena amo, Israel latanai, Malaki ese e gwauraia.

2 Iehova na e tomu, Lau ese vada na lalokau henimui. A umui o tomamu, Ede vada o lalokau henimai toma? Iehova ma e tomu, Esau na dia Iakob kakana a? Ḡau tamona Iakob vada na lalokau henia, 3 a Esau vada na inai henia. Ena ororo tanona vada na havahua, bona ia ahuna na tano-ḡaḡaena sisiadia vada na henidia. 4 Edom bema toma “Vada e taomai tari, to vada eme heḡiḡi dobi gabudia ma baia haginidia lou”, bena Iehova Sabaota bema toma “Readia bae haginidia, to lau ese ma baina ḡiḡidia dobi, ela bona vada bae gwauraidia kara-dika tanona bona Iehova ese e badu henia hanaihanaimu besena”. 5 Sibomui matamui amo ba itaia, bena baoto, Iehova na herea, Israel tanona murimurinai.

6 Mero ese tamana e matauraiamu, bona hesiai tauna ese biaguna e matauraiamu. Bena bema lau na tama, imatauraigu be edeseni ai? Eiava bema lau na biagu, igari-henigu be edeseni ai? Hahelaḡa taumui e, lau ladagu o dadaraiamu taumui e, lau, Iehova Sabaota, na hereva henimuimu. Umui na o tomu, Oi ladamu ede a dadaraia toma? 7 Iniheto: aniani ḡaudia mirodia na egu ihaboulaina patana ai vada o ato. Ma o tomu, Ede a h uniroa toma? Iniheto: umui na o laloa Iehova ena pata baine hedadarai diba. 8 Ubu-ubu ḡaudia mata-kepuludia na boubou ḡaudia ai o halaodiamu negadia ai, una na dia dika a? Eiava ae-hedairike ḡaudia eiava gorere ḡaudia na boubou ḡaudia ai o halaodiamu negadia ai, una na dia dika a? Unuhetomana ta na emui hanua lohiana boma henia, ia ese bema moalelaimui eiava bema lalo namo henimui a? Iehova Sabaota na e herevamu. 9 Harihari Dirava ba noia, ia ese baine lalo namo henida bona baine bogada hisi a? Matogana, herahia ḡaudia unuhetomadia imamui amo baine abi negana ai, ia ese umui ta baine lalo namo henia a? Iehova Sabaota na e herevamu. 10 Umui bogaragimui amo ta ese iduara bema koudia, bena lahi na egu ihaboulaina patana latanai basioma ha-araia kava, una na bema namo. Iehova Sabaota na e tomu, Lau ese asina moalelaimuimu, bona boubou ḡaudia na umui imamui amo basioa abi. 11 Badina be daba e reremu ela bona dina e dihomu ai, lau ladagu na herea, bese idau-idau bogaragidiai, bona gabu iboudiai lalodiai muramura mai bonadia e gabudiamu lau ladagu ai, bona boubou ḡaudia ḡoevaḡoevadia danu e henimu; badina be lau ladagu na herea, bese idau-idau bogaragidiai. Iehova Sabaota na e herevamu. 12 A umui na O tomu Iehova ena pata vada e hamiroa bena anianina bae dadaraia negana ai, umui ese una pata na o hamiroamu. 13 Iehova Sabaota na e tomu: Umui o tomamu “Ina daka hekwarahi”, bona o hamue henigumu. Dadidadi ḡauna eiava ae-hedairike ḡauna eiava gorere ḡauna o mailaiamu, emui boubou ḡauna ai ba halaoa o tomamu. Iehova na e tomu, Be, una na imamui amo baina abia a? 14 Koikoi tauna na mai ena mamoe maruanena ta ena mamoe serina ai, bena e gwau hamatalaiamu; to mai dikana ḡauna ta na e hahelaḡaiamu, Ḡaubada ena; ia na bae uduguiraia. Badina be lau na Pavapava badana, bona lau ladagu na e gari heniamu, bese idau-idau bogaragidiai. Iehova Sabaota na e herevamu.